سائقو الميكروباص والركاب يشتكون من غلاء البنزين: "نلاقيها منين ولا منين"

قررت الحكومة المصرية رفع أسعار الوقود بداية من اليوم الجمعة، وذلك بعد ساعات من إعلان البنك المركزي تعويم الجنيه.

وقال سائق ميكروباص، عقب قرار رفع الأسعار: "لأ أنا لسه مغلتش الأجرة، بس في الإسعاف غلوا الأجرة، بحط في العربية سولار، اللتر بـ2.35 جنيه، الصفيحة عاملة 47 جنيه، الغلا على الناس كلها".

وقال أحد الركاب: "النهارده البنزين غلي، هما لو زادوا عليهم جنيه في اللتر بيزودوا علينا 2 جنيه في الأجرة، المفروض يكون في رقابة من الحكومة، طب الدولار نزل قالك زودوا البنزين، مش عارفين هنعمل إيه، حسبي الله ونعم الوكيل، وطبعا غلوا البنزين أثر عليا، يعني كنت بدفع جنيه رايح وجنيه راجع، دلوقتي بدفع 2.5 جنيه رايح، وزيهم راجع فكنت بدفع 60 جنيه في الشهر بقيت بدفع 120 جنيها".

وأكد سائق آخر أن هذه الزيادة ليست في صالح المواطن قائلا: "إنتم كده عايزين تجوعوا الناس، لما ييجي واحد بيركب عربية هامر وبيحط بنزين 95 ماشي زودوا"، وتابع: "لكن محدودي الدخل الذين يستعملون بنزين 80 فلماذا الزيادة، وأكد أنه ذاهب لكسب 50 جنيها، وحين تزيد على صاحب السيارة البنزين 20 جنيها دفعة واحدة والسوق السوداء في زيادة أيضا، فهتضر تزيد الأجرة على الركاب، وإذا راكب من (لعبة- للكيت كات) بأجرة جنيه ونصف فتصبح 2 جنيه إذا أصبحت الأجرة رايح جاي 4 جنيه".

وتابع: "ساعات يطلع راكب يقول ممعيش أجرة، وأنا بسيبه مخدش منه لله كده، طبعا دلوقتي مينفعش أسيبه، الناس مش لاقية تدفع الأجرة دي هتزود الأجرة كمان، والمشكلة إننا لو اتكلمنا نبقى إخوان، وأنا أقسم بالله أقبل الإسرائيلي ومقبلش الإخواني، بس لو قلت رأيي دلوقتي هبقى إخوان، قولي بقى لما المواصلات تزيد والأكل والشرب ولو عنده عيلين والمرتب هو نفسه مبيتغيرش هيجيب منين، حسبي الله ونعم الوكيل".

وقالت راكبة من ركاب المبكروباص: "إحنا مش عارفين نلاقيها منين ولا منين، نلاحق على مدارس ولا على دروس ولا مجاميع ولا المواصلات اللي زادت، إحنا مش عارفين نعمل إيه صراحة ربنا، الأجرة غليت النهارده كانت بجنيه بقت بجنيه ونصف، طب أنا ابني بيروح المدرسة الصبح، المفروض كده ياخد مني فلوس مواصلات كام 10 ولا 15 جنيه، وعندي ولدين هديهم 30 جنيه مواصلات في اليوم، بوجه رسالة وأقولهم إحنا عايزين نعيش مرتاحين بس مس أكتر".

وقال سائق: "ما لازم الأجرة تغلى ما كل حاجة غليت".

وقال راكب آخر: "بعد الزيادة دي ربنا يستر، خليها على الله".