السفر – 5 حاجات هتتفزع لما تعرفها – حقيقة فنادق أوروبا - سوبر راجل

Amr Badawy ‏12 دقيقة مضت السفر اضف تعليق 6 زيارة

السفر يعنى خروج وفٌسح، وزيارة متاحف وإنفتاح على ثقافات جديدة، وحاجات كتيرة حلوة، أهمها الفندق اللى هتنام فيه، و هتسيب حاجتك فيه!

الفنادق يعنى قاعات افراح بمساحات هلامية، سويت بكام ألف فى الليلة، أوبن بوفيه من كل ما لذ وطاب، إستقبال 24 ساعة، موظفين للإستقبال ده، حمامات سباحة، بارات، مطاعم، وخدمة غرف 24 ساعة بالموظفين بتوعها.

إنما فى السفر أوروبا الموضوع مختلف تمامًا، يكاد يكون مافيش اى وجه مقارنة بين الحالتين.

أكبر 5 إختلافات، وإختلافات ممكن تكون بالنسبالك مفجعة، خصوصًا إن فى منها بيتعارض مع ثقافتنا الإسلامية، أكتر منه تعارض مع ثقافة شؤقية عمومًا.

أيوة مافيش حمام خاص بيك زى ما انت متخيل، لأ ده انت و ضيوف تانيين بتتشاركوا فى نفس الحمام، خصوصًا لو انت رايح فندق صغير وسعره حنين، لأن المبنى كله بيبقى داخله مية الشرب والصرف من مكان واحد فمافيش تفريعات لاكتر من حمام فى الدور الواحد مثلًا، فبيبقى الدور الواحد من 8 غرف، كلهم مشتركين فى حمام واحد، علشان كدة لازم تركز فى المواصفات المكتوبة قبل ماتحجز فى الفندق علشان تبقى مدرك أبعاد اللى هيحصلك هناك ومرتب نفسك عليه.

دى بقى اكتر حاجة بتتضارب مع ثقافتنا فعلًا، نظرًا لضرورة التطهر للصلاة، فمينفعش تستخدم المناديل الورقية وبس، لازم يبقى فى بديل يساعدك فى موقف زى ده، خش هنا وأعرف تفاصيل الموضوع كله.

فى أوروبا طبيعة الشقق والبيوت تبقى مساحاتها صغيرة، يعنى الـ 100 متر دى تعتبر مساحة فارهة، فلازم تتعود على الفكرة دى، لأن حتى الفنادق الكبيرة بتبقى مساحة الغرف اللى سعرها مناسب فيها، مساحتها صغيرة جدا، بتكفى احتياجك الضرورى.

طبعًا من التقشف اللى شوفته فوق، طبيعى تتوقع ان الفطار مش هيبقى بالكم الهلامى اللى بنشوفه فى فنادق مصر.

الفطار هناك بيبقى عبارة عن عصير أو قهوة و كورواسون صغير، ولو الفندق سعره غالى شوية، ممكن تلاقى عيش، شرايح جبنة، شرايح سلامي، مربى، زبدة، عصير وقهوة.

فى فنادق كتير الرسبشن فيها بيبقى عبارة عن ديسك صغير كدة وواحد قاعد عليه، وبيبقى تحت فى بير السلم عند البوابة، مش رسبشن زى اللى انت متخيله.

ممكن الغرفة بتاعتك تبقى فى دور عالى ومافيش اسانسيير او موظف يشيل الشنط.

معظم الفنادق هناك ملهاش بانر او يافطة كبيرة تعرف تشوفها بسهولة و انت بتدور عليها، فلازم تعمل حسابك وتعمل save  للـ location بتاع الفندق على google maps علشان متوهش.

بتبقى بيوت مملوكة لأسر، و بيحولها لبزنس صغير، وبتكون مصنفة تحت بند Guest House.

ممكن يكون البوتيك ده عبارة عن عمارة قديمة من دورين في حي سياحى، فيها 10 غرف مثلا، وممكن تبقى شقة صغيرة حتى من 3 غرف.

معظمنا لما بنيجى نحجز، بنبقى متخوفين من ان الفنادق الى ملهاش اسم، غالبا هيطلعوا نصابين، بس فى الحقيقة الـ Boutique Hotels بتبقى جميلة جدًا، و غالبًا الأسرة اللى بتبقى ماسكاها بتبقى لطيفة جدًا، و بتساعدك فى كل حاجة، و بتحسسك إنك فى بيتك.

اكنت مرة مسافر رحلة عمل لسوريا، والشركة كانت متعاقدة مع فندق Four Seasons فى دمشق بحوالي ٢٠٠ دولار الليلة، فندق فخم جدًا، بس انا طلبت انهم يحجزولى في فندق  بـ٥٠ دولار في دمشق القديمة.

بيت دمشقي قديم مملوك لعائلة عريقة، حولته لـ  boutique hotel،  المكان كله ٥ غرف بساحة كبيرة،  بيت سوري زي الي في المسلسات السورية بتاعة زمان، من احلى الفنادق الي قعدت فيها.