أسامة كمال: "إحنا محلك سر بسبب الناس اللي بتكسر المقاديف"

انتقد الإعلامي أسامة كمال، خلال حلقة الأربعاء من برنامجه "مساء DMC" على قناة "DMC"، الأشخاص الذين يعملون على بث الطاقة السلبية في أثناء الحديث.

وقال كمال: "إننا نطلع ونقول أو نكتب (مافيش فايدة) و(صوتّي يا صفية) وغيره من الإيفيهات اللي جابتنا ورا سنين طويلة، هي أسهل حاجة في الدنيا"، مضيفًا: "أننا منذ سنوات محلك سر بسبب الناس اللي بتكسر المقاديف، والناس اللي مقاديفها اتكسرت بالفعل وما حاولتش تعمل مقاديف غيرها أو حتى تكمل السبق عوم".

وتابع: "البلد مليانة مشاكل والتصرفات اللي بتصدر من جهات إدارية في الدولة ومن أجهزة وغيره عليها علامات استفهام"، مشيرًا إلى حجم من يتم ضبطهم متلبسين برشوة وفساد، وهؤلاء "نقطة في بحر" حسب وصفه.

ووجه كمال رسالته لـ"من يرى الدنيا سوداء ومن يكتف بالاستسلام": "ما تركن يا أخي يمكن التاني اللي مصرّ ولسه بيعافر يمكن يعمل حاجة تفيده وتفيدك وتفيد البلد الغلبانة بينا ومعانا دي".