تربية القطط – نفسك تربي قطط؟ يبقى خد بالك من النصايح دي - سوبر راجل

El-Omda ‏17 دقيقة مضت BuzzRamet اضف تعليق 1 زيارة

ناس كتير بيكسروا حالة الملل في الحياة بإنهم يربوا حيوانات أليفة، وأكتر الناس بتميل للقطط، طبعًا فيه شائعات كتيرة بتخليك متفكرش في الموضوع بس هي أغلبها غلط، لأن تربية القطط ممتعة جدًا ومسلية، ومفيهاش أضرار كتيرة، وتربيتهم سهلة ولطيفة، ولو حابب تخوض الخطوة يبقى خُد مننا بقى النصايح دي يا برنس.

أحسن حاجة عشان تريح دماغك خليك في القط أحسن، أهو راجل ويستحمل، وعشان كمان القطة هتطلع عينك كل شوية بتتعب على طول.

لو قط صغير يُفضل إنك تأكلها حاجة خفيفة، بلاش بواقي الأكل المسبك أو لحمة والكلام دا، ممكن تعمله عيش في لبن مثلًا أو شُربة.

اختارله اسم مُحترم كدا ملو هدومه، وبلاش مراتك تسميه لاحسن تخلي اسمه سيس ولا حاجة.. وأفضل ناديه كتير بالاسم دا عشان يحفظه.

لو عمل حمام في أي حتة في الشقة وبوظ الدنيا، عنفه بس من غير ضرب، ممكن خبطة خفيفة، عشان ميكررش الموضوع تاني، وعوده إنه يعمل الحمام في مكان محدد في البيت ويُفضل تبقى مختارله مكان ومحاطط فيه رملة.

معروف عن القطط إنهم بينضفوا نفسهم لوحدهم من غير مساعدة خارجية يعني، فبلاش حموم كتير، خاصة في الشتا عشان ميتعبوش.

مش لازم يكون فيه مكان مُحدد لأنك هتلاقيه طول الوقت وراك في اي مكان، ومطرح منتا هتنام هيرزع نفسه ويروح في النوم.

فيه شائعات إن القطط بتخربش، دي مش حقيقة دايمة يعني، بتحصل أوقات لما بيكونوا خايفين من حد أو مستخرمينه، ولو دا حصل اضربهم ضرب خفيف برضه مش هيعملوا كدا تاني.

القطط لازم تأخد تطعيمات طول الوقت، عشان الأمراض والحشرات، فمهم تتابع مع طبيب بيطري أو مستشفى متخصصة في المجال دا.