"تلاجة دمنهور".. مشروع خيري لمكافحة الجوع بالبحيرة

على ناصية شارع هادئ في دمنهور، "ثلاجة" مكتوب على لوحات زجاجها "طعام نظيف خذ ما يكفيك"، ينظر المارة إلى "الثلاجة"، في محاولة لمعرفة "سر الثلاجة"، ليجيب الأهالي بأنها "محاولة لفعل الخير" ومساعدة الفقراء في إيجاد طعام نظيف لهم، بدلا من اللجوء للقمامة.

طالب الهندسة أيمن غالي، أحد شباب المنطقة، تحدث عن "سر الثلاجة"، للمساعدة في نشر الخير: "عجبتني فكرة أهالي الشارع جدا، ونفسي تتعمم في كل محافظات مصر مش عندنا بس، هتبقى حاجة ممتازة جدا ومش هنلاقي حد بياكل من الزبالة تاني، ولا حد هيقولك جنيه يا بيه أكل بيه".

"الشارع كله بيحط الأكل يوم بيوم بعد صلاة العصر، والحمد لله الأكل بيخلص يوم بيوم".. قالها أيمن مشجعا على المشاركة في الفكرة: "أنا مجرد واحد بيشارك بحاجة حصلت في منطقته، عشان أشجع الكل يعملها لأنها جميلة ومش هتكلف حد حاجة، يعني روحوا لأي حد بيصلح ثلاجات واشتروها مستعملة، ومش هتبقى غالية وهتحطوا الأكل فيها كل يوم بمواعيد ثابتة بس، والأكل هيبقى موجود في كل حتة".

ولاقت الفكرة استحسان وترحيب أهالي المنطقة، من خلال نشر روح التكافل الاجتماعي: "كله بيشارك الحمد لله، وإن شاء الله قريب جدا هتبقى المنطقة كلها فيها ثلاجات أكل مجانية". قال أيمن.

أعرب أيمن عن فخره وسعادته بتفاعل الناس، بنشر الفكرة عبر مواقع التواصل الاجتماعي: "لما نشرت الفكرة على النت لقيت ترحيب غير متوقع، في 7 ساعات وصل المنشور لـ3600 لايك وأكتر من 600 كومنت و200 شير، غير كمية الناس اللي سألت عن التفاصيل عشان تنفذ الفكرة".

"التفاعل الكتير من الناس، أظهر العرق المصري والطيبة المصرية". قال أيمن، مضيفا: "الناس لو لقيت الطريق وضح قدامهم وكله قال آه هينفذوا بإذن الله، والفكرة دي مش عشان رمضان، الفكرة بدأت من شهرين".