‫ازاي تسكن باقل التكاليف وانت مسافر (دليل الصعاليك وولاد الناس الى حد ما) …

انا عارف طبعا اني اتكلمت بشكل مختصر عن اختياراتك للاقامة وانت مسافر في بوست دليل السفر والسنكحة للغلابة والصعاليك

‫لكن البوست دا هدفه مش بس اني اتكلم عن الموضوع، هدفه انه يبقى دليل كامل وشامل ومش هتحتاج غيره ابدا للاقامة وانت مسافر، وعلى كل المستويات من اول تكلفة = صفر لغاية التكلفة المتوسطة، البوست دا مش هيتعرض للاقامة في الاوتيلات، وفنفس الوقت البوست دا هيفضل متجدد وهحاول يفضل up to date كل ما اتعلم حاجة جديدة في المجال دا

‫ومين عارف يمكن اغير رأيي بعدين واضيف كلام عن الاوتيلات كمان، اتمنى يكون مفيد ويعجبكم

‫ملحوظة: بما انه دليل، وبما انه شامل، فاعملوا حسابكم انه هيكون طوييل

‫قوم اعمل كباية شاي بالنعناع كدا واقعد بقى ركز معايا..

‫بص يا سيدي ، بالنسبة للاقامة وانت مسافر عندك اختيارات متنوعة حسب قدرتك على تحمل المشقة، والفلوس الي عندك استعداد تدفعها و الوفرة طبعا لان مش كل الاوبشنز متاحة في كل البلدان.

‫وطبعا عامل حساب ان يبقى فيه اختيارات اكثر “رفاهية “ شوية عشان متفهم ان مش كل اختيارات السنكحة بتكون متاحة للبنات فهيكون فيه برده اقتراحات مناسبة لسفر البنات سواء في مجموعات او لوحدهم.

‫الحاجة الي اقدر اوعدك بيها، ان ايا كان اختيارك من الحاجات الي هكتبها، فهتكون تكلفة اقامتك ارخص من اي فندق وفي احيان كتيرة مش اقل كمان في المستوى.

‫طبعا اقل مبلغ ممكن تدفعه في الاقامة هو بديهيا “صفر” ! آه على فكره ممكن متدفعش حاجة خالص!

‫فيه حاجة اسمها ال Couchsurfing ، وهي ببساطه مجموعة كبيرة في انحاء العالم من محبي السفر، عندهم استعداد انهم يستضيفوا مسافرين عندهم ويوفرله كنبة ينام عليها خلال مدة اقامته دي.

‫طبعا دا ليه مميزاته وعيوبه.

‫مميزاته انه اولا تكلفة اقامتك صفر. تاني حاجة انه بيتيح ليك انك تعيش مع locals، مواطنين حقيقيين من اهل البلد، ودا بيديك بعد ثقافي ورؤية مختلفة تماما للبلد من زاوية مكنتش هتشوفها لو قاعد في اي مكان تاني، مش هتبقى مجرد سائح، هتشوف البلد من عين ولادها ودي ميزة كبيرة.

‫بس طبعا عيوبها واضحة، مهواش اعلى مستوى ممكن للاقامة، دا غير طبعا قلة الخصوصية، انت في النهاية قاعد في بيت ناس يعني.

‫اشهر موقع couchsurfing على الانترنت هو couchsurfing.org، وهو منتدى لمحبي السفر وهتحتاج تعمل عليه حساب مجاني-ممكن ترفع العضوية بتاعتك لعضو معرف- verified- بمبلغ بسيط ودا بيحسن فرصك في انك تلاقي مستضيف- ويفضل انك تكون على الموقع قبل فترة من سفرك وتختلط بالاعضاء وتشارك في النقاشات، والأفضل انك تبادل فائدة بفائدة وتعرض استضافة مسافرين في ‫بيتك عشان الموقع ساحة تبادل استضافة لكن الاختيار ليك في النهاية ..

