حسين صبور: السيسى مدلّع الشعب ولازم يشد أكتر

- أطالب بوقف العمرة نهائيا والخمور ماتتمنعش عشان السياحة وقولوا عليا ملحد براحتكم

- مراتى بتشتكى من الأسعار بس مفيش بديل

- أزمة الإسكان مش هتتحل والسبب فيها عبد الناصر

- لو احنا فى دولة محترمة كان وزير الصحة أقيل أو استقال

- مستغرب من رحيل وزيرا النقل والتخطيط وسعيد بالمصيلحى

- البرلمان لسه فى سنة أولى والأحزاب ملهاش دور

- قانون الاستثمار ملوش لازمة طول ماكل حاجة بتتعمل بالرشوة

- نجيب ساويرس استفاد من علاقته بالدول الأجنية ورجال مبارك

- مبارك كان بيقول فى التليفزيون مفيش خصخصة وهو مكلفنى بيها سرا

- رجل الأعمال اللى يلعب سياسة يبقى أهبل

- أحمد عز نفع نفسه وضر البلد ورشيد كان باشا والمغربى عمره مايسرق

-اعترف بسفرى لإسرائيل وأرفض التعاون الاقتصادى معها

- تل أبيب مضطرة تساعدنا فى سيناء من أجل أمنها

فى مكتبه بأحد الأدوار العالية فى المول التجارى الشهير، الذى يملكه على كورنيش النيل، يجلس المهندس حسين صبور، رجل الأعمال، والرئيس الشرفى لجمعية رجال الأعمال المصريين، واضعا على حوائط مكتبه العديد من الصور والشهادات ترصد تاريخه الطويل فى مجال المقاولات والاستثمار، سنوات من رئاسة مجلس الأعمال المصرى الأمريكى، وسنوات فى رئاسة جمعية رجال الأعمال المصرية، وعضوية هيئة الاستثمار، ومشاهد وحكايات طويلة مع رؤساء مصر وكبار رجالها، منذ عهد الرئيس الراحل جمال عبدالناصر، مرورًا بالسادات ومبارك، وحتى الآن.

الحديث معه يأخذك فى كل العصور، كل الأزمات من وجهة نظره لم تبدأ الآن، بل بدأت فى الماضى، يبدو من حديثه أنه لم يحب ثورة 1952، وأنه يعترض على كثير من سياسات الزعيم الراحل جمال عبدالناصر، يمر من السادات إلى مبارك، ثم ثورة يناير، التى فقد فيها الكثير، حتى كرسى مكتبه الذى يريحه، يحكى لنا فى حوارنا معه أنه رآه محمولا على كتف أحد من سرقوا مول «أركاديا» فى جمعة الغضب، ويرى أن إنقاذ مصر فى يد السوق الحر والقطاع الخاص وإرساء قيم العمل والتصنيع والإنتاج، وبغير ذلك ستضيع مصر.. وإلى نص الحوار:

وأنت تجلس هنا فى دور عالى فى أحد أشهر المولات التجارية.. هل يصلك صوت المواطن المطحون من غلاء الأسعار؟

-طبعا، حاسس جدا بالأزمة، أنا مراتى كمان بشتكتى.

زوجة حضرتك بتشتكى من إيه؟

-من الأسعار طبعا، ما هى سيدة وبتشترى وشايفة الغلاء.

وماهو الحل من وجهة نظرك؟

-الحل إن الرئيس يشد على الشعب شوية، لأننا شعب بيتدلع، والرئيس مدلعنا أكتر.

إنت متأكد من هذا الرأى!!

-طبعا، انزل مصانع أكتوبر وشوف كام مصنع محتاج عمال مش لاقى، ونيجى نقول إحنا غلابة ومش لاقيين شغل.

ألا يطمأنك تراجع سعر الدولار ودلالته على نجاح سياسة طارق عامر محافظ البنك المركزى؟

-لا خالص، ملهاش علاقة، لكن ده دليل على نجاح مسار الإصلاح الاقتصادى، إذا كملنا باقى الخطوات.

