إزاي تختار شقة الزوجية - سوبر راجل

El-Omda يناير 6, 2017 هتجوز اضف تعليق 156 زيارة

ربنا كرمك وخطبتك وعايز تجهز نفسك وتدخل دنيا، أكتر سؤال هيتقالك من مصر كلها وأولهم أهل العروسة، هو عندك شقة ولا لا؟ عشان كدا لازم تكون جاهز بالشقة أو معاك فلوسها وبتدور عليها.. وعشان تختار شقة كويسة ومريحة وتساعدك على الاستقرار مش العكس، اسمع مننا النصايح دي وجرب وشوف.

حاول دايمًا يكون اختيارك في مكان حيوي، يعني بلاش تروح مكان لسه جديد مفهوش خدمات. مهم تركز إنه يكون فيه مواصلات كويسة وإنه قريب من الأسرة خاصة أهل العروسة لأنهم هيفدوك جدًا لما تبقى حامل وفي الولادة، ولما يبقى عندك ولاد.

مهم شقتك تبقى قريبة من الخدمات اللي هي الأسواق والمدارس والمستشفيات، دا هينقذك كتير في حالات الطواريء ومشوار الطبيخ بتاع كل يوم ميكونش مرهق وولادك يبقوا بيدرسوا حوليك فيما بعد.

أقل حاجة تبقى 100 متر، عشان تعرف تعمل شقتك بشكل كويس وتحس إنها مكان واسع مش ضيق، وتنفذ بسهولة أحلامك عن شقة الزوجية، وتلاقي مكان لعفشك.

يُفضل تجيب شقة على الطوب الأحمر، عشان تقدر تعمل كل حاجة براحتك بداية من كهربة البيت ثم المحارة للدهان لنوع السيراميك. لكن لو جبت شقة متشطبة هيطلع عينك عشان تعمل التعديلات اللي انت عايزها. وممكن تدفع فلوس اكتر.

فيه ناس بتقول إنه بلاش تأخد شقة في الدور الأخير لأنها بتبقى في مهب الريح، في الصيف مولعة وفي الشتا بتبقى برد علقم، دا غير إنها لو مفيهاش اسانسير الموضوع هيبقى مرهق جدًا في الطلوع أو النزول.. أو لو الاسانسير اتعطل هتبقى بهدلة.

مهم جدًا لما تختار شقتك إنك تتأكد إن السباكة سليمة ومفيهاش مشاكل، عشان هتبقى حوسة لو وضبت وفي الأخر اكتشفت إن الحمام بيسرب مايه ولا هتأثر على الحيطان.

بعد ما تختار شقتك اتاكد طبعًا من صاحب البيت إن العقار مش مخالف وإن كل الأوراق سليمة، وتروح مشوار برده للحي احتياجي عشان تتأكد من الموضوع. لأن الحكاية دي مفيهاش هزار انت دافع شقى عمرك في الشقة.