الابن البار يساعد والدته فى التنظيف والغسيل: «قلبى وربى راضيين عليك»

فقدوا الأب منذ 8 أشهر، ولا تزال قلوبهم تعتصر ألماً على فراقه، خاصة الأم التى غابت الابتسامة عن وجهها منذ ذلك الحين، ما دفع الابن الأكبر للتفكير فى تقديم هدية لها تسعد قلبها فى بداية شهر رمضان.

«دهان الشقة»، هى الفكرة المبتكرة التى توصل لها محمد فوزى، الشهير بـ«شيكو» ويبلغ من العمر 30 عاماً، لإسعاد والدته، مقرراً استخدام ألوان مختلفة ومبهجة، ودهان الشقة بنفسه ضمن مجموعة من التجديدات.

يحرص «شيكو» طوال الوقت على إرضاء والدته، من خلال مساعدتها فى تنظيف الشقة، أو إعداد الطعام: «أكتر حاجة تهمنى إن ست الكل ترتاح وتحس إن ولادها خايفين عليها، ومش عايزينها تتعب، فبغسل المواعين والهدوم، ولما عرفت إن نفسها تبيّض الشقة، نزلت اشتريت كل حاجة وعملتها بنفسى عشان تفرح».

خلال 4 أيام، قام «شيكو» بدهان جدران حجرتى النوم والمطبخ والحمام، «مجبتش حد يساعدنى. عجنت ودهنت لوحدى، والفرحة اللى كانت فيها خلتنى طول الوقت عايز أعمل أكتر، وشعورى ده وصل ليها وحاست إنى عايز أساعدها».