الأكل الكداب.. حيلة ذكية للتوفير: ما يجيبها إلا «ستاتها»

الحمام الكداب، الفطير الكداب، البسبوسة الكدابة، أكلات جديدة أضيفت إلى المطبخ المصرى، ابتكرتها عدد من ربات البيوت من وحى سياسة التوفير، فبعد ارتفاع الأسعار، صار البحث عن أكلات تكلفتها أقل هى السياسة العامة التى يتبعها الجميع، وبدلاً من شراء «جوزين حمام بالشىء الفلانى»، صارت الفراخ هى البديل بعد إعدادها وطهيها بطريقة معينة تشبه فى النهاية «الحمام المحشى فريك».

اعتادت مايسة الخلف، إحدى ربات البيوت، على تقديم وجبة الحمام لعائلتها كل فترة، ولكن بعد أن وصل زوج الحمام إلى 50 جنيهاً، أصبح من الصعب توافره على مائدة السفرة، خصوصاً لدى أسرة مكونة من 6 أفراد: «لقيت على الإنترنت أكلة اسمها الحمام الكداب عبارة عن صدور فراخ بتتحشى أرز وتتلف بطريقة تخليها شبه الحمام، عملتها وعجبتهم قوى ومحدش قال حمام ولا غيره، بالعكس قالولى طعمها حلو».

ليس الحمام فقط، فعلى الإنترنت وجدت «مايسة» نوعاً آخر من الأكل الحلو اسمه «الكريمة الكدابة»، يغنى ربة المنزل عن شراء الكريمة الجاهزة المكلفة بمكونات موجودة فى كل بيت: «عملتها فى البيت من لبن ونشا وسكر وبستخدمها فى حشو الحاجات الحلوة، وزى الكريمة بالظبط».

بعد ارتفاع الأسعار بحثت زينب سعد، عن أكلات بديلة أرخص وأوفر: «كل أكلة سعرها غالى بقى ليها بديل كداب، الستات تحايلوا على ارتفاع الأسعار بكده»، مضيفة: «أنا عن نفسى مش بشترى حاجة جاهزة من بره ولا بعمل حاجات غالية قوى».