برج القوس حظك اليوم الخميس 30/11/2017 ..نفسيتك محتاجة دلع كتير

تعرف على حظك اليوم ل برج القوس مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

صعب تفهم اللي بتحبهم انك بتحتاج دلع بسيط اوقات كتير جدا ومينفعش تطلبه..صعب تروح لحد وتقوله "دلعني" دة طبيعي..ثم انه بيفسد الحالة التلقائية وبينهي مفاجأة الدلع ف حد ذاتها..مهم يدركوا ان الدلع البسيط دة بيحسن النفسية وبيرفع سقف الأمل حتى لو كان وهمي..

( الشغل والمذاكرة والتخطيط لبكرة ):

الحل الوحيد قدامك النهاردة هو انك تعترف انك بتحب اللي بتحبهم وتقولهم..مفيش قدامك غير كدة خلاص..

( نفسيا وجسمانيا وكل مايخص طاسة المزاج ):

اهدى حبة ف التدخين وف العك ف الاكل بالليل وانتا تبقى زي الفل..كمان خد بالك انك بتخوف نفسك من حاجات كتير مش حقيقية وملهاش اي اساس من الصحة..مثلا الصداع اللي بتعاني منه دة ممكن يكون سببه تافه وبسيط زي العطش مثلا او النكد..مش لازم يبقى سببه متوحش ومجهول وغامض زي مانتا فاكر لأنه مفيش كائن فضائي ممكن يحطك ف دماغه لدرجة انه يسيب الكوكب كله ويركز مع دماغك انتا بس عشان يسببلها صداع..مش معقول طبعا..الا لو انتا اللي مقدرلك تنقذ كوكب الارض ف حالة حدوث اي غزو فضائي من خارج كوكب الارض..ساعتها يبقى معاك حق ويبقوا هما مستقصدينك عشان خايفين منك مثلا ولا حاجة..بس برضة لو الكلام دة حقيقي يبقى سبب ادعى لإنك تهتم بنفسك وبصحتك اكتر من كدة بمراحل عشان تبقى مستعد وجاهز لإنقاذ الارض من اي غزو..سلامتك وسلامتنا كلنا من الغزو..

واضح انك هترجع للدايت بعد الشتا مايخلص عشان تظبط وتسمكر الخبطات اللي اتسبب فيها الاكل سواء ف الشاسيه او ف الكوروسليه..ف الحالتين متقلقش لأن العلم اتقدم وكل حاجة بقت قابلة لانها تتصلح..النهاردة تقدر تركز ف الخضار وف الطواجن وخصوصا طاجن البصل باللحمة وطاجن لسان العصفور باللحمة او بالفراخ..الاتنين ماشي حالهم..

ياحلوللي ياحلوللي دة إيه اللي بيحصلي..أنا كل يوم بكبر..بكبر سنتي وملي..(من اوبريت الكتكوت الاخضر)..

متوافق مع الابراج الكستبانية والكهربائية والبرمائية..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..