‫موقع تاني يقدم نفس الخدمة ومشهور برده هوhospitalityclub.org

‫بشكل شخصي، مجربتش الcouchsurfing قبل كدا، بس عندي خطط لتجربته السنة دي، لو حصلت هرجع احدث الدليل دا بتجربتي معاه

‫ودي الوسيلة الاكثر شيوعا للسنكحة في بلاد الله، وهي صالحة للولاد والبنات عادي، الهوستلز هي حاجة زي فنادق صغيرة نجمتين، او بنسيونات، او بيوت شباب، وبقت موجودة في اغلب مدن العالم، وهي قبلة محبي السفر والطلبة والصيع والسناكيح الي عايزين يلفوا الدنيا .

‫وبالمناسبة الاماكن دي مستواها اعلى بكتير من انطباعات الناس القديمة عن بيوت الشباب، وفيه ‫بعضها اصلا بقى غالي جدا ومشهور جدا ومحتاج تحجز فيه من مدة طويلة اصلا عشان تلاقي مكان وميقلش عن الاوتيل فحاجة، بس عامة هي المستويات بتختلف وتتباين حسب حاجات كتيرة اوي وعملية اختيار هوستل نظيف وكويس ومناسب للاقامة عملية مش سهلة وعايزة دقة وخبرة وفيها خدع وتريكات كتير

‫بشكل عام، أشهر موقعين للهوستلز في اوروبا والعالم هم :

‫ومش بحتاج غيرهم عشان احجز هوستل عادة

‫محتاجين دلوقتي نعرفش شوية قواعد اساسية للهوستلز عشان الناس تبقى فاهمة ايه دا

‫اختيارات الغرف في الهوستلز عادة بتتراوح بين نوعين اساسيين :

‫ودي زي اي غرفة في اوتيل عادي، غرفة خاصة بس عادة بتكون طبعا اقل حجما من الاوتيل ودي بتكون لفرد او لفردين او ل4 او احيان قليلة بتلاقي ل3 و ل6

‫‫اغلب الوقت بتبقى بحمامها الخاص، لكن احيانا فيه اختيار الاوضة الدبل انها تكون حمام shared في الاوتيل مقابل مبلغ اقل شوية

‫‫عشان كدا دايما النصيحة ان الرقم السحري للسفر 4، لان الحصول على اوضة خاصة ل4 في هوستل بسعر كويس شئ دايما متاح وهيحتفظ لك بخصوصيتك وفنفس الوقت سعر قليل، طبعا زي ما قلنا الهوستلز دلوقتي فيه كتير منها ميقلش عن الاوتيلات وممكن اسعار الغرف الخاصة تبقى قريبة او زي الاوتيلات كمان !

‫لو المسافر دا بنت، وعايزه تقلل التكلفة جامد، الغرف الخاصة في الهوستلز هي احد اهم اختياراتك

‫لكن طبعا لو مسافر كحرتة على الآخر وعايز تقلل التكلفة للحد الأدنى وتعيش المغامرة وروح السفر جرب النوع التاني من الغرف وهو

‫ودي بالظبط زي اسمها، غرف عاملة زي عنابر الجيش او المستشفى كدا (مع فارق الجو طبعا) عبارة عن سراير دبل فوق بعض وفيه اكتر من سرير في الاوضة

‫الاوضة ممكن يكون 4 او 8 او 12 حتى حسب حجم الاوضة، احيانا مختلطة واحيانا هناك فصل بين الجنسين، مميزات الdorms طبعا في التكلفة الرخيصة.

‫وأيضا في الصحبة، ففي الدورمز مفيش مجال انك متتعرفش على رفاق الغرفة ، والذين هم في العادة مسافرون ورحالة زيك ودائما ودودين ومحبين للتعرف على ناس من بلدان وثقافات مختلفة..

