المحتوى الرئيسى

برج القوس حظك اليوم الاثنين 13/11/2017 ..عادي لما تبقى مجنون

11/13 04:51

تعرف على حظك اليوم ل برج القوس مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

متخيل ان محدش يعرف انتا بتعمل ايه من تحت لتحت ومعاك حق..مش اي حد فعلا يقدر ياخد باله..بس في ناس تقدر..خلي بالك من الناس دي عشان كاشفاك بزيادة ومتقدرش تضحك عليهم لفترات طويلة..خلي بالك..

وفيها ايه لما يقولوا عليك مجنون او طايش..اسم الله على عقلهم اوي..

( الشغل والمذاكرة والتخطيط لبكرة ):

اجتهادك ف الحياة لازم يقابل بمكافأة عاجلة من الحياة ف شكل اكل او خروج او حفلة..اللي يعجبك..

( نفسيا وجسمانيا وكل مايخص طاسة المزاج ):

صحتك كويسة بس انتا بتضيعها ف الفاضي دايما وبتهمل فيها بقالك حبة..خد بالك عشان هتدفع تمن الاهمال دة عن اول دور برد يخش بميكروباته..

الرز والمكرونة والفراخ زي امبارح لسة حواليك..بس ممكن النهاردة تغير وتضرب مسقعة او كوسة بالبشاميل..هتنبسط..

ياحلوللي ياحلوللي دة إيه اللي بيحصلي..أنا كل يوم بكبر..بكبر سنتي وملي..(من اوبريت الكتكوت الاخضر)..

متوافق مع الابراج النارية والزقطوطية والبرمائية..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

أهم أخبار متابعات

Comments

عاجل