إبراهيم عيسى: «حكومة متسولة.. بنصرف على المصريين من صندوق الزكاة»

علّق الكاتب الصحفي إبراهيم عيسى، على إرسال الدكتور أحمد عماد الدين، وزير الصحة والسكان، خطابًا إلى الدكتور أحمد الطيب، شيخ الأزهر، طلب فيه توفير 250 مليون جنيه من أموال بيت الزكاة، وذلك لشراء أدوية منقذة للحياة لصالح الوزارة، خاصةً أدوية السرطان؛ قائلًا: «بنصرف على المصريين من صندوق الزكاة؟! ده التخطيط؟!».

وأضاف عيسى، خلال تقديم حلقة أمس الاثنين من برنامجه «مع إبراهيم عيسى»، عبر فضائية «القاهرة والناس»: «لا يصح أبدًا أن وزير الصحة يطلب من شيخ الأزهر 250 مليون جنيه من صندوق الزكاة عشان يشتري دواء، يبقى لا مؤاخذة حكومة متسولة، وده معناه إننا مخططناش للدواء، وبعدين إحنا محتاجين 3 مليارات للدواء مش 250 مليون، الحياة يمكن أن تكون أفضل وأحسن، بأشياء بسيطة للغاية».

وتابع: «كل شوية يقولولنا جايبين قروض وبتاع، وفلوس من البنك الدولي، الفلوس دي بتروح فين؟ بتروح لمشروعات تانية، أنا عايز المشروع اللي يخلي المصري وهو رايح يشتري الأرز فلقاه زاد سعره الضعف، أو راح يجيب السكر ملقاش، لكن وهو مروح البيت يحس إن الطريق بقى أفضل برضو، والنجدة بقت أفضل، وكذلك الإسعاف».