خالد دياب يشيد بأداء مصطفى خاطر في "طلق صناعي"

أشاد المخرج خالد دياب بأداء الفنان مصطفى خاطر، في فيلم "طلق صناعي"، الذي شارك في الدورة الماضية من مهرجان دبي السينمائي، قائلا: "كان نفسي جدا يبقو معانا في مهرجان دبي عشان يفرح بفيلمه، لكن ملحوقه في العرض الخاص في مصر".

وقال دياب، عبر حسابه على "فيس بوك": "مصطفى خاطر نجم من نجوم مسرح مصر أول لما اشتغلنا في طلق صناعي كان بيجيلي في اليوم بـ70 إيفيه بيضحكوني كلهم موت، ثم أقوله مش هانحط ولا إيفيه في الفيلم فكان هايتشل مني وشبه قفشنا لغاية ما قعدنا و قولتله إني بحب الضحك زي عنيه بس لازم يكون الضحك طالع من شخصيتك في الفيلم (دكتور سعيد)، أي كوميديان هايقولك هو أيش فهمه ده في الضحك ده انا بطلع على المسرح اعطس الناس بتضحك، بالإضافة إلى أن تغير طريقة الضحك دي ممكن تاخد سنين".

وتابع: "لكن مصطفى جالي تاني يوم لابس شخصيته في الفيلم، وقالي في المشهد اللي جاي دكتور سعيد هايبقي مرعوب فمنطقي يقول كذا وقال إيفيه سافل وقعني من الضحك قولتله شوط يا معلم، واتصور المشهد بالإيفيه واتحط الإيفيه في التريلر ومن يومها بأه ييجي بـ89877 إيفيه في اليوم طالعين في شخصية "دكتور سعيد"، وبحطهم كلهم في الفيلم ولو في مشهد مفيهوش خاطر، اقولهم عايز خاطر ونألف علي الهوا موقف لدكتور سعيد ممكن تبقي كلمة أو حركة أو ريأكشن بس يموت من الضحك ومن يومها بقينا سمن علي عسل".

يذكر أن أحداث الفيلم تدور حول زوجين يلجأن إلى خطة مذهلة. بعدما خابت جميع محاولاتهما بالحصول على التأشيرة وأصبحا على وشك استقبال مولوديهما في أي لحظة، إذ يقرّران دخول السفارة الأمريكية في القاهرة عنوةً، لتضع السيّدة مولوديها داخل المبنى، ما سيعني بطبيعة الحال حصول الوليدين على الجنسية الأمريكية.