مدربة «كيك بوكسينج»: لا داعي للخوف من الرياضة وبها تقدري تحمي نفسك

«أنا بلعب جيم من وأنا في الجامعة بس على خفيف كده، وكانت حركتي كتير أوي في الجامعة، لأن الكلية كانت عملية وكان دايمًا عندنا أبحاث بنعملها، وبالتالي بتحرك كتير، وبعد الجامعة بدأت أروح مع أصحابي النادي، لأني بحب الحاجات اللي فيها دفاع عن النفس، خاصة إن المجتمع المصري بيحب التحرش، يعني مثلًا لما أروح مشوار في المترو وألاقي بنت غلبانة جدًا وجنبها ولد ومضايقها وهي ساكتة بيبقي نفسي اقولها «اضربيه»، فبدأت أتضايق، وبعد فترة اشتغلت في مرسيدس، وبقيت أروح الجيم كعضوة عادية من يجي 5 أو 6 سنين، كان وزني حوالي 85 كيلو، وكنت جايه أخس، وأحضر ورش لغاية ما لقيت بقي كورسات بوكسينج».. لهذا احترفت داليا العمري رياضة الكيك بوكسينج.

درست «داليا» علم النفس، ولم يمنعها ذلك من الذهاب إلى «الجيم» مع صديقاتها، وترى أنه من خلال رياضتها المفضلة يُمكنها تغيير حياة الآخرين، وهي تعمل حاليًا في دولة الكويت كمدربة كيك بوكسينج.

وعن الفوائد التي تحققها تلك الرياضة للسيدات، تقول داليا لـ«الدستور»: فقدان الوزن وحرق ما يقل عن ٥٠٠:٦٠٠ سعر حراري في الساعة خلال التمرين، تحقق توافق عضلي عصبي للجسم وتُعلم السيدات رد الفعل السريع، تساعد على تخفيف التوتر والتخلص من الغضب والإحباط من خلال الركلات والضربات مما يساهم في التخلص من الطاقة السلبية من الجسم، ارتفاع هرمون السعادة، تنسيق وشد الجسم ونحته بشكل جميل، يؤهل السيدات للدفاع عن النفس ضد أي خطر محتمل في حالة تعرضها له أثناء تواجدها في أي مكان وحدها.

وردًا على مخاوف السيدات والفتيات من ممارسة «الكيك بوكسينج» بسبب احتمالة ظهور علامات الرجولة بأجسادهن، توضح «داليا»: «لا داعي للخوف من الرياضة نهائيًا، خاصة من قبل السيدات والفتيات اللاتي يخشين من تحولهم إلى رجال بفعل الرياضة، بالعكس إنك تكوني أنثى قوية وبميت راجل، هتقدري تحمي نفسك، دي حاجة تكملك مش تعيبك».. كانت تلك هي رسالتها لهن.

انتقلت مدربة الكيك بوكسينج حاليًا للعمل في دولة الكويت، وتروي عن تلك التجربة قائلة: شغلي في الكويت أكتر شوية من شغلي في مصر، لأني بشتغل مع أجانب، والدراسة هنا أكتر، والخبرة اللي باخدها عالمية من خلال تعاملاتي مع ناس من جنسيات مختلفة، وفي مجال تعليم أوسع، ووجودي هنا يخليني أقدر أدخل مسابقات أكتر.

وفي سعادة تذكر داليا: هنا توجد نوادي كاملة لرياضة «الكيك بوكسينج»، خاصة بالفتيات والسيدات يمارسونها بشكل احترافي، وتضيف: عند عودتي للقاهرة خلال إجازتي، ستكون هناك مفاجأة كبرى ومختلفة في عالم الرياضة، أتمنى أن تصبح إضافة جديدة لمصر.