المحتوى الرئيسى

برج الميزان حظك اليوم الأحد 11/3/2018 .. الصح صعب دايما

03/11 02:47

تعرف على حظك اليوم ل برج الميزان مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

محتاج تسمع الليلة اغنية شريفة فاضل " لما راح الصبر منه" وهتفهم كل حاجة انتا محتاج تفهمها بالنسبة لطريقتك ف إدارة مشاعرك وهتعرف منها برضة قد ايه انتا فكرتك عن نفسك دايما مختلفة عن الحقيقة وكله بإختيارك للأسف بس انتا إتعودت تضحك على نفسك وبس

( الشغل والمذاكرة والتخطيط لبكرة ):

قدامك فرصة النهاردة تتغير للأحسن ودة صعب بس دايما الصح صعب.. او ببساطة تستسلم لأفكارك السيئة وتتضايق ودة هيبقى إستسهال خلي بالك

( نفسيا وجسمانيا وكل مايخص طاسة المزاج ):

صحتك النهاردة محتاجة منك تنقع رجليك ف طبق بلاستك مليان مية سخنة وشاور چيل ريحته حلوة ومنعشة.. متستغربش ياخويا.. معروف علميا بالنسبة للعلم الحديث ان صحة الانسان تبدأ من صوابع رجليه والحتت اللي مابينهم اللي لما بتفعض بيها ف المية السخنة ام شاور چيل أكيد بتعمل فقاقيع.. دي حاجة معروفة انتا ازاي مش عارفها

غذائيا النهاردة يحبذ تتجه لرواية رومانسية او تاريخية حلوة وتفكك من الاكل النهاردة الا نقنقة كدة ف الخفيف وخلاص.. ريح معدتك حبة دة خلاط الاسمنت بيريح حبة ف نص الشغل ياجدع

مره واحد حب واحدة محبتوش فات الآوان وجت تحبه ملقتوش..

متوافق مع الابراج الدرامية والبحرية والبرميلية والسمكمكية والنيلية والفضية والبربئية والفرفورية والمائية والنارية والهوائية..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

أهم أخبار متابعات

Comments

عاجل