هل إنت شاكك إننا ممكن نكمل؟

-مش شاكك، لكن الإجراءات المنتظرة أكثر أهمية وأكثر قسوة.

وماهى تلك الخطوات من وجهة نظرك؟

دعم التصدير، ودعم السياحة، ووقف الكثير من الاستيراد الترفيهى، وتقليل إنفاق الدولار.

-القسوة فى إن أنا عشان أقلل إنفاق الدولار، لازم مثلا أمنع العمرة تماما ونهائيا.

لكن هذه شعيرة دينية يقدسها المصريون وسينتقدك الكثيرون!

-يقولوا عليا ملحد بقى براحتهم، لكن الحقيقة ده مش دين، ولا ضرورة، ومش حرام لو منعتها لأنها سنة.

طيب بدل وقف العمرة أمنع مثلا إستيراد الخمور؟

-لا مقدرش، عشان السياحة والفنادق، لو أنا عايز أدعم السياحة مقدرش أمنع استيراد الخمور، لكن أقدر أزود الضرائب عليها.

وإذا رفض المواطنون تلك المقترحات واعتبروها مبالغ فيها؟

-براحتهم بقى، لكن ميجوش يبكوا بعد 5 سنين لما تخلص كل الفلوس اللى شحتناها، ونقع فى مصيبة، إحنا دولة اقتصادها واقف على رجليه بالشحاتة.

حضرتك عملت كام عمرة فى حياتك؟

-أنا عملت 10 عمرات، لكن أنا توقفت تماما أول ماحسيت إن بلدى مش متحملة، حتى سفرياتى للخارج قللتها.

إيه تأشيرات الدول اللى على باسبورك؟

-كتير جدا، إنجلترا وأمريكا وفرنسا والمانيا، لكن كلها سفريات للبيزنس.

هل على باسبورك تأشيرة إسرائيل؟

-مرة واحدة، وكانت من أجل البيزنس أيضا.

هل لديك مشروعات مع الإسرائيلين؟

-لا طبعا، وأرفض ذلك على الإطلاق، لكن التأشيرة كان الهدف منها الدخول لقطاع غزة فى الإساس لأنى كنت صاحب أول مكتب مقاولات هناك بالاتفاق مع الرئيس الراحل ياسر عرفات.

ولماذا ترفض التعاون الاقتصادى مع إسرائيل؟

-لأنها عدو وستظل هكذا، وأنا أذكر أن المخابرات المصرية أنقذتنى ذات مرة من أن يتم استغلالى فى عملية مخابراتية إسرائيلية عن طريق ضباط يهود دخلوا مصر وجاءوا لى كرجال أعمال ورفضت التعاون معمه، وأبلغتنى المخابرات بعدها أنهم يسعون للشراكة معى كغطاء لتواجدهم فى مصر.

عدد من الفنانين ورجال الأعمال نكتشف مع الوقت أن قاموا بعمليات مخابراتية.. هل أنت منهم؟

-فى عمليات تجسس لصالح مصر لا، شرف لا أدعيه، لكنى قمت بمشروعات للمخابرات فى نطاق عملى كرجل مقاولات.

نعود للتعاون الاقتصادى مع إسرائيل.. أنت ترفضه بشدة رغم أن الدولة المصرية بكل أجهزتها تتعاون سياسيا واقتصاديا مع إسرائيل!

-الدولة شىء وأنا كمواطن وكرجل أعمال شىء أخر، وكفاية إننا سلمنا إسرائيل كل شىء، مش هيبقى انفتاح اقتصادى كمان، ثم إنى أثق تماما فى خيارات الرئيس عبد الفتاح السيسى وفى من حوله من وزراء سياديين.

لكن إسرائيل تدعمنا فى مواجهة الإرهاب فى سيناء!

-حقيقى، لكن ده غصب عنها، وهى تدرك تماما أهمية مصر، وأهمية عدم سقوط سيناء فى أيد الإرهاب، وهى مضطرة لذلك من أجل أمنها الشخصى.

