أحمد شبكة يكتب: ع الأصل دوَّر (2).. الفوازير - E3lam.Org

أول أصل كان دايما شاغلني هو الفوازير، طبعا أنا من جيل الأساطير نيللي و شريهان وفطوطة “سمير غانم”، لكن إيه اللي جاب رمضان للفوازير؟ ومين أول من فكر في ربطهم ببعض؟

نرشح لك: أحمد شبكة يكتب: “ع الأصل دوّر” (1)

وبشوية بحث بسيط عرفت إنها أسطورة تانية تدعى ملكة الإذاعة الست آمال فهمي اللي للأسف ودّعناها منذ أسابيع قليلة رحمة الله عليها. الست آمال صاحبة أشهر برنامج في الكون، وهو برنامج “على الناصية” اللي تجاوز عمره الخمسين عاما، التحقت بالإذاعة المصرية عام ١٩٥١ لكن سنة ستين بقى فكرت تعمل فوازير في رمضان، وكانت الفكرة إنها تجيب نجم مشهور يقرأ صفحة من كتاب، ويكون حل الفزورة -اللي المستمع طبعا يبعته بالبوستة- هو اسم صاحب الصوت، وكانت معلومة طريفة بالنسبالي إن كوكب الشرق السيدة أم كلثوم شاركت في أول فوازير مصرية وقرأت صفحة من كتاب. من المعلوم والموثق إن نجاح فكرة الفوازير كان السبب إن الست آمال فهمي استلمت أكتر من مليون جواب على مدار سنين الفوازير الإذاعية.

نرشح لك: مواعيد 32 مسلسلًا في #رمضان_2018

أما أول فوازير شعرا فكانت السنة اللي بعدها ١٩٦١، وتفتكر مين يا محترم يكتب الفوازير دي؟ طبعا طبعا مولانا بيرم التونسي.

اتنقلت الفوازير بعد نجاحها الساحق طبعا للتليفزيون اللي دايما يسرق من الإذاعة الأفكار الحلوة، وكانت أول فوازير للتليفزيون سنة ١٩٦٧، بثلاثي أضواء المسرح (سمير غانم وجورج سيدهم والضيف أحمد) مع مكتشفهم وأبوهم الروحي المخرج أحمد سالم.

نرشح لك: 13 تصريحًا لـ إبراهيم عيسى.. أبرزها عن براءة مبارك وبن سلمان

كتب الفوازير بعد مولانا بيرم فطاحل العاميّة زي عمنا صلاح جاهين وعمنا سيد حجاب وعبد السلام أمين، واستمرت جيل يسلم جيل لحد ما وصلت للشاعر سالم الشهباني من الجيل الحالي.

نجوم الفوازير طبعا زي ما كلنا عارفين نيللي وشريهان وفطوطة، إنما ما ننساش تجارب على استحياء لفنانين تانين زي يحيى الفخراني وهالة فؤاد وشيرين رضا ومدحت صالح ومحمد الحلو ومحمد هنيدي وأشرف عبد الباقي ونيللي كريم وغيرهم كتير.

هل لسه الفوازير ليها مكان ومستمعين ومشاهدين ولا خلاص كانت موضة وراحت وجت عليها أفكار جديدة و اتبلعت وسط غول الدراما؟

مستني تعليقاتكم ومعلومات تانية عن الفوازير لأني زي ما اتفقنا مش باحث ولا مؤرخ إنما فقط باسلي صيامكم وصيامي معاكم، وبننكش سوا في أصل الحاجات.