علاء الدين.. فيلم مش لاقي ممثلين

من حوالي 3 سنين ديزني طلعت موضة في السينما هي أن أفلام ديزني الكارتون تتحول لأفلام حقيقة 3D لكن في فيلم واحد قدامه مشاكل كتير وهو فيلم علاء الدين.

أكبر مشكلة في الفيلم هي ان فريق الانتاج مش لاقي ممثلين كتير من اصول عربية او حتى هندية عشان ادوار البطولة او حتى الادوار الثانوية.

ومفيش أسماء ممثلين انكشف عنها غير ويل سميث عشان يعمل دور "الجني".. دة معناه إن حتى دور البطل علاء الدين مفيش ممثلين له لحد دلوقتي.

المخرج جاي ريتشي مصمم إنه يلاقي ممثلين مش مشهورين ولسه جداد.. ودة مش معناه انه مفيش اختبارات للممثلين لأن موقع "هوليوود ريبورتر" قال إنه في أكتر من 2000 واحد من أصول شرقية اتقدموا للاختبارات لكن بحسب تسريبات ديزني .. العملية كانت فوضى ومفيش حد مقنع للأدوار بتاعة علاء الدين وياسمين وجعفر.

ديزني من ناحية تانية بتفكر كحل أخير ان هي اللي تختار الممثلين الأساسيين وطبعا اول اسم خطر كان "ريز أحمد" اللي عمل دور "بودي" في Rogue One ودة طبعا لأنه ممثل ومغني في نفس الوقت يعني مش هيحتاج تدريب لما يأدي أغاني الفيلم.

الاسم التاني المطروح هو "ديف باتيل" حتى لو مكنش بيعرف يغني فهو على الاقل اسم معروف.. سبب تاني اللي يخلي ديزني تحاول تتدخل هو أنهم مش عايزين يضيعو وقت ويل سميث اللي شكله هيبقى اكبر اسم في الفيلم.

طيب ليه في مشكلة في الادوار؟

السبب في كدة هو موجة ضربت هوليوود كلها والخلاصة فيها هي إنه مينفعش تختار ممثل أبيض يعمل دور عربي أو أسيوي أو افريقي أو لاتيني أو أو أو عشان محدش يتهمك بالعنصرية، وكفاية الهجوم اللي حصل على فيلم The Great Wall عشان البطل مات ديمون أبيض.

أو اللي حصل مع سكارليت جوهانسون لما تم اختيارها لبطولة فيلم Ghost In The Shell واللي عملت فيه دور شخصية أسيوية.. ودة موضوع خطر لدرجة انه وقع الفيلم في البوكس اوفيس رغم ان اليابانيين نفسهم كانو شايفين انه مفيش مشكلة.