نجوم ستار أكاديمي في ضيافة نجم الجيل: قصة سعيدة وذكرى كوميدية مع أجدع إنسان

«عيد ميلاد تامر حسني السنة اللي فاتت، كان عندنا معاد عنده في البيت عشان نتدرب على أغنية عمري ابتدا اللي هنغنيها معاه في حفل مارينا، المعاد الساعة سبعة، ووصلنا الساعة تسعة، بس القدر كان بيحاربنا هو وكوبري أكتوبر والدائري في نفس اللحظة، لأن كلنا متحركين من خمسة أساسا».

وأضاف «وإحنا في الطريق حالة من التوتر والقلق والكسوف من تامر، وييجي تسعميت مكالمة في الدقيقة ما بينا، لأننا كنا مقسمين أربع عربيات، بدأ الليل يدخل وإحنا لسه في الزحمة، ومع دخول الليل بيدخل معاه العرق والكسوف وجمل كتير ما بين بقي يا دي النيلة، وشكلنا وحش قدام تامر، وإيه الفضايح دي، وبدأنا نتهم بعض إن أنت اللي أخرتنا لأ أنت لا أنتي، لغاية لما جت لنا فكرة فظيعة خطيرة شنيعة، وإذ به تامر كان عيد ميلاده من كام يوم فقررنا كلنا نجيب تورت، وجبنا فعلا ييجي عشرين تورتة، بين قوسين كان حد مننا وصل بدري عند بيت تامر وكان شاري تورتة بالمانجا ومستنينا ندخل كلنا».

وتابع «اتقابلنا كلنا فعلا، الجو بدأ يسقع بس طبعا بالنسبالنا إحنا بس لأن كنا في أغسطس أساسا بس خايفين من لحظة المواجهة، صحابي باعوني وشيلت أنا التورت وخلوني أنا اللي أخبط، الليل دخل وصوت البرق والرعد وبكا الأطفال والصواريخ وموسيقى المال والبنون في وداني، تامر فتح بنفسه طلع والغضب في عينيه وبص وقالنا دي مواعيد يا جيل بايظ، قلت له اللي أخرنا بنجيلك التورت عشان عيد ميلادك، فهم إننا ثبتناه فابتسم وسلم علينا وحضنا وضحكنا وعم السلام على أورشليم».

وأوضح «اتدربنا شوية على الأغنية وبدأت الأطباق والشوك عشان نقطع التورتة، طبعا مش هنقطع التورت الكتير كلها في نفس اللحظة تامر اختار تورتة عشوائي فتحناها لاقيناها التورته اللي بالمانجا اللي حكتلكم عليها، وأتاري اللي جابها وقف مستنينا كتير فالمانجا نفسها حمضت واتفضحنا قدام تامر، المهم برضه فتحتنا تورت تانية وقطعناها وأكلنا وتحدثنا وضحكنا وبعدها أخدنا الفيديو اللي قدامكم، قصة طويلة سعيدة عن أجدع وأطيب إنسان اسمه تامر حسني وعن أذكى وأنجح فنان يستاهل كل خير ودايما مشرف بلده وكل اللي بيحبه، كل سنة وأنت طيب يا معلم تيمو».

هذا الفيديو قد يعجبك ايضاً: