المحتوى الرئيسى

عبد الله غلوش يكتب: غلوشيات رمضانية (7) - E3lam.Org

05/24 07:17

– كلبش .. مبدئيا كده ، أحب أطمن الناس اللي قلقانه على سليم الأنصاري بعد ما اخد كام رصاصة النهارده، ماتقلقوش قناة الحياة مش هاتسمح يحصل له حاجه، الراجل هايقوم بالسلامة وهايكمل باقي المسلسل عادي.

– كلبش .. مفتكرش هيثم ذكي عمل حلقة أفضل من دي قبل كده ومفتكرش أنه هايعمل حلقة أفضل من دي بعد كده.

– دكتور أشرف ذكي .. نقيب بالأنتخاب وممثل بالعافية.

– اختفاء .. بمنتهى الأمانة واحد من أصعب المسلسلات من حيث الكتابة والإخراج.. تحيه للأخوين أيمن وأحمد مدحت.

– في نفس اليوم ، دينا “نسر الصعيد ” قالت لجوزها عايزه اجيب ولد، رفض وقالها احنا مكوناش متفقين على كده قبل الجواز .. نيللي كريم “اختفاء” قالت لجوزها عايزه اجيب ولد، رفض وقالها احنا مكوناش متفقين على كده قبل الجواز.

– رحيم .. والله مشاكل نور في المسلسل هاتنتهي كلها بمجرد ما تطلب من مامتها “سحر رامي ” تقلع الاكستنشن الرخيص اللي حطاه في شعرها ده.

– رياض الخولي طلق رانيا فريد شوقي “سلسال الدم” ومصطفى شعبان طلق ميريهان حسين “أيوب”.

– ممنوع الأقتراب أو التصوير .. أجمل في ما ممنوع المسلسل، انك مهما تفوت منه أكتر من حلقة ولما ترجع تحس أنه مفاتكش أي حاجة.

– بقالي 3 أيام بحاول الاقي حاجة جديدة أتكلم عنها في المسلسل، لغاية ما يسرا النهارده كانت بتكلم حد وقالت له ابعتهالي ع الواتس .. صدمتني الحقيقة.

– فوق السحاب .. تخيل حلقة واحدة في المسلسل تضم مشهد لنهال عنبر وصرصار ماشي على وشها ، مشهد لابنها وهو بيرمي الصرصار من على وشها ، مشهد لابنها وهو بيقتل الصرصار بالشبشب، 4 كلوزات للصرصار وهو ميت ، مشهد لمجموعة من الصراصير في غرفة نوم ابن نهال عنبر ، مشهد لعدد أكبر من الصراصير في مطبخ بيت نهال عنبر، مشهد لمندوب الشركة الألمانية لإبادة الحشرات وهو بيمضي على شهادة ضمان لنهال عنبر ان بيتها هايبقى خالي من الصراصير لمدة سنتين، وبعد كل ده يجي مشهد لهاني سلامة وستيفاني صليبا وهما بياكلوا كرنب.

– فوق السحاب .. رغم القرف من مشاهد الصراصير لكن الحق يقال مشهد المطاردة فوق اخر الحلقة كان معمول حلو وتحديدا لقطة سقوط العربية الجيب من فوق الجبل.

– محمد شرنوبي مات في الحلقة الأولى من “لدينا أقوال أخري” ومات في الحلقة 7 من “أ بوعمر المصري”.

– بالحجم العائلي .. حد يقول للأستاذ يحيى الفخراني، ايه اللي مش عاجبك في اسم عبد الله ، ومن امتى حضرتك بنقول على اسم عبد الله موضة قديمة ولا جديدة عدم الموأخذه؟

– بالحجم العائلي .. راكين سعد .. ندى موسى ..سمر مرسي .. التلاته أحلى من بعض.

– بالحجم العائلي ..حد يقول لـ يسرا اللوزي أن شخصية السكرانة بالطريقة دي قدمت أوي.

– أمر واقع .. شفايف نجلاء بدر وخدود دينا فؤاد بيكبروا كل حلقة عن اللي قبلها.

