عبد الله غلوش يكتب: غلوشيات رمضانية (20) - E3lam.Org

شاركها Facebook Twitter Google +

– آخره عتق من النار.

– اللهم بلغنا ليلة القدر.

– لأعلي سعر .. ماندو العدل أكبر نقطة ضعف في المسلسل.

– لأعلي سعر .. برنامج مستضيف دكتور تجميل وفي الخلفيه كتب وامبولات تحاليل ومخ بني آدم وهيكل عظمي ومستضيف دكتور تجميل .. ممكن يبقي اسمه دينا العلوم لكن دينا النجوم مش مستوعبها الحقيقة.

– عفاريت عدلي علام .. مشهد كامل 5 دقايق لكلب بيحاول يكسر شباك عربية كمال أبو رية.

– عفاريت عدلي علام .. هو العفريت اللي عامل دور حبيب غادة عادل ده أحمد صلاح حسني ولا أنا متهيألي؟

– أعربت النجمة رانيا فريد شوقي عن سعادتها بردود الأفعال الإيجابية التي تلقتها عن دورها في مسلسل “قصر العشاق” .. أكتر خبر ضحكني من أول رمضان.

– عادل إمام خرج من مستشفي المجانين اول امبارح “عفاريت عدلي علام”، وياسمين عبد العزيز دخلتها امبارح”هربانة منها”.

– الابديت الجديد لتويتر .. حاجة استغفر الله العظيم.

– الجماعة 2 .. تقريبًا عمرو أديب هو الوحيد في مصر اللي حريص على متابعة المسلسل بإنتظام.

– لا تطفئ الشمس .. أظن ان عائلة ميرفت أمين أحق بشرب زيت الكافور من معكسر الرجالة في “خلصانة بشياكة”.

– لا تطفئ الشمس .. انتحار أحمد مالك كان أهون من سفر شيرين رضا وانتهاء دورها في المسلسل.

– لا تطفئ الشمس .. هي لما إنجي المقدم تشوف امبارح روج على فانلة جوزها الداخلية ، المفروض نعرف رد فعلها كمان 9 حلقات ولا ايه؟

– بعد جهاد سعد وميرفت أمين “لا تطفئ الشمس” وانوشكا ومصطفى فهمي “حلاوة الدنيا” ، نبيل الحلفاوي وسلوى محمد علي “لأعلي سعر” قصة حب جديدة تحت السبعين.

– بعد غادة عبد الرازق “أرض جو” و دنيا سمير غانم “لالا لاند” ، حنان مطاوع احدث مضيفة طيران في دراما هذا العام “حلاوة الدنيا”.

– الحساب يجمع .. هو انا لوحدي اللي شايف ان ندى موسي مبتعرفش تمثل؟

– الحساب يجمع .. على طريقة عنتيل الغربية ، تامر حبيب طلع بيصور افلام جنسية للمرضى بتوعه.

– الحساب يجمع .. كما وضعت بصمتها على مشاهد السرير في السينما ، صفوة رفضت تعتزل قبل ما تحط بصمتها على مشاهد السرير في الدراما كمان.

– بالمعايير اللي نعرفها واتربينا عليها ، الدور اللي بتلعبه أمينة خليل او جميلة عوض “لا تطفئ الشمس” اقذر من الشخصية اللي بتجسدها زينة في “لأعلي سعر”.

– الزيبق .. قليلون حول الوطن كثيرون حول كريم عبد العزيز.

– لمس الكلب او لعابه ليس من نواقض الوضوء .. مصطفي شعبان “اللهم اني صايم”.

– بقالي يومين بلف علي كيس سكر ومش لاقياه .. سلوى عثمان “رمضان كريم”.

– الحب لما يروح للي مايستهلوش يبقي 60 نيله .. محمد حاتم “لأعلي سعر”.

– المجنون اللي يفكر يضرب نار علي واحد حاطط المسدس في راسه وايده ع الزناد .. أحمد داوود “هذا المساء”.

Top5 الثلث الثاني من رمضان :

– أفضل قناة : ( ام بي سي مصر – سي بي سي – dmc –النهار– اون e)

– أفضل اذاعة: (الراديو 9090 – نجوم fm – ميجاfm – راديو مصر – اينرجي).

– أفضل مسلسل: (حلاوة الدنيا – رمضان كريم – الحصان الأسود – هذا المساء- كلبش ).-

– أفضل مسلسل كوميدي : (ريح المدام – خلصانة بشياكة – لمعي القط – الرابع والخامس يحجب ).

– أفضل برنامج : (الصدمة 2 – قمرة – الانسانية قبل التدين – ورطة انسانية – رسائل من الله).

– أفضل ممثل: (أحمد مالك – ظافر العابدين – ياسر جلال – دياب – محمد فراج).

– أفضل ممثلة : (هند صبري – حنان مطاوع– زينة – شيري عادل – ريهام عبد الغفور).

– أفضل وجه جديد (أسماء أبو اليزيد “هذا المساء” – ديانا “الحساب يجمع” – ركين سعد “واحة الغروب” – سلمي أبوضيف “حلاوة الدنيا” – محمد جمعة “هذا المساء” )

– أفضل مخرج: (حسين المنباوي “حلاوة الدنيا” – حسام علي 30 يوم – كاملة أبوذكري “واحة الغروب” –- أحمد سمير فرج “ظل الرئيس” – سامح عبد العزيز “رمضان كريم”).

– أفضل سيناريو: محمد سليمان عبدالملك “الحصان الأسود” – سماء عبد الخالق وإنجي القاسم “حلاوة الدنيا” – أحمد عبد الله “رمضان كريم” – تامر محسن “هذا المساء” – محمد رجاء “الحساب يجمع”.

– أفضل تتر: (أصالة “لا تطفئ الشمس” – وائل الفشني “واحة الغروب” – نوال الزغبي “لأعلي سعر” – أحمد شيبه “اللهم اني صايم ” – شيرين “حلاوة الدنيا”).

– أفضل اعلان : (اوفا Eg bank- مستشفي 500 500 – صلصة هارفست – تكييف ميديا – مين واقف في الطرقة ”كوكاكولا”).

– أفضل أم ( أنوشكا – ماجدة زكي – دلال عبد العزيز – يسرا – سلوى عثمان).