خمستاشر حاجة عشان الدايت ينجح

بعد رحلة ليست بالطويلة ولا القصيرة في الريجيم وإنقاص الوزن.. خمسة أشهر نجحت فيهم في إنقاص

وزني عشرين كيلوجرامًا.. عشرون كيلوجرامًا بلا رجعة قادرة على منحي بعض الخبرة التي من الممكن أن تتلخص في "15 حاجة" يجب التمسك بها وفيها ومنها ومعها حتى لا تسقط في فخ الانتكاسة. 

لن أتطرق إلى أنواع الأكل والسعرات وشرب الماء والرياضة، فتلك أمور الكل يعرفها وتعد من البديهيات ولا غنى عنها، وأطباء التغذية أولى مني بالاستفاضة فيها. سأتولى أنا مهمة أكثر صعوبة، وهي العوامل الأخرى التي تساعدك على الاستمرار والنجاح.

لن تبدأ نظامًا غذائيًا ناجحًا مليئًا بشحنة قوية قادرة على دفعك لأسبوعين متواصلين، إلا إذا كنت كارهًا

جدًا لشكلك وتفاصيلك وثنياتك ونفَسك المتقطع ونومك غير المريح وملابسك التي لا تلائم روحك وسنك. كارهًا نظرتك لنفسك قبل كرهك لنظرة الآخرين لك.

طهّر البيت والشنط والعربية من كل شيء ممنوع.. كل ما يحتوي على دهون وسكر ودقيق أبيض، حتى قوائم طعام محلات وجبات الأكل السريع تخلص منها بالحرق؛ يجب أن تتساوى تلك الممنوعات في نظرك مع الهيروين والكوكاكين والحشيش والبانجو.. أنا لو عليّ أجرّمهم في القانون.

ممكن تكون الكلمة أكليشيه شوية بس لا غنى عنها.. الإرادة هي الضمان الوحيد للاستمرار، بدونها مش هتقدر تكمل يوم بليلة. تيجي منين؟ وإزاي؟ هقولك.. هي مجرد ربط بسيط بين رقم 1 ورقم 4، طيب رقم 1 وعرفناها انزل للنقطة الجاية عشان تعرف رقم 4.

لو قدرت تربط بين شكلك الحالي اللي بتكرهه وشكلك بعد 6 شهور اللي هتحبه جدًا هتتولد الإرادة، وأهم من الهدف تقسيم الهدف، يعني متقولش أنا عاوز أخس تلاتين كيلو، قول أنا عندي 6 خمسات عاوز أخسهم، وكل ما نخس خمسة كيلو ننقص مجموعة.

هتقولي مين همّ السنيدة، هقولك أنا سعيد إنك سألتني السؤال ده.. السنيدة دول ناس عندهم نفس ظروفك بالظبط وعاوزين يخسوا، وزي ما كانوا بيسحلوك في ماك وهارديز وبيتزا هات اسحلهم إنت عند بياعين الخضار والفاكهة والجبنة القريش والأفران البلدي. إنتو قوة بعض، فشل واحد معناه فشل الكل ونجاح واحد معناه دفعه للباقين.

6- افصل شهيتك عن حالتك النفسية

أنا اكتئبت فأكلت فتخنت فأكلت أكتر فاكتأبت أكتر.. دايرة مغلقة كل أصحاب الوزن الثقيل عارفينها.. حالتك النفسية قعدها في حتة وشهيتك أجرلها شقة في حتة تانية خالص، اقطع ما بينهم العلاقات، خليهم يرفعوا قضايا على بعض، خلي نفسيتك تطلب الطلاق من شهيتك. حجّز ما بينهم طول الوقت.

الدفتر ده من هنا ورايح هو صديقك الصدوق، اقسمه نصين.. النص الأول للمشاعر السلبية وأفكار الأكل اللي بتجيلك، اكتبها وطلع طاقتك كلها على الورق، والنص التاني لمشاعرك الإيجابية، اكتب فيه كل حاجة حلوة بتحسها بسبب الخسسان وهترجعله وقت اللزوم.

لازم مخك يوصله إشارات ورسايل منك بتقوله إن الخسسان بيخليك مبسوط ومستمتع بالحياة، يعني متقعدش تاكل طبق سلطة من غير ملح وعليه ليمون وإنت متضايق ومكتئب وبتشتم في الناس الرفيعين. لأ، اعمل فنجان قهوة مع مكعب شوكولاتة دارك وشغّل أغنيه لمحمد فوزي واقعد في الهوا واعمل أحلى دماغ.. أو اعمل طبق فشار وشغل فيلم أبيض واسود جميل واتكلفت بالبطانيه واتسلى.

كنا بنقول زمان يوم الامتحان يكرم المرء أو يهان.. بعد مرور أول أسبوعين في الدايت بنجاح اخرج مع صحابك الرفيعين وخليهم يطلبوا كل اللي نفسهم فيه، تشيز كيك على براونيز على فرايز بالجبنة السايحة.. خليهم يعيشوا، وإنت اطلب أصحّ حاجة في المنيو، حتى لو رسيت على كوباية ليمون أو شاي أخضر. لو عديت من الاختبار ده وصمدت وروحت اتعشيت دايت ونمت مرتاح البال أوعدك هتصحى الصبح وأنت مشحون بطاقة تخليك تبدأ من جديد أسبوعين تانين من الالتزام.

النوم.. النوم.. النوم.. أهم من الأاكل والشرب، لو منمتش مش هتحرق، لو منمتش هتدوخ وهتاكل أول حاجة إيدك تقع عليها، لو منمتش هتتعصب ونفسك هتروح للحاجة الحلوة.. بس رجاء نام بالليل واصحى الصبح بلاش تقلب اليوم.

لو تقدر تربطه بحجر وترميه في النيل اعمل كده.. لو متقدرش حطه تحت السرير أو فوق الدولاب، أو ممكن تكهربه.. الميزان كل أول شهر بس، وممكن تستبدله بطقم ضيق جدًا عليك.. كل شهر تقيسه وتتصور بيه، واوعى توقف غير لما يوسع عليك جدًا وتحتاج تضيقه عند الخياط.

لو عندك وقت فاضي، أو أفكار الأكل دايمًا بتجيلك بالليل والناس نايمين ومش قادر تكهرب التلاجة أو تربط نفسك في رجل السرير.. شغّل إيدك في حاجة.. لوّن.. اشتغل كورشيه أو تريكو.. العب على الموبايل.. العب سودوكو.. اعمل أكسسوارات أو صلصال.. رتّب كراكيبك.. أي حاجة تسحلك ساعتين تلاتة لحد ما تنام.. وأي حاجة تقدر تتعلمها من اليوتيوب.

13- احتفظ بصورة لك في أتخن حالاتك

كبّرها وحطها في حتة واضحة أو اعملها خلفية للموبايل، وصورة تانية شهرية متغيرة.. حتى لو خسيت كيلو واحد في الشهر، برضو اتصوّر.