والد قتيل شبرا لوزير الداخلية: «المباحث متقاعسة وعايز حق ابنى»

استغاث خلف والد ضحية شبرا الخيمة، الذي دفع حياته ثمنًا لخلاف مع منافس لمحل والده على سعر بيع الأسماك، بوزير الداخلية اللواء مجدى عبد الغفار واللواء إيهاب خيرت مدير أمن القليوبية، لمحاسبة المتهم بقتل نجله قائلًا: "المباحث متقاعسة وفيه بطء فى البحث وعايز حق ابنى".

قال خلف، إنه على الرغم من مرور ما يقرب من أسبوعين على مقتل نجله فإنه لم يتم القبض على القاتل "محمود. س" وشهرته "بيبو" بعد هروبه هو و3 من أشقائه والمشتركين في المشاجرة، مضيفًا: "محدش مهتم يمسكهم حتى حريمهم اللى كانوا مشتركين في الخناقة المباحث خرجتهم وبيمشوا قدامنا وكأن مفيش حاجة حصلت والشرطة اكتفت بضبط شقيقه المحرض الرئيسي وأمه".

وأوضح: "أحمد ابني الله يرحمه كان معروفا بالطيبة والأخلاق وكنت بجيبه من شغله في الغردقة عشان يقف معايا لما الشغل يكتر وبالذات في المواسم، والمرة دى كلمته وقولتله تعالا عشان رمضان بس مكنتش أعرف إنها المرة الأخيرة اللى هشوفه فيها"، مضيفًا: "مكونتش أعرف إن محمود المتهم هيقتله بدم بارد عشان خلاف على سعر السمك وزبائنا الكتير اللي بيشتروا مننا علشان سمعتنا الكويسة في الشارع والمنطقة".

يذكر أن قسم شرطة شبرا الخيمة ثان تلقى إخطارًا من مستشفى ناصر العام يفيد وصول "أحمد. خ" 30 عامًا جثة هامدة لتعرضه لطعنات نافذة بالبطن وتم التوصل إلى أن مرتكب الواقعة عامل في محل سمك مجاور لمحل المجني عليه ويدعى "محمود. س" بعد نشوب مشاجرة بين الطرفين بسبب الخلاف على ثمن بيع الأسماك، قام على أثرها المتهم بطعن المجني عليه عدة طعنات نافذة بسكين أودت بحياته في الشارع وفر هاربًا.