عبد الله غلوش يكتب: غلوشيات رمضانية (22) - E3lam.Org

شاركها Facebook Twitter Google +

– الأسوأ من اعلان تورنيدو بصوت أحمد داوود ، اعلان تورنيدو بصوت علا رشدي.

– حامد عايز يعمل تحليل نسب لبنت أحمد داوود “هذا المساء” ، ورانيا سيد عايزه تعمل تحليل نسب للجنين اللي في بطنها من ظافر العابدين “حلاوة الدنيا”.

– ماشاء الله حملة أحمد فهمي نجحت لدرجة ان عدد المطبلاتية والمقللاتيه زادوا الأسبوع اللي فات ده علي الفيسبوك وتويتر.

– هذا المساء .. لغاية امبارح كان بيقول اللي موبايله يبوظ يرميه بدل ما يصلحه، ومن النهارده بيقول لو مراتك بطلت تحبك اتجوز عليها، هاترجع تحبك مرة تانية وهاترقص لك كمان.

– أسماء أبو اليزيد اتخطبت لمحمد فراج “هذا المساء”، وبنت يسرا وافقت تتخطب لابن منى عبدالغني “الحساب يجمع” ، وأحمد حاتم راح يتقدم رسمي لسلمي أبوضيف “حلاوة الدنيا”.

– في الـ لالا لاند .. كلامكم ده مهزش شعرايه في باروكتي الجديدة .. اول اعتراف علني لسمير غانم في الدراما انه بيلبس باروكة.

– هربانة منها .. اعرف لما يبقوا عايزين يعملوا مكياج لجرح في مسلسل يحطوا ميكروكروم ، كاتشب، لما يغلبوا خالص ممكن يحطوا روج .. لكن شريط لحام، جديدة دي.

– المنافسة بين المسلسلات علي لقب رقم 1 علي اليوتيوب، اسخن من صراع الهبوط في جدول الدوري.

– انا عندي ادفع ضريبة القيمة المضافة اهون من اني اتفرج علي اعلانات حمدي الميرغني.

– لا تطفئ الشمس .. محمود الليثي “دكتور سعد” لا يقل موهبة عن أحمد مالك ولا محمد ممدوح ، بس مش أمور ومالوش في البروباجندا والمعجبات.

– حلاوة الدنيا .. يعني هند صبري مكنتش بتسيب ظافر العابدين لحظة وهما مخطوبين ، تاني يوم الفرح تسيبه يروح للدكتور عادي كده لوحده؟

– حلاوة الدنيا .. لو رانيا سيد هتاخد فلوس وتنزل الجنين من غير ما تعمل مشاكل، يبقي ايه لازمة حشر القصة دي في الأحداث من الأساس.

– حلاوة الدنيا .. فيه 10 دقايق من حلقة النهارده قناة mbc دراما عادتهم مرتين.

– حلاوة الدنيا .. رجاء الجداوي وهي بترد علي مكالمة مصطفى فهمي مسخرة.

– الزيبق .. حلقة حلوة و3 ممله.

– وضع أمني .. حلقة حلوة و5 ممله.

– واحة الغروب .. مشهد حلو و10 حلقات ممله.

– طاقة نور ، الحرام ، الحرباية .. من كتر الملل بطلت اتفرج عليهم أصلا.

– الحصان الأسود .. عودة الـ PUZZEL من جديد.

– الحصان الأسود .. أفضل حلقة تعملها ياسمين صبري من يوم ما بدأت تمثل.

– هروب اضطراري .. أغنية mtm واحدة من أجمل أغاني الأفلام اللي اتعملت الفترة اللي فاتت.

– الاعلانات اهم من اذاعة اذان الفجر على قناة القاهرة والناس.

– محمد عبدالرحمن أخف دم بين نجوم “لمعي القط”.

– من حلاوة الطحينة مع الاكل مبقاش في أكل بيفضل للقطط .. ده الكتالوج بتاع شرح اعلان طحينة البوادي عشان اللي لسه مش فاهمه.

– بعد حشيش هند صبري وايمان العاصي ودينا ، غادة عبد الرازق بدأت تشد بودره “أرض جو”.

– بالمناسبة ،محمد ممدوح بدأ النهارده يشد بودره هو كمان “لا تطفئ الشمس”.

– الدرس المستفاد من رمضان السنة دي .. ان التطبيل في السياسة ارحم من التطبيل في الفن بكتير.

– بعد “أفراح القبة” السنة اللي فاتت ، كنت متوقع محمد الشرنوبي يعمل دور أجمد من كده “لا تطفئ الشمس”.

– رونالدو عايز يسيب ريال مدريد .. واضح ان جايله عرض يحلل فـ on sport السنة الجاية.

– الجماعة 2 .. صابرين الحسنة الوحيدة في المسلسل.

– موقع رياضي عامل موضوع بيقول فيه للقراء بلاش تتفرجوا على كاس القارات علي القناة القطرية اللي بتدعم الارهاب وممكن تشوفوها مجانا على القمر التركي علي اعتبار انها بتحارب الارهاب وكده.

– الموقع الفني بقي التابع للموقع الرياضي ده عامل موضوع النهارده عنوانه ” بعد ظهوره في كلبش وطاقة نور .. 10 معلومات لا تعرفها عن قسم العمرانية”.

– ريهام عبد الغفور خطيبها رفض يرجع لها “لا تطفئ الشمس، وخطيبها التاني بيعايرها انهم لسه مخلصوش التنجيد لغاية النهارده “رمضان كريم”.

– الناس مبتحبش البني آدم اللي ماشيها صح على طول .. بيضايقهم .. بيخنقهم .. بيفكرهم دايما بعيوبهم .. بيحسسهم دايما انهم ناقصين.. محمود عبد المغني “ظل الرئيس”.

– انت فاكر نفسك راجل ولا ايه ، ده انت تربية لبن الصناعي .. محمود حافظ “هذا المساء”.

– لا مسافة بيني وبينك حتى تطويها رحلتك ولا قطيعة بينك وبيني حتى تمحوها وصلتك .. كانت مكتوبة علي حيطة الأوضة اللي قاعد فيها أمير كرارة “كلبش”