‫طبعا عيوب الدورم مش محتاجة تفصيل، 8 بني آدمين معاك في نفس الاوضة، مظنش محتاج اقول اكتر من كدا

‫الدورمز مش دايما مليانة بالودودين، مش كل الناس محترمة وبتتبع ايتيكيت التعامل مع الغرف المشتركة وفيه قصص محبش احكيهالك عن الدورمز والحاجات الي بتحصل فيها احيانا

:Dلو عندك قصة في دورم وحابب تشاركنا، يا ريت تشاركنا في التعليقات

‫فقرة خاصة للبنات : متفهم طبعا ان البنات بشكل عام بيكون عندهم restrictions اكبر في السفر وقلق اكبر شوية، فحابب اضيف معلومة مهمة للبنات الي عايزه تسافر، فيه هوستلز بتكون بنات بس، وفيه هوستلز بيكون الdorms فيها بنات بس، فصدقوني اتشجعوا واتجرأوا وسافروا، فيه حاجات مناسبة للكل والهوستلز مهياش حاجة مخيفة لو عرفنا نختارها صح !

‫زي ما قلنا فوق من شوية، اختيار هوستل عملية محتاجة هندزة

لان فيه عوامل كتيرة بتخش في اختيار هوستل وتجاهل اي واحد منها ممكن يلبسك في الحيط وينتهي ‫بيك الحال زي مانتهى بيا في حاوية تريللة في الغابة على بعد ساعة من مدينة فينيس 

‫قبل ما نقول ازاي، لازم نحدد المعايير اللي على أساسها بنقيّم «الهوستلز» وناخد قرارنا بالإقامة فيه، ومن التجربة والسيرش أهم معايير واجب توافرها في أي هوستل عشان نقعد فيه هم:

‫-التقييم العام Overall Score(ازاي تشوف وتقرأ التقييمات الموجودة)

‫-ميزانيتك (عندك استعداد تدفع أد إيه، كله بتمنه)

‫-الأمن (هل تثق في إنك تسيب حاجتك فيه؟ هل الحي آمن؟)

‫-المكان Location(قربه وبعده من مركز المدينة ومسافته من المواصلات العامة)

‫-المميزات Additional Features(فيه انترنت؟ فطار؟)

‫الويب سايتس اللي هندور جواها ونشوف معايير الاختيار دي هي الموقعين الأشهر في عالم الهوستلزhostelworld.com وhostelbookers.com، هم متشابهين بس فيه شوية فروق أحيانا في السعر، وأغلب الهوستلز عليهم واحد بس تقييمات الناس مختلفة فمهم تبص في الاتنين ..

‫اعمل أكونت على الـ2، ساعات بيدوا عروض كويسة للأعضاء ، والأكونت ببلاش..

‫دا الفلتر الكبير اللي بعد ما تستخدمه وتشوف اللي هيعدي منه تبدأ بقى تشوف الباقي..

‫قراية التقييم العام بقى دي عايزة خبرة وليها أكتر من نقطة مهمة تاخد بالك منها:

‫أول حاجه في الموقعين انت بتختار البلد والمدينة ومدة الاقامة وعدد المسافرين وبتدوس سيرش، هيفتح لك صفحة فيها كل الهوستلز

‫تاخد بالك من حاجتين بقى ساعتها:

‫الويبسايت نفسه عامل لك recommendation لكام هوستل عادة بيبقوا حلوين ومشهورين بس عادة برده بيبقوا غاليين شوية، فحطهم في اعتبارك ‫لكن حط في بالك ان مش شرط تختارهم خالص يعني

‫المهم، هتلاقي على الشمال الfilters بقى اللي تسمح لك تحدد معاييرك في الاختيار:

‫ اختار في التقييم العام 72% فما فوق، دا أول وأكبر فلتر.

‫تاني نقطة بقى تركز فيها أوي أوي عشان متنخدعش في رقم التقييم — number of reviews — لأن احيانا بتلاقي هوستلز واخد 90% و 100%، وتكتشف إنه تقييمين بس بالكتير، وطبعا عدد الـreviewers بيعكس شهرة المكان، بشكل عام متبصش على هوستل عليه أقل من 500 ريفيو مثلا..

‫تاني معيار مهم بعد التقييم العام، الميزانية يا كبير..

‫في نفس معدلات التقييم اللي فوق تقدر تحدد سعر الفرد حوالي كام، مفيش أرقام محددة أقدر أقولهالك لأنها بتفرق كتير من بلد للتانية، بس بشكل عام يعني أنا بحط سقف 25–30 يورو بصراحة، لأن بالنسبة لي الإقامة هي نوم ومكان أشيل فيه الشنطة فمعنديش استعداد ادفع كتير، وعادة كمان أقل من 30، بس حسب المكان برده والموسم اللي مسافر فيه.

