عزيزي الرجل .. كيف تشتري الخضار من السوق وتفاجيء زوجتك؟

النهاردة حننزل نشتري خضار من السوق، أيوه الواحد مننا لازم يفاجىء مراته برضو وينزل يشتري خضار من السوق، واهو يوفر قرشين بدل ما هي بتشتري من الراجل اللي تحت البيت ده، ابو خضار دبلان وغالي كمان.

اهم حاجة تجهز نفسك تمام، الشنطة ام شبكة، تحطها جوه الشنطة ام عجلة، وكام كيس بلاستيك استحراساً يعني لو احتاجتهم، تلبس ترننج ويستحسن ما يكونش غالي قوي، نظرة البياع ليك بتتحدد بناء على لبسك، اللي على أساسه حيحدد السعر ويقولك على التسعيرة المتعلقة : ايه يا بيه ده مش سعر البهوات اللي زي سيادتك ده الرابش بتاع الخضار.

وانت طبعا حتتكسف من انك تشتري الرابش اللي هو انت اصلا متعرفوش، وحتدفع بزيادة وتتدبس، يبقى الحل يامعلم تلبس ترنج نص نص وكوتشي وفينك يا سلم.

هناك بقى في السوق لازم تبقى حويط ايوة حويط جدا كمان انت داخل على مهمة مش سهلة، وتبقى فاهم كويس قوي نظرية وش القفص، هنا في مصر القفص لما بيترص، بيحطوا الحلو على الوش، وفي القلب الرابش، شفت بقى انا فاهم ازاي.

تقوم تدخل دخلتك المتينة على بياع الخضار وبصوت خبير كده وواثق في نفسه تقول وانت بتقلب في القفص وعينك على وشه : الخيار بكام النهاردة ياعم

لو زغرلك وشنبه لعب وقال بصوت يشبه القطر ساعة الفرامل : السعر متعلق قصادك اهو

متتخضش ده بني ادم زيه زيك، ومن امتى بنخاف من شنبات.

ده انت كده تبقى كسبت اول جولة يا ناصح، ومش حيعرف يقولك الرابش والبهوات والكلام اللي انا قولته في الاول ده.

تقوم تمد ايدك وتحاول تنقي، وساعتها قدامه حل من اتنين يا اما يسيبك وتبقى انتصرت وطرحته أرضا ولا مايكل تايسون في زمانه.

يا اما حيقولك مفيش تنقيه يا استاذ، واهي حلوة كلمة استاذ برضو صحيح اقل من بيه شوية بس كويسة.

ساعتها تقوم سائله وبدون كسوف وتعمل نفسك مش مهتم يعني : طيب ولو حننقي بكام

غالبا يا معلم السعر حيزيد نص جنيه ولا حاجة،والشنب المرة دي مش حيلعب وحتبقى برضو كسبان ولان السعر بالنص جنيه مش محصل سعر الراجل الحرامي اللي تحت البيت ابو خيار دبلان.

تنقي وتدفع النص جنيه وانت معزز مكرم، ويديلك الكيس بعد ما يوزنه وتتأكد بعنيك كده من ظبطة الميزان خليك ناصح،  تحطه في الشنطة ام عجل وانت مطمن انك انجزت اول جزء في الخطة اللي هو مهمة الخيار، وبعدها بنفس الطريقة مهمة القوطة، ومهمة الفاصوليا والبتنجان واللي انت عايزه يامعلم.

بس بأكد عليك خد بالك من محفظتك في زحمة السوق، في عيال صغيرة وغالباً معمصين عاملين زي فتاحات البلوبيف، تلزق في العلبة لحد ما تجيب اجلها، حيحاولوا يلزقوا فيك ويقلبوك خد بالك من محفظتك.

وبعد ما تخلص شرا كل اللي انت عايزه، اللي هو وش القفص يعني، وتروح لمراتك على وشك ابتسامة انتصار وانك جبت الديب من ديله، ميهمكش قوي من تكشيرة الراجل البياع اللي جنب البيت لما حيشوفك جارر في ايدك شنطة الخضار أم عجل، وولا تضايق نفسك لما تقوله بصوت عالي وانت مبسوط بقى : السلام عليكي، لانه رد كده بهمهمه تشبه : ربنا ياخدك ورحمة الله.