برج الدلو حظك اليوم الاثنين 4/12/2017 .. سيبك انتا الكبير كبير برضة

تعرف على حظك اليوم لبرج الدلو مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

حاول تتعالى على الاشتباك مع صغائر الحياة النهاردة وركز ف الحاجات الكبيرة اللي تستاهل إهتمامك وتركيزك وبس..دة مقامك ودي قيمتك..

( الشغل والمذاكرة والتخطيط لبكرة ):

مهما يحاولوا يقللوا منك او يضايقوك او يقنعوك انك عادي متهتمش ولا تشغل بالك اصلا..سيبك انتا..الكبير كبير برضة مهما حصل ومسير الايام تثبت الكلام دة من غير خناق او صدام او حتى مجهود خاص منك..

( نفسيا وجسمانيا وكل مايخص طاسة المزاج ):

طول مانتا مهتم بصحتك طول ما مناعتك هتشتغل معاك وتساعدك وتصقفلك كمان وتشجعك وتقف جنبك..أهم حاجة تبعد عن النكد والزعل واي حاجة ممكن تسببلك اي قلق من اي نوع..ابعد وخليك ف حالك ومع نفسك احسن واروق وانضف..

غذائيا النهاردة تقدر تخش ف الرز والمكرونة طالما معاهم خضار..بلاش لحوم حمرا وركز ف البيضا ان امكن وياريت تبتدي تاكل كرنب احمر وبروكلي وكيمشي كوري من النهاردة..

ف أول الكلام وعشان كل حاجة تبقى تمام.. عبّر الناس الأول بسلام..

متوافق مع الابراج الدخانية والكتكوتية والنارية..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..