سوق شبابى فى ألف مسكن: أحسن من قعدة القهاوى

نتيجة ارتفاع أسعار الملابس بشكل كبير انتشرت خلال السنوات الأخيرة العديد من الأسواق العشوائية فى مختلف المناطق بمحافظة القاهرة، أغلب بائعيها من الشباب صغار السن، واضعين الحوامل المعدنية والخشبية على الأرصفة جنباً إلى جنب، تحديداً فى ميدان «الألف مسكن» بمنطقة عين شمس، حيث انتشر الباعة على جانبى الطريق بمختلف أنواع الملابس الرجالى والنسائى إضافة إلى الأحذية والحقائب.

خلف أحد الحوامل المعدنية المُحملة بالملابس يجلس «محمد عاطف»، 21 عاماً، مستظلاً بها من أشعة الشمس، ويعمل «عاطف» بتلك المنطقة على مدار السنة، قائلاً: «معنديش شغلانة غيرها، بس للأسف الإقبال السنة دى مش زى السنة اللى فاتت، لأن البيع كان أحسن من كده بكتير، وده بسبب أسعار الملابس اللى زادت بشكل كبير فى الوقت اللى مصاريف الحياة زادت على الناس كلها»، مؤكداً أن الزبون كان يحصل على أكثر من قطعة أما حالياً فأصبح يشترى قطعة واحدة وبصعوبة أيضاً.

ويبيع «عاطف» الملابس النسائية، موضحاً أن أسعاره أقل كثيراً عن مثلها فى المحلات التجارية، قائلاً: «مكسبنا بيبقى 15 جنيه من القطعة الواحدة، ده أقل قميص جينز بيتباع بره فى المحلات بـ350 جنيه، لكن عندى هنا بيتباع بـ140 جنيه»، يُفضل «الشاب العشرينى» العمل فى الشارع عن البيع داخل محل «فى الشارع ببقى واخد حريتى فى الشغل، لكن لو شغال فى محل هيفضل صاحبه يتحكم فيّا».

يتعرض «عاطف» لكثير من المضايقات نتيجة عمله بالشارع، قائلاً: «بتيجى البلدية والشرطة كل يوم تقولنا دخلوا الاستندات دى جوه شوية، وبنسمع كلامهم عشان ناكل لقمة عيش، وبنمشى الدنيا معاهم ومش بنعمل مشاكل»، ويعمل «عاطف» فى ذلك المجال منذ 7 أعوام، «بدل ما نقعد على القهوة بننزل نشتغل ونشوف أكل عيشنا وأهو نساعد فى مصاريف البيت والأهل لأن الحياة بقت صعبة».

وعلى الرصيف من الجانب الآخر من الطريق، والمُخصص لبيع الملابس الرجالى، وقف «إسلام أحمد»، 19 عاماً، طالب بكلية تجارة جامعة عين شمس، أمام استاند الملابس الخاص به، موضحاً أنها المرة الأولى التى يعمل بها فى مجال بيع الملابس بعدما عمل فى أكثر من شركة من قبل، قائلاً: «شوية بيبقى البيع ماشى والدنيا حلوة وأوقات تانية الشغل بيبقى نايم خالص»، موضحاً أن سعر البنطلون الجينز يتراوح بين 160 و300 جنيه حسب جودته وبلد المنشأ، والشروال يبدأ من 120 حتى 180 جنيهاً، والتيشيرت من 100 لحد 150 جنيهاً، أما متوسط سعر الشورت 170 جنيهاً.

يُزيل «إسلام» الأتربة والغبار من على الملابس ويُعيد ترتيبها وعرضها، موضحاً أن الإقبال على شراء الملابس يرتفع مع حصول الموظفين على راتب الشهر الجديد، مضيفاً: «فيه ناس بتشوف الهدوم وبتقولى أول ما نقبض هنيجى ناخدهم، وبيتفقوا معايا وبياخدوا رقمى ويكلمونى عليه عشان أحجزلهم اللى هما عايزينه».