– طايع .. اكتر حاجة عاجباني في المسلسل ان عمرو يوسف اتعلم من غلطة مسلسله السنة اللي فاتت، وعرف ان فكرة البطل من الجلدة للجلدة متنفعش معاه ومش لايقه عليه.

– طايع .. احمد عبدالله محمود متطور ، متمكن من الشخصية، عامل دوره صح، والأجمل من كل ده انه مش مستعجل على نفسه ومش بيعمل أي أدوار لمجرد أنه يكون موجود وخلاص.

– طايع .. كان ممكن يكون فيلم عظيم زي الجزيرة كده ، لكن مسلسل صعب لأن القصة مش مستحمله 30 حلقة ، بقالنا أكتر من 4 حلقات بندور في نفس الأحداث والمشاهد ، ومفيش أي خطوط جديدة بتظهر تخلينا متفائلين بالحلقات المقبلة.

– سك على أخواتك .. يظل علي ربيع أفضل من قاموا بتقليد شخصية مبارك حتى الان.

– عشان نكون متفقين ، ده أقل مواسم صبري فواز دراميا.

– الوصية .. إسلام إبراهيم واحد من الناس اللي مجرد ظهورهم ع الشاشة يضحكك.

– وفاة فتوح أحمد “قانون عمر” ، ونجاة شيرين رضا من عملية إغتيال “لدينا أقوال أخرى”.

– قانون عمر .. عايز افهم إيه مؤهلات فاطمة الناصر عشان تكون بطلة المسلسل؟

– الارخم من إعلان تورنيدو محمد ثروت ، إعلان تورنيدو محمد سلام.

– اسف يا جماعة كتبت الجملة اللي فاتت ، قبل ما اشوف إعلان we بتاع أحمد عز وكريم عبد العزيز وأحمد عبدالعزيز.

– ظاهرة جديدة في مسلسلات السنة دي .. عشان يزودوا وقت التترات وبالتالي مدة الحلقات، بقوا يكتبوا كرافانات الفنانين مأجرينها من مين.. كويس مقالوش بكام كمان.

– الرحلة .. بدون مبالغة ، انه زمن باسل الخياط.

– أبو عمر المصري .. بجانب ملخص الحلقات السابقة، في بداية حلقة النهارده اتعاد أكتر من 5 دقائق من حلقة إمبارح.

– أبو عمر المصري .. محمد حجازي عضو جديد في رابطة الظابط أبو شنب ، في رمضان 2018.

– نسر الصعيد .. كنت اتمني ان أول عمليات الظابط زين القناوي في الصعيد ، تكون في حاجة أكبر من القبض على حرامي في مولد.

– نسر الصعيد .. طب والله مشاهد الحب اللي كانت بتجمع بين وفاء عامر ومحمد رمضان رغم غرابتها ، بس مكنتش مقززة زي اللي بتجمع بين درة ومحمد رمضان.

– نسر الصعيد .. مفتكرش اني شفت حد اعرفه بعد ما خرج من السينما سأل مراته ايه أكتر حاجه عجبتك في الفيلم ، ومفتكرش اني أعرف واحدة قالت لجوزها بعد ما خرجوا من السينما أكتر حاجه عجبتني في الفيلم هي حب البطل للبطلة ، ومطلقهاش بعدها.

– نسر الصعيد .. مشهد عائشة بن أحمد وهي بتسمع مصطفى كامل، تقريبا تاني حاجة ضحكتني من أول رمضان بعد مشاهد أكشن الأستاذ محمد رياض في رحيم.

– نسر الصعيد .. مكافأة خاصة للي هايعرف الجملة اللي قالتها البنت في المستشفي لمحمد رمضان في أخر حلقة النهاردة.

– مش عارف مين اخترع فكرة ان اسم البطل التاني للمسلسل يتكتب قبل اسم المخرج عشان مايتقمصش؟

– ضد مجهول .. 19860 الرقم السريع الموجود على محل (بيتزا برجر) اللي شغال فيه دياب في المسلسل، هو في الأساس الرقم السريع بتاع بيتزا تيستي بيستي.

– ليالي أوجيني .. شكرا مصممة الأزياء ياسمين القاضي، شكرا مهندس الديكور يحيى علام.

Comments

عاجل