بالفيديو.. شاب مصري يوجه رسالة للرئيس السيسي: «أنت يوم ما مسكت الحكم ياريس قولت وعود كتير.. لكن مصر بقت من دول العالم العاشر»

مقطع الفيديو شاهده حتى الآن ثلاثة ملايين شخص عبر مواقع التواصل

بعد انتقده للسيسي.. سرور للجمهور: لو حصلى حاجه افتكرونى بالخير

وجه المدون والفنان الساخر، شادي سرور، رسالة إلى الرئيس عبد الفتاح السيسي ينتقد فيها وضع البلاد، وتساءل من خلالها عن وعوده التي قدمها للشعب قبل انتخابه رئيساً، والتي من بينها عدم ارتفاع أسعار السلع الأساسية وإحلال الأمن والأمان في البلاد، وكذلك عدم ارتفاع سعر الدولار، وإتاحة حرية التعيبر عن الرأي، وتطوير الخدمات في مجالات الصحة والتعليم والاقتصاد غيرها.

وقال سرور، في مقطع فيديو بثه عبر موقع "يوتيوب"، "أول ما أبدأ الرسالة عاوز أقول رحم الله كل شهداء الوطن، وياريت مندخلش الإسلام في أي حاجة لها علاقة بالإرهاب".

وأضاف سرور، في مقطع الفيديو الذي شاهده حتى الآن ثلاثة ملايين مشاهد، "أنت يوم ما مسكت الحكم ياريس قولت وعود كتير، أنا فاكر كلامك كويس لما قولت أسعار السلع الأساسية مش هتغلى، وأن البلد هتبقى في أمن وأمان تاني، وأن الدولار مش هيغلى، وأن هيبقى في حرية للتعبير عن الرأي، وأن هيحصل تطوير في التعليم والصحة والاقتصاد، ودلوقتي بعد 3 سنوات من وجودك في الحكم ارتفعت الأسعار بشكل جنوني، وتضاعف سعر الدولار من 6 جنيهات حتى تخطى حاجز العشرين جنيهاً، بالإضافة إلى انتشار حوادث القتل التي يذهب ضحيتها شباب جنود ضباط أقباط ومسلمين نساء وكبار السن وأناس عاديين، أنا خايف الدور اللّى جاية يبقى عليا أو على حد من أهلى أو أصحابِ".

وأضاف سرور، "الآن السلع الأساسية بقيت مش موجودة، مفيش سكر ولا زيت، ولو موجودة بتكون بضعف السعر 4 مرات، التعليم راح فى مرحلة أبشع من الدروس الخصوصية اللّى كنُا بنأخدها في الثانوية العامة، الطالب اللّى في سنة ثالثة إبتدئي لازم يأخد دروس في كل المواد وإلا هيسقط علشان مباقش في تدريس أصلاً في المدارس، والأدوية اللّي كانت بتقوي المرضى على مرضهم والمستشفيات بقيت أسعارهم مولعة نار، لكن الناس اللّى بتتعذب ومعندهمش ثمن كشف المستشفى ولا ثمن الدواء هيعملوا إيه، الاقتصاد أنا مش شايفه من أي ناحية، احنا اصلاً معندنش اقتصاد، احنا عايشين على دعم دول خليجة والسلف، الصناعة.. احنا فين أصلاً اللّى بنصنعه، احنا بنستورد كل حاجه من بره، الشوارع كل يوم حوادث قتل كتير علشان مفيش تنفيذ قانون صارم للمرور، بس في قانون صارم لمنع التظاهر أو حتى قول الرأي فى أي شئ أو الأعتراض على أي شئ، لأن مبدأ الأعتراض دلوقتى بقى خيانه للوطن وحسابه عسير.

وتابع "السياحة اتمسحت من عندنا تقريبًا بعد ما كان عندنا نسبة السياح كبيرة، بقينا مش بنعمل أي تشجيع للسياحة بالعكس احنا بنقرفهم علشان محدش فيهم يجاي البلد تاني، حتى الباسبور المصري بعد ما كان له شوية قيمة دلوقتي بقينا من دول العالم العاشر مش بنقدر نسافر أي بلد غير بالعذاب علشان نعرف نطلع فيزا، ده السودان حتى رفعت عننا الفيزا".

وتناول سرور حياة الشباب المصريين قائلاً: "دلوقتي شاب فضل يدرس وأهله كانوا بيطفحوا الكوته علشان يخلوا يتخرج من الجامعة بعد درسه أكتر من 14 سنه، هيشتغل في شغلنه بـ خمس آلاف جنيه ده لو موجوده أصلاً، قولى يا ريس الشاب ده أمتى هيقدر يشترى شقة لنفسه وأقل شقة دلوقتى ثمنها مليون جنية، قولى يا ريس الشاب ده أمتى هيقدر يشترى لنفسه عربية وأقل عربية ثمنها ربع مليون جنية، قولى يا ريس الشاب ده أزاى هيتجوز ويجيب عيال تصرف عليهم، الحياة بقيت صعبة جدًا، وحالنا يأس يوم بعد الثاني".

وأوضح سرور، "أحنا مش عاوزين نقلب البلد ولا نعمل مظاهرات ولا نشيلك، احنا أصلاً في حالة فقدان للأمل، أنا ممكن أبقى مش بفهم سياسية، لكن أنا بتكلم بلسان شاب بسيط بيعبر عن رأيه بصورة محترمه، علشان مستاء من الحالة اللّى البلد وصلت لها".

واستكمل "في ناس هتطلع تقول إني أخوان، في دماغ الناس بقى مبدأ الاعتراض ذات نفسه خيانة، خيانة عظمى للوطن، ليه أصلاً أي طائفة معترضة نحجزها ونعذبها ونصفيها ونخونها، ليه منبقاش كلنا أيد واحدة، ويبقى في حرية وفي أكتر من 100 حزب بيحكم البلد، مش ده برضه اللّى احنا اختارناه من الأول.. الديمقراطية، مكناش سبنا الملك فاروق يمشي بقى، أنا مليش أي علاقة بأي حزب إخواني أو لبيرالي أو أي حزب في البلد أنا شاب بسيط، بحب بلدي، شايف بلدي بتنزل للقاع يوم عن التاني وأنا عاجز، وآخر حاجه هسألك سؤال واحد، ياترى أنت شايف الكلام ده كله، علشان لو أيوه هتبقى مصيبه".

Video of رسالة من شاب مصري إلى السيسي رئيس جمهورية مصر