الهجرة غير الشرعية، أختيار ولا إجبار؟ – بلكونة

يا ترى حزلقوم وحش؟ حزلقوم كل اللي كان نفسه فيه يسافر اليونان ويعمل زي الفنان أحمد زكي، بس طموحه الكبير ده راح كله في

الهوا، يا ترى حزلقوم محاولش في مصر؟ طب وميار كان نفسها في ايه؟ كان كل أملهم يعيشوا حياة حلوة بس. طب كل الشباب اللي بتسافر هجرة غير شرعية دي ناس مكسلة تجرب في مصر؟ مكسلين لدرجة انهم يرموا نفسهم في البحر؟

يعني ايه اصلا هجرة غير شرعية

هجرة غير شرعية يعني ان حد يحاول يدخل بلد بشكل غير قانوني، من غير فيزا وحجز أقامة وكمان المفروض لما حد بيدخل بلد بيفضل هناك فترة محددة وبعدها ممكن يجدد أو لأ، اللي بيسافر بشكل غير شرعي كل اللي بيعمله انه بيدخل البلد بس وملوش دعوة لا بإقامة ولا قانون ولا أي قواعد.

من أهم المشاكل اللي ممكن تحصل بسبب الناس اللي بتدخل كده هي مشاكل الإرهاب، حد موجود في البلد من غير ما نعرف، يعني لو عمل اي مشكلة حتى منقدرش نثبتها عليه، مفيش ورق يأكد وجوده أصلاً. وكمان في الأغلب الناس اللي بتهاجر دي بتكون من بلاد العالم التالت، ورايحة أوروبا وأمريكا، يعني بلاد متقدمة، فالصراع الحضاري بيظهر من أول ثانية.

ايه هيخلي حد يحاول يسافر بشكل مرعب كده؟ يدفع فلوس لحد ميعرفوش ويبقى عارف أن في نسبة كبيرة خطر انه يتمسك في البحر ولايغرق، معقولة يحارب العالم كله كده عشان بس يغير عتبة؟ للأسف أغلب الشباب دول بيكونوا حاولوا هنا في كذا مجال، بس ممكن يكون بينحت في الصخر اللي نتيجته ولا حاجة. لما ننحت في حاجة ننحت صح.

للأسف الشباب ممكن يحاول مرة واتنين في الكورسات، ده كله بعد 14 ولا 12 سنة تعليم كمان، والهدف الأهم والمسيطر بيكون الهجرة، كندا حلوة، أستراليا جميلة، يا سلام لو أمريكا، بس أنت عارف الناس دي بتشتغل ازاي؟ الكورسات اللي تحت السلم عندنا دي مبتأكلش عيش.

الواحد بيسافر لأوروبا ولا أمريكا يبقى فاكر نفسه في إسبوعين هيعمل ثروة، بس الموضوع بينتهي بأنه يغسل صحون ولا يمسح عربيات، ده لو وصل اصلاً ومكنش زي الغلبان اللي فضل يقول” بولي كاتا” لأن في الأغلب ده اللي بيحصل، أو بيتمسكوا على الحدود، أو بيتمسكوا جوا البلد وزي ما قولنا عشان مفيش ورق فا بيترحلوا لبلدهم تاني.

مبدأياً أمشي عدل يحتار عدوك فيك، ومعلش أستحمل كلمتي دي، بس هنا أحسن من هناك، على الأقل يومك هتخلصه وتروح بيتك مش خايف البوليس يقبض عليك عشان أنت داخل البلد بشكل غير شرعي. ونوسع الرؤية، نعمل ايه هنا والفلوس قليلة؟ نحاول نبدأ في مكان يعرفنا هنعمل ايه بعد كده، ولما ناخد خبرة صدقني والله هتروح مكان أعلى بكل بساطة.

مش لازم كلنا نكون مهندسين ودكاترة، هنعيش ازاي لو صبي القهوة مش موجود؟ حياتنا هتضلم. وعارفة ان مش كل الناس هتستحمل تضيع كل سنين تعليمها في الهوا كده، بس دلوقتي الشغل مجاله وسع، وممكن بفلوس الهجرة غير الشرعية تجيب عربية وتعمل ساندويتشات نضيفة وتقف في مكان حيوي و هتبيع، الشغلانة دي جايبة كويس دلوقتي مع الناس.

اشمعنا يارب أحنا نتولد في مصر نكح تراب وغيرنا مولود في دول عالم أول أكبر مشاكلهم أن ضوافرهم أتكسرت؟، معلش أنا معاكم هنا في نفس البلد وبصبر نفسي بان “لقد خلقنا الإنسان في كبد” بس بردو كله في ايدنا، لما نشتغل صح على نفسنا هنعرف نطلع برة ويكون عندنا فرصة ان نعيش الحياة اللي مشاكلها الضوافر بس دي، بس بشكل صح.

والناس اللي مش عايزة حد يدخلها بشكل غير شرعي دول لهم أسبابهم. من أكتر البلاد اللي بتعاني من موضوع الهجرة ده هي الولايات المتحدة واللي بيهربوا ليها هم المكسيكين اللي جمبهم، عشان كده دلوقتي بيبنوا الصور اللي بينهم ده. لأن المكسيك كلها فقر وعصابات ده غير المخدرات والسلاح. ونقدر نطبق نفس الصورة دي على أماكن كتير وبلاد كتير.