باركولى يا ناس.. سقطت خلاص

ــ بارك لى يا بابا

ــ ألف مبروك يا حبيبى.. نجحت؟

ــ سقطت يا بابا سقطت.

ــ معلش يا حبيببى، يا ريت تشرح لى ابارك لك على إيه؟

ــ انت اتهبلت يابنى؟! ساقط وفرحان بخيبتك؟!

ــ سقوط إيه اللى انت زعلان عشانه يا بابا؟! انت عارف النهاردة الطلبة بيحصل لهم إيه فى المدارس؟

ــ بيحصل إيه؟ دماغهم بينضف وبيتعلموا كلمتين علشان يلاقوا شغلانة ياكلوا منها عيش.

ــ يا بابا المدارس اتغيرت. ما عادتش زى زمان. الواحد يبقى محظوظ لو خرج من غير عاهة. بص حواليك. فيه شباب بيدمنوا مخدرات، ويبلبعوا حبوب، وينتهوا فى مصحات أو مقتولين تحت الكوبرى.

ــ مش عارف بس بص حواليك. ناسى ولاد عم سلامة؟ والا عاوزنى ابقى زى سونيا وولاء؟

ــ انت بتخرف تقول إيه؟ سونيا وولاء أبوهم وامهم اتطلقوا وأهملوهم. وبعدين اشمعنى هم دونًا عن كل خلق الله؟ طب ما عندك ناجى وسامى ولاد عمك، وصلاح ونادية ولاد خالتك. والا عينك ما بتجيبش غير الفشل؟

ــ يا بابا.. أنا لو اطول اجيب لك نجوم السما مش هاتأخر.

ــ يخربيت النحنحة! يا حبيبى قول لى انت ليه مش ملموم على حد ناجح ومحترم تتعلم منه؟! فيه طلبة معندهاش اللى عندك، وأهلهم ما صبروش عليهم زى ما صبرت، ولا وفرولهم اللى وفرتهولك.

ــ الناس دى هى المشكلة يا بابا. بيحقدوا على. بيكرهونى. نفسهم انى افشل.

ــ هو انت لسه هتفشل؟ يا بنى ده انت تقول للفشل قوم وانا اقعد مطرحك. هيحقدوا عليك ليه؟ بتنافسهم على جايزة نوبل فى العلوم؟ ده انت مش بس خايب، لأ فرحان بخيبتك! وبعدين تعالى هنا، مش دول اللى كل يومين والتانى مصورين لك ورق الإجابات النموذجية علشان تذاكر منه. ده الواد نصحى بيجيبلك الورق لحد البيت ما بياخدش تعريفه.

ــ فى دى لازم تبقى فخور بابنك. أنا كاسر عين ابو نصحى. عشان كده بيصورلى المذكرات ببلاش فى دكانه.

ــ مفيش يوم باعدى من غير ما اشترى منه بضاعة، وبكميات كبيرة. مرة شكولاتة، مرة بارفانات، مرة هدايا. بكده نتقى شره وكمان ناخد حاجة ببلاش من وقت للتانى.

ــ بتجيب الفلوس منين يا فالح؟ دى عاوزة ميزانية ولا ميزانية الدروس.. إوعى تكون..؟! فلوس الدروس يا بن الـ...

ــ يا بابا دروس إيه؟ ده ولا خمستاشر سنة دروس عشان الواحد ينجح. انا لعبتها سياسة. مادام ساقط ساقط يبقى نوظف فلوس الدروس صح.

ــ يا نهار اسود! غرقتنا!! أنا سالف الفلوس وكان عندى أمل تنجح وتشتغل ونسدد. هنعمل إيه؟

ــ يا بابا انا لو اطول أجيب لك حتة من القمر هجيبهالك. اصبر واحمد ربنا وما تبقاش جاحد.

ــ حسبى الله ونعم الوكيل. طب يا بنى قولى انك نجحت فى مادة. قول لى انك ساقط على الحركرك وناقصك درجة والا اتنين.

ــ الحمد لله. فى بعض المواد طلعت قبل الأخير.

ــ على الجمهورية! مش عاوزك تقلق خالص يا بابا. عندى خطة محكمة للنجاح بكرة الدنيا كلها تتكلم عليها. فيه واحد صاحبى اخترع جهاز تأكله الجهل من ناحية، يطلع كفتة من الناحية التانية. بياخد الجهل من الفاشلين ويأكله لهم صباع كفته. الاختراع ده لما ينزل هيكسر الدنيا. انا شريك فيه وهكون أول مستخدميه. بكره الجهلة ييجو من العالم كله يستعملوه عندنا ونكسب مليارات.

ــ انت بتقول إيه يابنى؟! ده كلام مفيش عاقل يصدقه.