سكون.. طعم الحياة
في ناس في الحياة وجودهم روح.. وحضورهم بيستدعي روحك..
تواجدهم بصمة.. بصمة ببسمتهم.. بصمة بكلمتهم.. بصمة بإحساسهم.. بصمة في عطاءهم.. بصمة في إخلاصهم..
الناس دي عندها قدره تطلع أحلى ما فيك..
بيعرفوا يستجدوا حاجات من جواك أوي..
حاجات مبتكنش عارفها عن نفسك..هم بيكونوا عارفينها وشايفينها
مجرد تركز معاهم هتعرفهم لوحدك ولو عرفتهم هيعيشوك حالة تروح معاهم بعيد.. بس مش بعيد عنك..هيودوك لأبعد نقطه جواك..نقطة صدق.. نقطة الحقيقة
الناس دي مش بيعيشوا معاك بيعيشوا جواك.. مبيعرفوش يدوا غير كل حاجه حقيقية.. القليل منهم..كتير أوي..
الناس دي هم طعم الدنيا إللي مدقتهوش قبلهم !
أكبر غلطه إنك تفتكرهم ملايكة..
برغم كل ده.. لكن مبيدوش من غير مقابل..مينفعش متدفعش التمن..
لأن التمن إحساس.. ولا كلمه ولا فعل..
حس بيهم هتعرف تقولهم إيه وتعمل إيه..
إنت ممكن يكون صعب تواجه نفسك أو بتبذل مجهود عشان تقنع نفسك بشئ وتصدقه.. هم بقى شايفين إللي إنت مخبيه حتى عن نفسك..
قربك منهم لازم تعمله الف حساب إنك بتتعامل مع روح..كائنات شفافه..ليهم قوانينهم وقواعدهم غير أي قانون بتتعامل بيه مع العوام..
هم مش عوام..هم شئ نادر..
قوة تحملهم عاليه جدًا...صعب ينسحبوا..
لو خدشت روحهم فروحهم عزيزه أوي
والروح العزيزه غير النفس العزيزه
النفس تنسحب لو جرحت كرامتها لكن الروح تنسحب لما تخدش إحساسها !
مستحيل تعرف تحافظ عليهم إلا لو أدركت كل ده.. ساعتها هتعمل كل ده بشكل تلقائي بدون بذل أي مجهود.. وإنت راضي ومستمتع لإنك قصاد ده.. هتشوف معاهم جانب آخر للحياه مش بسهوله تعرفه من غيرهم !
ساعتها هتتنازل عن قوانينك الخاصه بنفسك وتتعامل بقوانين روحك..
ومن هنا بدايه جديده !
تكتشف فيها ذاتك الحقيقيه..تتحرر فيها من قيودك وأفكارك وكل معوق يقف في طريق الإرتقاء بروحك..
لحظات مواجهه حقيقيه صراع داخلي بين عقلك ونفسك وروحك وقلبك..
ولها وقت وهيخلص وهتتفاجئ بإنسان جديد فيه قوه مشفهاش قبل كده..وضوح وفهم لحقائق عن نفسك معرفتهاش قبل كده..
بعد الحاله دي..وقتها بس...صدق نفسك
ده إنت ! ده حقيقتك !
لحظتها هتفهم إيه الحكمه إنك قابلتهم وصادفتهم في حياتك
هتدرك إنك قابلت روحك إنت
قرأت في كتاب (طعام..صلاه..حب ) لإليزابيث جيلبرت الجزء ده
(يعتقد المرء بأن توأم الروح هو الشخص الأنسب له،وهذا ما يريده الجميع.
ولكن توأم الروح الحقيقي ليس سوى مرآة،إنه الشخص الذي يريك كل ما يعيقك،
الشخص الذي يلفت انتباهك إلى نفسك لكي تغيري حياتك،
توأم الروح الحقيقي هو أهم شخص تلتقين به على الأرجح،
لأنه يمزق جدرانك ويهزك بقوة لكي تستفيقي،ولكن ان تعيشي مع توأم روحك إلى الأبد؟
فتوائم الروح يدخلون حياتك فقط ليكشفوا لك طبقة اخرى من ذاتك،ثم يرحلون.
Comments