برج الدلو حظك اليوم الثلاثاء 5/12/2017 ..من حقك تقول لأ

تعرف على حظك اليوم لبرج الدلو مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

فكك من اي حاجة النهاردة وخليك طيب وحنين وبس..الحياة محتاجة دة منك وانتا محتاج دة برضة من الحياة وبشكل كبير وانتا عارف كدة كويس..

( الشغل والمذاكرة والتخطيط لبكرة ):

للأسف الطيبة والحنية مبيأكلوش عيش خصوصا ف وسط الصراعات الرأسمالية اللي مالية كل حتة ف الكوكب حواليك النهاردة وبالتالي هيبقى خطر تتعامل مع المواقف العملية بطيبة او بحنية او بقلبك..

( نفسيا وجسمانيا وكل مايخص طاسة المزاج ):

صحتك محتاجة تفصل ف الخناقة اللي دايرة مابين قلبك ومابين عقلك بشكل عادل وسريع النهاردة ياريت..قلبك عاوز يبقى طيب وحنين وعقلك مش عاجبه الكلام دة خالص ورافض..شوف هتتصرف ازاي بقى..

اي اكل النهاردة جنبه شوية بطاطس محمرة هيبقى ماشي حاله..انتا مبتعترضش على اي اكل متاح وبتتعامل مع الاكل باعتباره نعمة وبتقدرها وخلاص..طيب..على فكرة من حقك تاكل كل اللي ف نفسك ومترضيش حد الا نفسك ف الجزئية دي..كفاية ظلم لرغباتك بقى..كفاية..

ف أول الكلام وعشان كل حاجة تبقى تمام.. عبّر الناس الأول بسلام..

متوافق مع الابراج الدخانية واللولبية والهوائية..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..