المحتوى الرئيسى

عبد الله غلوش يكتب: غلوشيات رمضانية (16) - E3lam.Org

06/12 06:03

شاركها Facebook Twitter Google +

– مخضوض من الناس المخضوضه من كم كمية الخيانة والالفاظ والخمور والسفالة اللي في المسلسلات وعاملين انهم مش حاسين ان الحياة العادية فيها أكتر من كده.

– مصر وتونس .. كوبر كداب نصاب لعنة وحلت على منتخب مصر.

– مصر وتونس .. ياريت محمود فايز يقول للأخ كوبر ان الخطة حاجة والفته حاجة تانية خالص.

– مصر وتونس .. اللي يشوف كوبر يقول حسام البدري ده مدرب عالمي ، واللي يشوف علي معلول يقول حسام البدري ده بتاع كنافه.

– مصر وتونس .. رمضان صبحي تقريبا الاعلانات نسته الكوره.

– مصر وتونس .. كهربا تقريبا صوره مع خطيبته علي الانستجرام نسته الكورة برضه.

– مصر وتونس .. زي ما باسم مرسي مش متابع ، كوبر كمان مش متابع ان مصر فيهم مهاجمين كويسين زي عمرو مرعي واحمد جمعة.

– مصر وتونس .. اكرامي اصدق دليل علي ان الدولي غير الدوري فعلا.

– مصر وتونس .. الحضري لما كان بيلعب اساسي قالك مستعد أشيل الكور وامسح أحذية اللاعيبه ، النهارده لما عرف ان اكرامي هيلعب قالك مش هاقعد احتياطي لحد.

شاهد الحلقة السادسة عشر من المسلسل الرومانسي الكوميدي (الحب الحب)

– بتعاقده اليوم مع العدل جروب ، كده محمد رمضان ماضي مع ٣ شركات ٣ مسلسلات علي ٣ قنوات مختلفة في رمضان ٢٠١٨ .. قضايا وشروط جزائية كتير الفترة الجاية.

– من باب الاختلاف حسام الحسيني عامل دور واحد بيئة في “رمضان كريم” ولما حب يغير في “وضع أمني” عمل دور بيئة برضه.

– مشاهدة غادة عادل وغادة عبدالرازق في نهار رمضان يفسد الصوم.

– منافسة شرسة بين “وضع أمني” و “عشم ابليس” و “الحساب يجمع” و “واحة الغروب” علي لقب المسلسل الأبطئ في رمضان.

– باستثناء كريم عفيفي ، كل نجوم مصر بعيدا عن المسرح دمهم تقيل.

– أخبار القبض علي الفنان الفلاني أو زواج الفنانة الفلانية وفي الاخر يطلع في أحداث مسلسل ، بقت موضه قديمة اوي.

– سلمى أبوضيف .. لا بنت أحمد حاتم طايقاها”حلاوة الدنيا” ولا أحمد مالك قبل ما ينتحر كان طايقها” لا تطفئ الشمس” ومش

عارف هي طايقة نفسها ازاي الحقيقة.

– الحصان الاسود .. أول مسلسل puzzle في تاريخ الدراما المصرية.

– وضع أمني .. بعد ما فشلت الاعلانات المدفوعة sponsored انها تعمل نسب مشاهدة كويسه للمسلسل ، قرروا من النهاردة يتفقوا مع بعض الصحفات الرياضية الكبيرة علي الفيسبوك عشان يروجوا للمسلسل عليها مقابل مبلغ مالي يوميا.

– عماد رشاد وصف مصطفي خاطر بالقذر عشان اتجوز على ياسمين عبدالعزيز في ” هربانة منها” ، وده بالرغم ان عماد رشاد نفسه متجوز علي الفت امام من أول رمضان في “لالا لاند”.

– هربانة منها .. المخرج أول ما يخلص التلت ساعة بتوعه بيقفل الحلقة بغض النظر القصة انتهت ولا لأ؟

– بخلاف الاجر، ايه اللي اضافه اعلان يونيون اير لكريم عبدالعزيز؟

– الحق يتقال بيت عمرو وكندة “نيوبوليس” اشيك من بيت علا رشدي وأحمد داوود “تورنيدو”.

– بالمناسبة هما مخرجين الاعلانات ميعرفوش ان إيمي سمير غانم وحسن الرداد اتجوزوا ولا ايه؟

– حلاوة الدنيا هند صبري عرفت انها تعبانة ودخلت المستشفي بتاع ٦ مرات واتعالجت وخفت وفسخت خطوبتها وخطيبها حب اختها وهي حبت واحد تاني ، كل ده ولسه هي وكل اللي في المسلسل لابسين شتوي ، بالرغم ان الشتا عندنا مبيكلمش شهرين طول السنة.

– لا تطفئ الشمس .. نفسي محمد ممدوح يظهر في مشهد واحد وميكونش عرقان.

– في يوم واحد ، اقالة محمد كريم من الشركة اللي شغال فيها ” أرض جو” و اقالة حنان مطاوع من الشركة اللي شغاله فيها “حلاوة الدنيا”.

– أمينة خليل عملت اختبار حمل “لا تطفئ الشمس” وسارة سلامة عملت اختبار حمل “لأعلي سعر” والاتنين طلعوا حامل بس واحدة من جوزها وواحدة من واحد تاني.

– غادة عبد الرازق أتجوزت عباس أبو الحسن “أرض جو” وحنان مطاوع اتجوزت إياد نصار “هذا المساء”.

– ولاء شريف تعرضت للاغتصاب في “كفر دلهاب” ، وريهام حجاج تعرضت للتحرش في “وضع أمني”.

– من الظلم ان تطلق علي “لأعلي سعر” لقب مسلسل نيللي كريم.

– لأعلي سعر .. بعد رمضان ، اي واحدة مخنوقة من جوزها مش هتلاقي احسن من مي كساب عشان تخلعها منه.

– لأعلي سعر .. انا زينة لو مقولتش “انت عارف انك اغلى حاجة ف حياتي ولا لأ؟” ٦ مرات كل حلقة اتحرق.

– مبكرهش في حياتي اد الولولة .. شيرين رضا “لا تطفئ الشمس”.

– هو البني ادم كده ، طول ما الحاجه بعيد عنه بتبقي بتلمع في عينيه ، وأول ما تبقي في إيده خلاص .. أحمد السقا “الحصان الأسود”.

– أكتر حاجه بتضايق لما تلاقي حد عارف عنك حاجات أكتر من اللي متخيل انه عارفه.. إياد نصار “هذا المساء”.

أهم أخبار مصر

Comments

عاجل