المحتوى الرئيسى

عبد الله غلوش يكتب: غلوشيات رمضانية (11) - E3lam.Org

05/27 23:27

– إعلان 500 500 .. يضاف لقائمة الإعلانات الحلوة في رمضان السنة دي.

– إعلان 500 500 .. غاب فكشف العديد من مخرجي الدراما، وعندما حضر علم على كتير من مخرجي الإعلانات .. تامر محسن.

– إعلان 500 500 أحسن حاجة في الإعلان انهم اتعلموا من غلطة السنة اللي فاتت، ومحطوش 500 500 في كلمات الأغنية.

– إعلان 500 500 .. حسنًا فعلوا القائمين على الإعلان لما اختزلوا ظهور هيثم أحمد زكي على لقطة أو أتنين بالكتير.

– إعلان 500 500 .. يظل صوت شيرين حالة تانية وحاجة تانية.

– إعلان 500 500 .. باقي الفنانين اللي شاركوا أحمد زكي في أشهر اعماله، على حد علمي ان عدم ظهورهم في الإعلان كان بناء على قرارهم لأسباب وظروف خاصة بيهم.

– سميحة أبوزيد مذيعة الفضائية المصرية .. كانت مثال في الاحترام والمهنية والجدعنة .. ربنا يرحمها ويصبر ولادها وأهلها.

– أبو عمر المصري .. من المرات النادرة اللي أحب فيها (الممثل) عباس أبوالحسن.

– أبو عمر المصري .. على ما اعتقد ان الشنط الترولي مكنتش ظهرت سنة 94.

– ليالي أوجيني .. انتصار اتخطبت وأمينة خليل حلمت بكابوس جديد .. أبرز أحداث حلقة اليوم.

– رولين وضاح القاسم و هشام سليم “لدينا أقوال أخرى” .. عبد الرحمن أبو زهرة “اختفاء” .. لميس الحديدي “عوالم خفية” .. ضيوف شرف المسلسلات اليوم.

– آية وحكاية للشيخ خالد الجندي والشيخ رمضان عبد المعز على الراديو 9090 .. من أمتع البرامج الدينية اللي ممكن تسمعها طول حياتك.

– سواء على صعيد الكأبه أو الكوميديا، الحقيقة رمضان السنة دي أفضل حضور لـ هنا الزاهد منذ ظهورها.

– فوق السحاب .. أكتر من نصف مخزون العالم في الأفورة موجودين عند نهال عنبر وأبنها في المسلسل.

– فوق السحاب .. هاني سلامة امبارح كان داخل المحل اللي بجيب منه المعسل في الشيخ زايد ، عشان يطلع باسبور مضروب.

– فوق السحاب .. أنا مش فاهم مرتضى منصور ساكت ازاي على المسلسل ومحمد التاجي لغاية النهاردة .. يا راجل ده حتى خناقة القفا وكيس البول وثقوها دراميا.

– رسايل .. يعني سليمان عيد يعرف ان في خبير أجنبي في علاج العقم جاي مصر وميقولش لـ زين القناوي يروح يتعالج عنده !! .. مكنش العشم والله.

– طايع .. حلقة واحدة وبتتعاد كل يوم.

– إعلان توشيبا العربي “لولا انتم ما كنا هنا” .. فكرة وتنفيذ أكتر من رائع.

– كلبش .. حواجب أبو روجينا في المسلسل بتخوفني أكتر من مشاهد باسل الخياط في الرحلة.

– كلبش .. بدون مبالغة .. عمرو وهبة مشروع أحمد حلمي جديد.

– رحيم .. الظهور الأول لأدوارد والحمدلله إنه الأخير.

– رحيم .. سارة الشامي من أفضل الوجوه الجديدة في المسلسل وفي شهر رمضان السنة دي بوجه عام.

– رحيم .. إسلام شوقي ابن دنيا في المسلسل، الحقيقة معرفوش قبل كده، بس اللي يعرفه ياريت يقوله ده مسلسل يا إبني مش مسرحية لشكسبير في مسرح الجامعة.

– رحيم .. عارف حضرتك المشهد اللي نور بتخلع فيه النقاب وطلبت من رحيم انه ينزل من العربية عشان بتتكسف .. ايوه بالظبط الخمس دقايق دول .. انا راضي ضميرك، كان ايه لازمتهم؟

– رحيم .. هل يعقل ان واحدة زي حماة اخو رحيم مبتعرفش تقرا ولا تكتب لما تدلع حفيدها، تقولوا مالك ياض كوبي بيست من ابوك كده ليه؟

– رحيم .. أول ما أغنية مدحت صالح اشتغلت، فجأة حسيت إني بتفرج على الجزء التاني من شورت وفانلة وكاب.

– ضد مجهول .. قلم أحمد سعيد عبد الغني على وش روجينا ، اتأخر بتاع 8 حلقات.

– ممنوع الإقتراب أو التصوير .. نفسي اصدق اي مشهد لـ زينة وهي بتعيط ومش عارف.

– أيوب .. سبت أيتن عامر الفوشيا ، أجمل ما في حلقة النهاردة.

– أيوب .. غاب محمد على رزق وحضر أحمد حبشي.

– أيوب .. لما دياب طلق أيتن عامر النهاردة ، افتكرت مصطفى شعبان لما قالها من أسبوع، اللي تبيع اهلها مفيش ارخص منها .. الله عليك يا استاذ مصطفى والله.

– مليكة .. اخيرًا عمر السعيد بدأ يشك إن أخته مش أخته.

– اختفاء .. المفروض ان محمد ممدوح فوق 80 سنة، بس التجاعيد مظهرتش غير في وشه فقط.

– بالحجم العائلي .. بعد مرور 11 حلقة، ايه الاضافة اللي قدمتها شيماء سيف للمسلسل أو المسلسل اضافه ليها ؟

– نسر الصعيد .. محمد رمضان بيقول لظابط من بتوع البلدية : عيب لما تبقى ظابط وتضرب واحدة ست في الشارع، الجميل في الموضوع إن محمد رمضان ضربه في الشارع وسط الناس في اخر المشهد.

– نسر الصعيد .. لحد إمتى شنب الصعايدة هايفضل متمرمط معانا في المسلسلات بالشكل ده ؟

– الواحد لما بيأذي حد عزيز عليه من غير ما يقصد ويفقده ويروح منه بيحس بالذنب ومبيقدرش يسامح نفسه مهما حصل.. يسرا “لدينا أقوال أخرى”.

– غصب عنك بتقاوم، بتعوم ضد التيار، بتهرب .. عشان لو استسلمت هتشوف حقيقة مش عايز تشوفها بس غصب عنك الموج بيغلبك وبياخدك معاه ، فابتستسلم وبتروح.. مي عزالدين “رسايل”.

– محدش يتخاف عليه اد المظلوم لما يبقى صاحب سطوه .. عبد الرحمن أبو زهرة “كلبش”.

Comments

عاجل