برج الحوت حظك اليوم الأحد 11/3/2018 ..العصافير مش احسن منك

تعرف على حظك اليوم ل برج الحوت مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

فكك من العواطف والمشاعر والشغل اللي ممنوش اكل عيش وبتدور عليه بس عشان تحسس نفسك انك مهم ف الكوكب زيك زي اي حد وركز ف انك تغني النهاردة وبس.. صوتك لازم يطلع النهاردة ومش بالزعيق ولا الأوامر ولا الشكل والخناق.. صوتك لازم يطلع الليلة بالغنا.. بالغنا وبس

( الشغل والمذاكرة والتخطيط لبكرة ):

شغل كاسيت عربيتك وغني معاه ولو معندكش عربية غني ف اوضتك او ف الهوا او ف اي مكان يعجبك.. المهم صوتك يتسمع بقول حاجة حلوة ومهمة وجميلة ف المطلق.. ومتنساش ان صوتك ممكن ترازي بيه العصافير اللكل كلنا عارفين انها طول الوقت بترغي بس هنموت كلنا ونعرف.. ثم اشمعنا هي اللي بتغني طول الوقت.. العصافير مش احسن منك

( نفسيا وجسمانيا وكل مايخص طاسة المزاج ):

صحيا انتا محتاج تبطل تحضن ف المخدة بالليل ف الضلمة قبل ماتنام وتحلم بحد يفهمك.. فكك.. كفاية انتا تبقى فاهم نفسك وبس

غذائيا النهاردة اليوم مناسب للطواجن والصواني والمحاشي

ضربني وبكى وسبقني ف الهشتكة

بمبي مسخسخ وفيه نقط حمرا

متوافق مع الابراج البسبوسية واللولبية والفهلوية والكتكوتية والمستحية والمائية والهوائية

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..