لماذا ذهب ميسي إلى صبحي كابر؟ - E3lam.Org

بداية اليوم ده كانت بتقول إن الزيارة تاريخية من أول نظافة الشوارع لإنتظام المرور في الشوارع المؤدية من و إلي مطار القاهرة، وليه لأ فهو حدث لن يتكرر كثيرا، إنه استقبال فتى الأرجنتين المدلل ليونيل ميسي، ولأسباب لا داعي لذكرها تم تشكيل لجنة من وفود وزارة السياحة، والأثار، والإعلام، والصحة في انتظار وصول نجم نجوم المجرة.

المهم وصلت الطائرة بسلام وسط فرحة الجميع، وعلى أنغام الموسيقى الشعبية، وراقصي التنورة استلمت الوفود المهمة. أشار موفد السياحة بما إننا لسه قدامنا ساعه على المؤتمر، والمشوار من المطار للهرم مش بعيد يعنى 10 دقايق ونبقى هناك، هنبدأ الجولة من عند الأهرمات هنركب الجمل، وناخد كام صورة تذكارية، وبعدها نطلع على المؤتمر.

راح مايل عليه أحد الموظفين برأسة و قال له :”الراجل جاي من 5 ساعات سفر، وأكيد هفتان، وعلى لحم بطنه شايف دقنه صفرا إزاي!، خلينا نرم عضمة بأكلة حلوة بدل ما هو مسلوع كده، وأهو دعاية برضو، إن عندنا مطاعم شعبية، وأكلات فولكلورية وكله علشان مصر.

ابتسم موفد السياحة للموظف العبقري موجها كلامه للسائق:” اطلع يا ابنى على مطعم صبحي كابر”.

ميسي كان مبتسمًا ومستمتعًا بالأجواء، وروائح طشة الملوخية، وبترحيب العاملين.. “نورت مصر يا خواجه.. والله لو لفيت أسبانيا ولا أقليم ستامونيا ده ولا محافظة برشلونة مش هتلاقي أكل بالحلاوة دي”.

مرت دقائق بعد ما أكل ميسي فتة بالموزة الضاني، حس إنه دماغه تقلت خاصة بعد ما حلفه موظف السياحة وقاله وحياة إبنك تياجو تضرب طاجن العكاوي ده و هاتدعيلي.

ميسي رجليه مش قادرة تشيله، وحاسس إنه داخل في غيبوبة، وعينه ابتدت تغرب اقترح موفد الإعلام اننا نطلع بيه على مدينة الإنتاج الإعلامي، منها يشوف الاستديوهات الجميلة اللى عندنا،  وناخدله حوار مع عمرو أديب ع السريع، ويوقعلنا على كام تيشيرت كده نعمل بيهم سبوبة، ومنها يهضم اللقمة اللي أكلها، وممكن ندخل الاستوديو على الشيف شربيني، أو الست غاليه يشرب عندهم شوية كراوية، أو نعناع يهدوا معدته شوية.

يا نهار إسود الراجل هايروح مننا، و هنروح كلنا في داهية، إطلع يابنى على أقرب مستشفي دي كانت كلمات مندوب وزارة الصحة للسواق لما حس إن طاجن العكاوي كبس على مراوح ميسي، و كان رد السواق يا باشا إحنا عند جامعة القاهرة دلوقتي، وأقرب مستشفى هى مستشفى بولاق الدكرور العام هاطلع عليها بس فيه لجنة مرور، وقلق، ورتب واقفه قدامنا نعديها، ونطلع كوبري الجامعه نبقي هناك.

ستر ربنا السواق لمح سيارة إسعاف معدية راح كاسر عليها، ونزل ثبت السواق، وفتح العربية و حطوا ميسي على السرير، وركبوا الوفود معاه، وقالوا لسواق الإسعاف اطلع على المؤتمر على ما الدكتور يعمله غسيل معدهة، والإسعافات اللازمة علشان يفوق.

فاق ميسي الحمد لله، ووصل المؤتمر بالسلامة، ورغم علامات الإعياء لكن بإبتسامته المعهودة للحاضرين من الجمهور المتحفز جدا إنه يشوفه بدأ كلمته في المؤتمر ببعض الكلمات بالعربي المكسر اللي قعد يرددها، ورا الوفود في سيارة الإسعاف و استجمع قوته و قال: “أنا أوهيب إيجيبت أووم الدووونيااا