نفوق جماعى للماشية فى الدقهلية ومربون: «البيطرى يرفض تعويضنا» | المصري اليوم

«المواشى بتموت أمام عنينا فجأة رغم أننا طعمناهم ضد الحمى القلاعية ومش عارفين السبب»، هكذا تحسر سامى السيد عبدالوهاب، صاحب مزرعة مواشى بقرية المقاطعة التابعة لمركز السنبلاوين بالدقهلية، على نفوق المواشى التي يملكها.

وقال: «أنا مزرعتى مات فيها 25 عجل بتلو بدون سبب قدام عينى، واشتكيت لطوب الأرض من الوحدة المحلية للإدارة البيطرية بالقرية وحتى مديرية الطب البيطرى بالمنصورة وللأسف الكل عامل ودن من طين وأخرى من عجين رغم إنى مأمن على تلك المواشى وبيقولوا لى ما فيش تعويض». وأضاف: «أنا طعمت كل المواشى بتطعيم الحمى القلاعية وصرفت عليهم كتير وفى الآخر البهيمة بتكون واقفة وتقع من طولها ميتة وليس عليها أي أعراض لمرض الحمى القلاعية وبتوع الطب البيطرى يقولوا مافيش تعويض للحمى القلاعية طيب أنا طعمت ضد الحمى القلاعية يبقى في حاجة غلط إما التطعيم فاسد والطب البيطرى المسؤول لأنه هو اللى بيصرف التطعيم أو في مرض تانى ومسؤوليتهم يكشفوا لنا عنه».

وأكد محمود الخلوى، من مربى الماشية بالقرية، أنه يعانى من المشكلة نفسها، موضحاً: «أنا مات عندى 7 رؤوس في خلال 3 أيام ورئيس الإدارة البيطرية يقولى ما لناش دعوة ده سوء تربية وإحنا بنربى عجول من سنين وورثناها أباً عن جد يعنى بنعرف نربى لكن الطب البيطرى بيدمر الثروة الحيوانية في مصر لأننا بنضطر دلوقتى نبيع أو نذبح العجول علشان ما نخسرش أكتر من كده وفى الآخر المواطن مش هيلاقى كيلو لحمة ياكله».

ورجح عبدالوهاب السيد أحمد، إصابة المواشى بمرض التسمم الدموى وهو يسبب الموت المفاجئ للماشية قائلاً: «المرض ده دخل مصر من 3 سنين مع استيراد المواشى وحتى الآن لم تقم مديريات الطب البيطرى بعلاجه أو إيجاد تطعيم ضده وكنا زمان بنجيب عليه تطعيم لـ7 أمراض منها التسمم الدموى وكان ثمنها 80 جنيهاً لكنها الآن وصل سعرها 1400 جنيه وغير موجودة من الأساس».