حكايتي أنا وزوجتي و"جيل تايلور"

في بدايتي مع النزيف المخ كانت مراتي بتحكيلي عن دكتورة اسمها "جيل تايلور" Jill Bolte Taylor، جالها نفس اللي جالي، وفجأة، بس هي كانت دكتورة تخصصها المخ والأعصاب، وقالت "أنا جالي نزيف المخ واااااو كول"، دي فرصة للدراسة وهتبقى فرصة ممتعة".. مراتي أهي بتخلي أي حاجة تحفزني.

وكعادة الغرب ساعة ما يصحوا الصبح، أهم حاجه عندهم هي التمارين، كان عندها مشاية بالكهرباء، وفجأة حست إن إيديها متحجرة، وبسرعة قامت تتصل بالمستشفى اللي هي شغالة فيها، كانت بتجيب الأرقام بالشبه، قعدت ربع ساعة على ما كتبته صح، وإذ بزميلها في الشغل بيرد، كان صوته أشبه بالكلب.. (هو ده اللي حصل معايا بس مع اختلاف).

أنا مختلف معاها في ترتيب الأحداث، يعني أنا اتمنع عني الكلام في الأول.. نرجع لمرجوعنا، هي مكانتش فاهمة صوت زميلها، راحت قايلة له "أنا جيل.. عندي نزيف في المخ" وراحت في غيبوبة،لما فاقت بقي كانت حاسة بإيه؟ قالت "إني كنت في الجنة، (وده برضه اللي حصل معايا)

الدكتوره كان عمرها كام؟ 26 سنة، ودلوقتي تقريبا 60 سنة، هي تعافت تماما بعدها بـ 8 سنين.