منطقتي | نرصد أراء أهالي ماسبيرو في بدائل الحكومة للمنطقة

خلال زيارة الدكتور أحمد درويش، نائب وزير الإسكان لمنطقة “مثلث ماسبيرو” الخميس الماضي، طرح أهالي المنطقة عدة مطالب لضمان عدم تهجيرهم قسريا أو الإضرار بهم، تمثلت تلك المطالب في؛ تخفيض قيمة الإيجار الشهري إلى 300 جنيهًا، بعد أن حددتها الحكومة بألف جنيه شهريا، مع تخفيض القسط التملكي إلى 700 جنيه، وامتداد عقد الإيجار لثلاثة عقود، وأن يكون الإخلاء جزئيًا وليس كليا، ورفع قيمة التعويض لأكثر من مئة ألف جنيه، كما طالبوا بفتح باب الرغبات أمام من يرغب في الحصول على وحدة سكنية خارج المثلث أن يحصل على وحدة سكنية في منطقة مطار إمبابة لقربها من أماكن عمل أهالي مثلث ماسبيرو.

تجول “منطقتي” في منطقة مثلث ماسبيرو لاستطلاع آراء الناس ورغباتهم، ومنها ما جاء كالآتي:

أنا عندي 55 سنة، وعايشه في مثلث ماسبيرو من أيام جدودي، إزاي عاوزين يطلعونا من هنا؟، الناس هنا بيضموا على بعض وستر لبعض، إحنا لو طلعنا بره هنتعرا، وبعدين هيرمونا فين في الصحرا، أنا عندي القلب والسكر لو روحت الأسمرات مش هلاقي مستشفى قريبة، ومحدش هيسأل فيا ولا يلحقني، وطالما هموت يبقى أموت هنا أحسن، احنا مش عاوزين فلوس عاوزين نفضل في مكاننا، ممكن يطوروا المنطقة على مراحل، يعني يبنوا في كام شارع وينقلونا في البيوت دي لغاية لما يخلصوا ونرجع بيوتنا تاني، وبعدين مين هنا هيقدر يدفع ألف جنيه إيجار، الناس هنا غلابة بتدفع اتنين جنيه إيجار بالعافية. والنبي يا بنتي تبلغي الريس يبص للناس الغلابة شوية.

أنا هنا بقالي سنين من أيام جدود الجدود، من قبل ما مبنى التليفزيون يتبني، إحنا أسياد المنطقة، دلوقتي عندي 110 سنة، ومعايا 8 ولاد، و3 بنات، ليا محل جزارة هنا ومعايا ورق بيه وليا بيتين ملك وبيت حِكر، ورئيس الحي قال لنا المحلات لسه محددناش ليها تعويض، احنا مش عارفين إيه اللي هيحصل معانا، ومش واثقين في الحكومة، ومش عاوزين نطلع من المنطقة، يا إما لو نقلونا من هنا ميرموناش في الصحرا، ممكن يودونا مطار إمبابة على ما يبنوا المنطقة ونرجع تاني، وبرضو مش هنوافق إلا لما ناخد ضمانات.

اتولدت هنا مع 9 من اخواتي، عندي 62 سنة ووارثة المكان من أيام أجدادي، إحنا أهالي المنطقة مش غربا عليها ده احنا لو طلعنا على أول الشارع بنقول يا غربتنا، البيوت هنا تاريخها أكتر من 200 سنة، واتولدت فيها أجيال كتيرة ومعانا العقود وشهادات ميلاد أولادنا وكل الأوراق اللي تثبت حقوقنا، عايزين يمشونا من هنا لازم يعوضونا تعويض كويس ومكان مناسب، مش نطلع من هنا نروح الصحرا، فيه أماكن موجودة قريبة زي منطقة مطار إمبابة اللي كلها مساكن، ممكن نوافق إننا نروح منطقة زي دي، لكن المشكلة اننا معندناش ثقة في المسؤولين، لما حصل التفجير عند القنصلية الإيطالية محدش جالنا مع أن بيوتنا اتأثرت من التفجير، كل اللي عملوه إنهم دهنوا البيوت اللي قدام السفارة اللي هيا واجهة السفارة، عشان يبان إنهم صرفوا ودفعوا فلوس، عشان كده معندناش ثقة في كلامهم ومش هنخرج من هنا، فيه بيوت هنا متدمرة ممكن يبنوا مكانها وينقلونا فيها لحد ما يخلصوا بيوتنا، لكن إحنا مش هنسيب أماكننا.

دلوقتي لما الحكومة عملت شقق الأسمرات ونقلت الناس فيها، الناس هناك قالوا لنا المياه بيتجي ساعتين بالليل، والعيش بيتباع بعد الضهر، وممنوع تدخل فرخة صاحية، طب احنا هنعيش إزاي، لو واحد مروح بيته والأمن وقفه يسأله رايح فين وجاي منين دي تبقى عيشة؟، طب احنا هنروح هناك يحبسونا، احنا مش موظفين ولا بناخد فلوس من الحكومة يسيبونا بقى نعيش، دلوقتي أنا ليا بيت وقع من قبل الثورة والمستأجرين كلهم اتعوضوا وأنا مأخدتش غير 500 جنيه عشان الأنقاض، ودلوقتي لو مشونا من هنا هناخد ملاليم برضوا، وهنترمى في الأسمرات وادفع 300 جنيه وممنوع تأجير الشقة أو بيعها أو توريثها، طب إحنا هناخد الشقة شوية لحد ما العجلة تدور وبعدين الحكومة تاخدها ونترمي في الشارع؟

إحنا هنا عايشين على قدنا، معظم الناس هنا معاشات وبندفع 15 جنيه إيجار، هنجيب منين ألف جنيه إيجار بعد تطوير المنطقة، نسرق بقى ولا نعمل إيه، لو الإيجار 400 أو 500 جنيه مش مشكلة لكن نفضل في مكاننا، هنا كل حاجة قريبة، الإسعاف والكورنيش والتليفزيون، والناس هنا عشرة عمر لو محدش معاه فلوس يفطر بيلاقي ياكل ويشرب لإن الناس هنا بتضم على بعض وستر لبعض. لو عايزين يطلعونا بره يبقى يعوضونا تعويض كويس ومنترميش في الصحرا.

أنا عندي 66 سنة وعايشة هنا من أيام جدودي، بعد العمر ده عاوزين يخرجونا بره ليه، أنا ساكنة قريب من مبنى التليفزيون وبدفع خمسين جنيه إيجار، أدفع منين ألف جنيه بعد كده، ده احنا بنلاقي ندفع الإيجار بالعافية، وبعدين إحنا مش واثقين في الحكومة لو طلعونا مدة الـ 3 سنين بتوع التطوير مش هيرجعونا تاني.