تحدثت عن أنك رجل مقاولات فى المقام الأول.. هل ستتمكن الدولة من حل أزمة الإسكان؟

-لا مش هتقدر، والأزمة مش هتتحل، وده رأى صادم لكن دى الحقيقة، وللأسف جمال عبد الناصر هو السبب فى الأزمة بسبب تدخلاته الخاطئة فى سوق العقارات فى مصر طوال فترة حكمه.

أليس تحاملا على عبد الناصر أن نحمله أزمة نعيشها بعد وفاته بأكثر من 40 عام؟

-لا مش تحامل، وأحكيلك موقف بسيط جدا، تخيل إن عبد الناصر سنة 1954 أحضر اثنين مهندسين وقالهم أنا عاوز أوقف بناء العقارات تماما، واحد رفض، راح سجنه، والتانى قاله هايل يافندم بقى رئيس وزراء إسمه عزيز صدقى.

أول شقة حضرتك اشترتها فى عهد عبد الناصر كانت بكام؟

-كانت فى مدينة نصر، وإيجارها كان 10.5 جنيه، وقتها كان سعر الأسمنت 5 جنيه، وطن الأسمنت بـ 60 جنيها.

إذا لماذا لا تحبه رغم هذه الأسعار؟

-كفاية إن عبد الناصر استلم مصر فيها سيناء وفيها عملة لها قيمة، وسابها ومات من غير سيناء، ومضيّع الجنيه المصرى.

بالعودة إلى الوقت الحالى.. هل تفضل خصخصة شركات الحديد الحكومية؟

-خصخصة إيه، احنا فى مصر مش بنعرف نعمل خصخصة، مبارك كان بيطلع فى التليفزيون يقول للناس "لا بيع للقطاع العام" وهو مكلفنى سرا وأنا ومجموعة رجال أعمال بوضع تصور لبيع الشركات.

هو حضرتك اللى كنت مُكلف بالخصخصة؟

-أنا ومجموعة رباعية من رجال الأعمال، لكن مش هقدر أقول أسماءهم عشان محرجش حد، لكن الحقيقة أن مبارك لم يطبق ولا توصية مما قلنا، وبالتالى حدث ماحدث من فساد فى الخصخصة.

لماذا تؤمن بدعم القطاع الخاص على حساب القطاع العام؟

-لأنى مؤمن جدا بما قالته مارجرت تاتشر رئيسة وزراء بريطانيا "عندما تملك الدولة فلا يملك أحد، وعندما لا يملك أحد، لايهتم أحد"، والقطاع العام يعنى المحسوبية والواسطة والإهمال والفساد، وأنا مؤمن جدا بهذا الكلام، وأتمنى يدركه وزير قطاع الأعمال الحالى لأنه مجتهد وفاهم.

بمناسبة الحديث عن الوزراء.. هل كنت سعيد برحيل داليا خورشيد وزيةر الاستثمار فى التعديل الوزارى الأخير؟

-أه، لكن الحقيقة مش هى بس اللى كانت وحشة ولازم تمشى، أنا كنت مستنى جدا أن وزير الصحة يرحل هو كمان، ولو احنا فى دولة محترمة كان وزير الصحة استقال بعد فضيحة رشوة مستشاره، وبعد كارثة أزمة أسعار الدواء.

وما تقييمك لأداء مجلس النواب؟

-مش عايز أتكلم عن البرلمان، بس عامة كلهم لسه سنة أولى.

نعود للحكومة.. هل كنت تنتظر رحيل شريف إسماعيل رئيس الوزراء؟

-معرفش الصراحة، أنا الحاجة الوحيدة المتأكد منها هو الرئيس السيسى، لأنه راجل مخلص إخلاص غير طبيعى، لكن ينقصه تعيين عدد من المستشارين الأكفاء، لأن أنا معرفش مين مستشارينه، قولى أسماءهم كده.

فايزة أبو النجا للأمن القومى؟

-معرفش هى بتعمل إيه الصراحة، مش شايف لها أى بصمة، أنا بحترمها جدا، لكن أنا رحتلها مرة لقيتها قاعدة فى أوضة صغيرة كده ومبتعملش أى حاجة.

