6 استخدامات للجورنال عند المصريين – بلكونة

قيمة الجرايد دلوقتي قلت، أو بمعنى أصح قيمة المعلومات اللي جوا الجرايد، يعني على ما المعلومات دي تتطبع بتكون وصلتلنا من النت أو التليفزيون أسرع بكتير، بس بردو الجرايد مش هتختفي، ولا احنا هينفع نستغنى عنها، عشان ببساطة بنستخدمها في حاجات تانية اهم بكتير من القراية.

من زمان و من أيام جدي وجدك وورق الجرايد ليه استخدامات كتييير، ومن ضمن الاستخدامات دي هى تدفية الصدر علاج البرد، من زمان وناس كتير جداً بتحط طبقات من ورق الجرايد تحت الهدوم عشان تدفي الجسم وتعرقه فيخرج البرد وميرجعش تاني، وحى بعد وجود الأدوية اللي اتعملت للبرد لسة ناس شايفة إنها مش هتخف من البرد غير لما تدفي صدرها بالجرايد وملهاش في البنادول و ستربسلز ده.

لو أي حد قعد يقنع أمه من هنا للصبح إن ورق الجرايد مضر لما الحبر بتاعه بيختلط بالأكل مش هتقتنع بردو، عشان هي شايفة إن العلاقة بين الجرايد والبطاطس علاقة ابدية مينفعش تتغير، كأن الزيت مش هيتصفى إلا على ورق الجرايد، لأ ومش كدة وبس، أي ست بيت دلوقتي عارفة إيه أحسن نوع جرايد في امتصاص الزيت، يعني الموضوع وصل للخبرة، والعلاقة دي مش ممكن تتقطع بسهولة.

الست الشاطرة هي اللي بتعرف تستغل كل حاجة قدامها، وفنفس الوقت تطلعها بأحسن شكل، وفي الموضوع ده بالذات ييجى دور الإزاز، أي حد ممكن ينضف الإزاز أو يلمعه باي حتة قماشة مثلاً، لكن الست الصح اتعودت إنها تخلي الإزاز يبرق لما تلمعه بورق الجرايد.

وعلى الرغم من إن دي عادة أغلب الستات في البيوت القديمة إلا إنها كانت ظاهرة جدا في البنزينات لما عامل البنزينة يشوفك داخل بالعربية يقوم يجري عليها عشان يلمع البربريز بورق الجرايد اللي بيخلى إزاز العربية بيلمع وبيمتص من عليه بخار المياه اللي بيشبر الإزاز.

لو نفسك هفتك إنك تقطف أي فاكهة من شجرة ولقيتها لسة مستوتش.. مترميهاش، لفها في ورقة جرايد كام يوم وهتلاقيها زي الفل وتستاهل بقك.

وده اللي بيفسر ليه تجار الفاكهة لما بينقلوا طلبياتهم دايماً متغلفة بورق جرايد عشان تفض ل سليمة لحد ما توصل لصاحب نصيبها.

كمان من أهم استخدامات ورق الجرايد هي القراطيس، قراطيس ممكن يتحط فيها أي حاجة، ترمس و سوداني مثلاً، أو قرطاس الطعمية السخن وحاجات تانية كتير. بس المهم إن القرطاس لو متعملش بورق جرايد ميبقاش قرطاس والله.

بعد ما الجرايد تتقري ينفع تترمي؟.. الإجابة لأ طبعاً، الجرايد مش هتترمي إلا في حالة واحدة بس، اللي هي بعد ما تتفرش على السفرة ويتحط عليها الاكل، مهما جبنا مفارش، الأكل ميحلاش غير على ورق الجرايد.