‫-سافروا 3 او 4 ، دا الرقم المثالي ، الأوضة البرايفت الـ3 او 4 هتديك أرخص سعر للفرد.

‫-اقعد في Dorm، الدورم هو الغرف المشتركة اللي فيها من 4 ل 8 سراير بدورين، طبعا الخصوصية أقل كتير لكن السعر أقل كتيييييير.

‫-ودي نصيحة أخوية بقى، حاول لما تقرر، تدور على contact info للهوستل وحاول توصل للناس نفسها وتكلمهم وممكن أوي تطلع باسعر اقل بشكل مباشر منهم!.

‫campsites ، أول ما تشوف كلمة Camping أو camp قبل اي هوستل افتكر نصيحة النافاراي :

‫لا تقربوهن يا أناندا.. لاتلمسوهن يا أناندا، وإذا كلمتك إحداهن فلا تردن عليها يا أناندا

‫حسب اختياراتك بقى اختار من على اليمين نوع الغرف اللي عايزها وكدا عشان تقلل العدد اللي بتبصله..

‫دلوقتي ممكن تبقى قادر تحدد 4–5 هوستلز تبص عليهم، وهتلاقي بالنظر ممكن يقلوا لـ 2–3 كمان لأنك هتلاقي شوية منهم أسعارهم أعلى مانت عايز أو مفيهمش غرف فاضية من النوع اللي انت عايزه في الفترة اللي بتدور فيها.

‫قبل ما ندخل على باقي العوامل وتحليلها، فيه شوية قواعد مهمة لازم تعرفها وانت بتبص للتقييمات:

‫- لما تبص هتبص على حاجتين، النسب بتاعت التقييم اللي هي % و الـreviews بتاعت الناس.

‫- عادي إنك تلاقي negative review، مفيش مكان perfect.

‫- الـreviewers بيتقسموا لأنواع برده، على «هوستل وورلد» رأي الـavid travelers والـglobetrotters أهم آراء، الباقي مبتدئين سافروا مرة ولا حاجة فاحيانا كتير رأيهم مبيكونش موضوعي.

‫«هوستل بوكرز» أصيع في الحتة دي، عامل تقسيمة للـreviewers تديك رؤية أدق.

‫- لاحظ كويس التعليقات اللي بتتكرر كتير، الحلوة والوحشة، كل ما التعليق كان متكرر كل ما كان حقيقي، وكل ما كان نادر كل ما افكسله عادي ممكن تجربة فردية أو واحد بيتفزلك.

‫- ركز على التقييمات اللي في آخر 6 ل 9 شهور.

‫‫نقطة الأمن مهمة جدا عند أغلب الناس الي أعرفهم بيفكروا يسافروا، وأكتر حاجه بتخوف الناس من تجربة الهوستلز هي الأمن، وهو زي أي فندق فيه درجات مختلفة من الأمن حسب المكان والسعر طبعا، طيب إزاي نقيم الأمن في الهوستل؟

‫أولا: تقييم الـSecurity العام على الويبسايت..

‫لما تخش على أي هوستل في الموقعين، هتلاقي فوق ratings محطوطة بشكل عام، من ضمنها الـsecurity، دا أول مؤشر بالنسبة لك، من التجربة فوق الـ75% لأي ريتنج هو رقم آمن ولطيف بس عادة في الـSecurity بدوّر على فوق الـ80%.

‫تاني مؤشر بقى إنك تبص على الـreviews وتشوف بنفسك تعليقات الناس، هتلاقي دايما حد بيتكلم عن الأمن سواء كويس أو وحش، بس زي ما قلت، في إنك تقيم الكلام اللي قدامك حسب المفاتيح اللي اديتهالك فوق.

‫اتأكد ان فيه lockers في المكان، دي هتشوفها في الريفيوز برده، وفي صفحة اسمها Facilities في هوستل وورلد وهتلقيها على الشمال في بوكرز دور فيها على lockers، بس نصيحتي شوف الريفيوز لان ساعات بيبقى مكتوب لوكرز وهو مفيش!.