-كان راجل ناجح كرئيس وزراء، والرئيس شاف إن ليه دور أهم بجواره.

وما تقييمك لباقى أسماء الوزراء؟

-مستغرب جدا من رحيل أشرف العربى وزير التخطيط ، وجلال السعيد وزير النقل، ومبسوط من اختيار على المصيلحى وزيرا للتموين، خاصة أنه أول وزير تقريبا من عهد مبارك، وده دليل تغير الثقافة.

كمستثمر.. هل تستبشر خيرا بقانون الاستثمار الجديد؟

-ولا قانون ولاغيره، مش هنضحك على بعض، الأزمة فى المناخ، مهما عملت ألف قانون، لازم نقضى على البيروقراطية والفساد الأول، ومفيش حاجة بتتعمل من غير رشوة.

ذكرت فى سياق حديثك وزراء عصر مبارك.. من منهم تريد عودته؟

-رشيد كان راجل مخلص جدا، وبيركب طيارات على حسابه لأنه راجل باشا، والمغربى عمره ما كان حرامى، ده رجال ساكن فى عزبة 40 فدان ومعندوش أولاد، هيسرق ليه.

هل تتحدث إلى أحد منهم؟

-لا طبعا، وأزوره ليه، وييجى يقولك إلحق رجال مبارك، كفاية اللى حصلنا أيام الثورة، وكفاية اللى شفته فى حريق مول إركاديا.

إيه أكتر مشاهد لاتنساها فى حريق أركاديا؟

-هحكيلك أكتر من مشهد لا أنساهم.. هروب ابنى هو ومراته وأطفاله من سطح مول إركاديا بعد سرقة شقته بالكامل.. مشهد الحريق اللى استمر أسبوع وكنت هتجنن وأعرف هى ليه الناس بعد مابتسرق بتحرق.. مشهد كرسى مكتبى اللى بحبه لما كنت بتابع الأحداث من التليفزيون فلقيت واحد شايله على كتفه وماشى بيه فى الشارع.. حكاية إمام الجامع اللى خلف المبنى اللى الناس دخلوا يخبوا عنده المسروقات فطلع فى التليفزيون يناشدنى أروحله استلم المسروقات.. والحكاية الأكثر سخرية، هما الاتنين اللى قتلوا بعض وهما بيسرقوا محل ذهب وفى الأخر لقيت أسماءهم على قوائم شهداء الثورة.

ما تقييمك لتجارب رجال الأعمال الثلاث.. حسين سالم .. أحمد عز .. نجيب ساويرس؟

-حسين سالم أذكى رجل فى مصر، وقدر يستغل كل علاقاته لخدمة مصالحه لكن بالورق والقانون، أحمد عز أضر مصر ونفع نفسه، نجيب ساويرس استفاد كثيرا من علاقته ببعض الدول الأجنبية وعلاقته برجال فى نظام مبارك.

وما رأيك فيما يحدث مع نجيب ساويرس فى حزب المصريين الأحرار؟

-أحزاب إيه، هو إحنا عندنا أحزاب، ونجيب أخطأ بدخوله السياسة، فأنا مؤمن جدا أن البيزنس والسياسة لايجتمعان، عشان كده عمرى ما هلعب سياسة لا أنا ولا أبنائى، واللى يفكر يعمل كده يبقى أهبل.

لماذا لا يطال حسين صبور ما يطال بعض رجال الأعمال من مضايقات؟

-لأنى رجل شريف، ومليش جنيه واحد بره مصر، وعارف كويس اللى ليا واللى عليا.

-كل ما أملك هى أسهمى فى شركة الأهلى للتنمية العقارية اللى رأس مالها نصف مليار، وأنا شريك بـ16% فقط.

جمال مبارك ظهر كثيرا مؤخرا.. كيف ترى هذا الظهور؟

-غلطان 60 مرة، بس غلبان.. واللى يقول أن جمال مبارك راجع يبقى غبى لأنه انتهى تماما.

صوتك لمن فى انتخابات رئاسة 2018؟