بمناسبة يوم البنات العالمي- قصص سيدات أثروا في التاريخ - سوبر راجل

Nermein Qenawy ‏49 دقيقة مضت BuzzRamet اضف تعليق 8 زيارة

بمناسبة يوم البنات العالمي هنحتفل معاكوا باليوم ده على طريقة سوبر راجل.

“ناتاليا تروخينا” أقوى ست في العالم و هي روسية الجنسية و بدأت في رفع الأثقال من و هي 14 سنة و كان وزنها 40 كيلو ساعتها و بعد 4 سنين من التدريب كسبت ناتاليا “لقب بطلة إقليم بايكال” مرتين لما كانت في سن ال 18، ودلوقتي بقت بطلة العالم و سيدة الرياضة الأولى.

و نصيحة ناتاليا للستات إنهم يلعبوا رياضة و مايخافوش من تغيير العضلات لأنوثتهم.

“ماري كوري” هي أول ست تكسب جايزة نوبل و كانت في الفيزياء، هي بولندية و كسبت الجايزة مع زوجها “بيير كوري” و “هنري بيكريل” سنة 1903 تقديرا بأبحاثهم المشتركة حول ظاهرة الإشعاع اللي اكتشفها البروفيسور “هنري بيكيريل”

و ماري هي الست الوحيدة اللي تفوز بالجايزة مرتين و ده لإنها حصلت على جايزة نوبل في الكيمياء سنة 1911 لاكتشافها عنصرين الراديوم والبولونيوم.

و المبهر أكتر إنها أول واحدة و بنتها يكسبوا جايزة نوبل و ده لما بنتها “إيرين جوليو كوري” كسبت جايزة نوبل في الكيمياء سنة 1935 لإنها كونت عناصر مشعة جديدة و كانت الجايزة بالتناصف مع زوجها “فريدريك جوليو كوري”.

“بيرتا بينز” زوجة “كارل بينز” مخترع أول عربية تمشي بحرق البنزين و مؤسس شركة مرسيدس بينز، دخلت موسوعة جينيس و ده لما ساقت العربية اللي اخترعها زوجها من غير ماتقوله و ده لإنه كان مخبي اختراعه لإن الناس كانوا بيعتقدوا إن أي عربية من غير مايجرها خيول تكون مشعوذة

و العربية اشتهرت لما بيرتا ساقت العربية في 5 أغسطس 1888 و معاها ابنها و بنتها وقت الفجر من مدينة Mannheim ل Pforzheim اللي بتبعد 106 كيلو عنها و لما رجعت البيت اكتشفت إن العربية اشتهرت لما الناس شافوها بتسوقها و افتكروها شيطان أو عفريت.

و دول كانوا شوية من الستات المعروفين في التاريخ و اللي أثروا فيه.. كل سنة البنات طيبين!

تعرف على فريتيوف نانسين الذي تحتفل به جوجل