راندا البحيري تتغزل في سمير غانم: "عمره ما زعل حد"

نشرت الفنانة راندا البحيري، عبر صفحتها الشخصية بموقع "إنستجرام"، الصورة التي انتشرت عبر مواقع التواصل الاجتماعي، أمس، والتي تجمع بين الفنان سمير غانم، والزعيم عادل إمام.

وتغزلت "راندا" في الفنان سمير غانم، قائلة: "الصورة دي عجبتني أوي أوي، فعلا أستاذ سمير غانم الكل بيحبه بشكل رهيب، ومحدش اختلف عليه، بيضحكني بشكل مش طبيعي، أكتر واحد في جيله ملهوش علاقة بأي إشاعات ولا خلافات ولا مصالح".

وتابعت "الراجل ده عايش علشان يتبسط ويستمتع ويضحك اللي حواليه وبس، مشالش هم الدنيا، فالدنيا مشيلتوش هموم، لما حد بيسأله في برنامج عن رأيه في حاجة أو حد، عمره ما بيقول رأيه عشان مبيحبش حد يزعل منه، ومبيقولش إلا كلام كويس عن كل الناس، عشان هو فعلا بيحب كل الناس، ومبينتقدش زملائه ولا بيسخر منهم".

واختتمت كلامها: "بيدي لكل الناس قيمتهم، وبيرحب بأي حد سواء صغير أو كبير، وعن تجربة شخصية هو واحد من أكتر الناس المتواضعة في الدنيا، ومحب للناس فعلا ومحب للحياة، نزلت خرجت معاه وروحنا السينما عادي جدا سنة 2006 كذا مرة، كان بيخرج معايا أنا وإيمي بمنتهى التواضع، بيسلم ويتكلم مع أي حد في الشارع، ويرغي ويفتح مواضيع ويرمي إفيهات طول الوقت، كل اللي حواليه بيحبوه، وأكبر دليل على كلامي، ضحكة أستاذ عادل إمام في الصورة دي، عمري ما شوفتها بالشكل ده قبل كدة".