بالفيديو | بعد انهيار منازلهم.. أهالي عزبة المرشح: "شقى عمرنا تحت التراب"

"شقي عمرنا بقي تحت التراب، المطبخ والعفش والبوتاجاز والتلاجه والغساله، خلاص مبقاش عندنا حاجه نعيش بيها"..

بهذه الكلمات تعالت اصوات اهالي عزبه المرشح، بمنطقه الشلال، جنوب مدينه اسوان، بعد ان انهيار منازلهم اثر انفجار خط المياه الرئيسي بالمنطقه.

ثلاثه ايام مرت علي اصحاب المنازل المنهاره في الشارع، دون ماوي او منزل بديل، بعد ان اكتفت الشئون الاجتماعيه بصرف 400 جنيه لكل اسره ، حتي اليوم.

تقول اكرام حسين بشير:" كانت العزبه هاديه وفجاه بعد صلاة العصر سمعنا اصوات صراخ، وفجاه لقينا شلال ميه مش عارفين مصدره بياخد البيوت وبيدمرها واحد ورا التاني، وطبعا معرفناش نواجهه، فقعدنا في الشارع لحد لما جه ناس من المحافظه"

وتضيف: "في 3 ايام جه ناس من المحافظه والشئون الاجتماعيه وشافوا البيوت، وصرفوا لنا اعانه ملهاش قيمه، وفتحوا لنا مركز الشباب، وطبعا مش هنقعد فيها مع الرجاله والشباب والموظفين".

اما  "ام احمد"  والذي يعد منزلها الاكثر تضرراً، فتقول: "فوجئنا بالميه بتغرق البيت والحيطان بتنهار علينا، فخرجت انا وجوزي للشارع بعد فصل الكهربا عن البيت، وفشلنا في اننا نخرج الميه، فاستسلمنا وانتظرنا الفرج ".

وتوضح قائله: "بقالنا 3 ايام في الشارع، وبتفرج علي بيتي بيقع قدام عيني، كل عفشي راح، حتي الهدوم ملحقتهاش، والجيران بتديني انا وعيالي لبس واكل، بعد ما المحافظه موفرتش لينا الا كام بطانيه ومبلغ مينفعش نتصرف بيه".

وتشير ام احمد الي انه "كان من الاولي للمحافظ ان يباشر الامور بشخصه، ويوفر لهم فوراً ايواءا عاجلا، نظرا لحجم الكارثه الكبير، الا ان كل ذلك لم يحدث"، فيما وعدتهم الشئون الاجتماعيه بتعويض كبير لم يروا منه شيئا حتي اليوم.

اما بنوره عبده، والتي منعت من دخول منزلها لاحتماليه سقوط جدرانه بين لحظه واخري، فتقول: "فين المحافظ يلحقنا؟! انا قاعده في الشارع انا وبناتي، جوزي سايبني من سنين ومليش مكان اروحه، ومش قادره ادخل البيت، حتي رجاله المديريه مقدروش يدخلوا، خايفين يقع عليهم".

وتضيف قائله" هنعمل ايه بـ 300 او 400 جنيه او حتي 5 الاف جنيه اللي هي الحد الاقصي، احنا حتاجين بيوت جديده، امتي الظلم ينتهي، مينفعش تعويض مالي، لازم يوفرولنا بيوت".

ومن بين هذه الاسر وجدنا منزلا فارغا تشتت كل من به، بعد ان مرض رب الاسره واودع بالمسشفي نتيجه تدهور حالته الصحيه، وعقب الكارثه ترك بناته المنزل  والتي يبلغ عددهن 6 بنات ووطفل واحد.