يسرا الهواري تدافع عن اتهامها بطلب التبرع لإنتاج ألبومها الجديد

نشرت المغنية الشابة يسرا الهواري عبر حسابها بموقع Facebook منشورا طويلا للدفاع عن نفسها بعدما اتهمها شخص بطلب التبرع بدلا من العمل لجمع الأموال اللازمة لإنتاج ألبومها على الجديد على نفقتها من خلال إحياء الحفلات.

وكتبت يسرا: ": ردا على (لما ممكن يشتغل ويعمل فلوس من الحفلات): يمكن عشان انت معندكش خبرة ومعرفة بالموضوع. بس هو الحقيقة إن الموضوع مش سهل زي ما انت متخيل. حتى الآن ومن ساعة ما بدأت أنا ماكسبتش من أي حفلة عملتها في مصر. الحفلة يا إما يادوبك بتغطي مصاريفها أو بنصرف عليها كتير. زي ما وضحت أنا بحاول الأيام دي أنظم حفلة إطلاق الألبوم. وحرصاً مني وإقتناعاً إن الحفلة يفضل سعرها مناسب ما بين ٥٠ و ٧٠ جنيه .. هاخسر تقريباً ٢٠ الف جنيه لو التذاكر كلها اتباعت".

وأضافت: "ثاني نقطة: (أو يسجله في البيت بإمكانيات بسيطة): ده يمكن رأيك. بس ليه؟ جزء كبير من جودة العمل الفني ليه علاقة بالتفاصيل والوقت والمجهود والإمكانيات اللي خلت العمل ده يحصل في الآخر. أنا عموماً أحب أتقن الشيء اللي هاعمله "على قد ما أقدر" وفي الآخر ده أظن مايزعلش حد في حاجة. الألبوم عمل مكتمل قايم على الكلام واللحن والصوت والشخصية أكيد. بس كمان الميكساج و الماسترينج و طريقة التسجيل وكم المحاولات اللي اتعملت في التوزيع. والتجارب والاختيارات والشك في الختيارات دي و إعادة المحاولة .. كل حاجة ممكن تتعمل بكذا طريقة.. وكل واحد حر يقرر هو عايز يعمل منتج عامل ازاي".

واستكملت: "تالت نقطة:(مش فاهم ليه فنان يطلب من الناس تتبرعله): هو اللي حصل ده ماسموش تبرُع ولكن اسمه تمويل جماعي، وهو مافيهوش إجبار حد على حاجة، الناس اللي انتجت الألبوم دي كلها مقتنعة بالكلام اللي قلته في النقطتين السابقتين وبالتالي حبوا يكون ليهم دور فعّال في طريقة إنتاج الفن في مصر عن طريق إنهم يشتروا المنتج قبل ما يطلع أو يساهموا بشكل أكبر لو عايزين. كل الشكر ليهم والتقدير على ثقتهم فينا و في المنتج اللي هانقدمه

واختتمت كاتبة: "وأخيرا الألبوم لسة مانزلش وهاينزل يوم ٧ ديسمبر - وده إعلان بالمرة