ورش لتعليم السيدات صناعة الكليم فى 4 أيام

«النهارده هنتعلم صناعة الكليم، هناخد 25 يوم عشان نقدر نطلع قطعة كليم صالحة للبيع»، هكذا أخبر المدربان على عرجاوى أبوغالب، ومبروك محمد أبوشاهين، المقبلان من قرية «فوة» بكفر الشيخ 20 سيدة، من عزبة خير الله، أنهن بصدد التعلم لأيام طويلة، كى ينجحن فى تعلم صنعة «الكليم»، لكن حالة من عدم التصديق سيطرت على الوجوه، بعد أن تمكنت السيدات الـ20 من إنتاج قطع كليم متكاملة فى 4 أيام فقط. «اللى شفته خلانى أتأكد إن اللى عنده رغبة فى التعلم والعمل لو لقى ربع فرصة بيستغلها»، يتحدث محسن سرحان، المدير التنفيذى لمؤسسة «خير وبركة» الخيرية، الذى أذهله بدوره نجاح الفتيات الـ20 فى إنجاز المهمة فى 4 أيام فقط: «وزن الكليم اللى تم إنتاجه 4 كيلو والوزن المثالى 2 كيلو فقط»، لكن هناك المزيد من الإتقان منتظر مع المزيد من التدريب خلال الأيام المقبلة.