برج الدلو حظك اليوم الجمعة 10/11/2017 ..متآذيش حد..إوعى

تعرف على حظك اليوم لبرج الدلو مع الكاتب عبدالله أحمد وتأكد إنك سواء عجبك الكلام المكتوب هنا في برجك أو لأ ف انتا تقدر تصنع حظك اليوم بإيديك سواء اليوم أو كل يوم

( الكراش والإكس والبوي والجيرل فريند والجوز والزوجة والقرايب ):

بدأت تتخنق بجد وتخش ف المود الخطر المؤذي..طيب خد بالك ان شرك مختلف عن شر الآخرين ومدمر بجد خصوصا وانك مبتتحركش ف الاتجاه دة الا لما تبقى فعلا جايب أخرك وساعتها طبيعي تلوش اللي قدامك ايا كان ودة ممكن يتسبب ف خساير ضخمة هتندم عليها بعدين خصوصا وانك مش متعود لا على الآذى ولا على الشر..خد بالك ومتبقاش زيهم..بلاش..وإفتكر كويس اني قولتلك بلاش..

( الشغل والمذاكرة والتخطيط لبكرة ):

مهما بدا الامر مغري ياريت متنجذبش لصراعات مع اي حد..لا مقامك ولا حتتك ف الحياة دي خالص..ثم ان شرك مش طبيعي ولو اتفتحت ف السكة دي ممكن تعجبك وتكمل فيها وساعتها مفيش رجوع..خليك طيب ولطيف ونايس أحسن معلش عشان خاطر الانسانية..

( نفسيا وجسمانيا وكل مايخص طاسة المزاج ):

صحتك كويسة بس ناقصها شوية اهتمام خصوصا فيما يخص السباكة..غير كدة كل حاجة تمام..غذائيا خليك بسيط النهاردة ف الاكل ولو حبيت تعك ممكن تعمل مركونة بصلصة..مهم بس تنقي كيس مكرونة يكون شكله لطيف ومبتكر..بلاش المكرونة الاسباجيتي او المقصوصة او الصغننة خالص دي..دور على شكل جديد ياريت..ومتنساش الفاكهة برضة لزوم النقنقة..

متوافق مع الابراج الخيالية زي إمبارح وأول إمبارح وأول اول إمبارح..

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..