‫المكان قربه وبعده من مركز المدينة ومسافته من المواصلات العامة:

‫المكان أحد المعايير المهمة جدا جدا في تقييم الهوستل، مسافة الهوستل من مركز المدينة أو قربه من المواصلات العامة معيار مهم جدا.

‫بس خلي بالك، كله بتمنه، هتلاحظ دايما إن كل ما تبعد عن قلب المدينة، كل ما السعر هيقل جامد، فاحسبها وقرر انت عايز ايه.

‫لو عايز نصيحتي، في المدن الصغيرة، مفيش مشكلة تسكن بعيد شوية، في النهاية المدينة صغيرة، في فينيسيا كنا قاعدين في كامب على مسافة ساعة من فينيسيا تقريبا، ومفرقتش في حاجة لأننا الصبح بننزل بدري نروح ونلف وهي مدينة صغيرة فعادي.

‫لكن في روما لو سكنت بعيد، هيضيع منك وقت خرافي !. فقرر حسب ميزانيتك ووقتك.

‫تعرف المكان ازاي؟ في الموقعين هتلاقي خانة اسمها Map and direction دوس عليها هتلاقي شرح لمكان الهوستل وقربه وبعده من المدينة ومكانه على الخريطة، وعادة بيقولك كمان إيه المواصلات اللي تركبها من المطار عشان توصل الهوستل.

‫*لو مش واضحلك الشرح أو مكان الهوستل، Copy العنوان وسيرش عليه في جوجل Maps، وشوف المسافة بينه وبين محطة القطر الرئيسية في المدينة اللي انت فيها.

‫فيه cleanliness في التقييم العام ودا يديك رؤية معقولة، بس دي بالذات مش هتكتشفها صح غير من الـreviews، الجزئية دي مهمة جدا، ركز أوي في تعليقات الناس على نضافة المكان والحمام بالذات، وتغيير الملايات والحاجات دي.

‫دي نقطة مهمة أوي، بس برده بتختلف من شخص للتاني، شخصيا، مهم أوي عندي توافر الحاجات دي في الهوستل :

‫- مياه سخنة في الدش وإمكانية الدش طول الوقت (آه، مش دايما متوافرة).

‫-vending machine أو مكنة قهوة، ولو قاعد مدة طويلة يفضل يبقى فيه مطبخ مشترك (انك تطبخ لنفسك هتوفر كتيييييير لو قاعد مدة).

‫فيه مميزات تانية لطيفة تختلف أهميتها من شخص للتاني زي مثلا common room وlaundry واحيانا خرائط للمكان، وبعض الهوستلز بتوفر free tours (لو لقيتها ارشق وش!).

‫ملحوظات عامة عشان متلبسش في الحيط:

‫-شوف مواعيد الـcheck-in and out وقارنها بمواعيد سفرك عشان متروحش وتلبس في الحيط.

‫-اتاكد إن مفيش curfew، بعض الهوستلز ليها مواعيد لازم تبقى برا أوضتك او مينفعش ترجع متأخر مثلا.

‫-خد معاك ملاية واحدة بيضا وفوطة. Just in case

‫في الهوستل مفيش ضمانات، ممكن جدا تعمل كل دا وتروح تلاقي «الهوستل» زبالة، نصيحتي ليك، دايما اعمل backup plan، ولو رحت معجبكش، امشي على طول، في داهية شوية الفلوس الزيادة اللي هتدفعها، راحتك وأمنك أهم من أي فلوس.

‫ملحوظة اخيرة في موضوع الهوستلز : لما تسافر، خليك مفيد لمجتمع السفر، متنساش دايما لما ترجع تحاول تكتب على Hostelworld — hostelbookers ريفيو مفصل عن الهوستل الي رحته وتقيمه بشكل موضوعي عشان تفيد الي جي بعدك.

‫دي احد الطف الاختيارات الي ممكن تلاقيها للاقامة والي بشكل عام مش معروفة ومش منتشره خالص في المنطقة العربية ونادرا ما بلاقي حد يعرف عنها حاجة.

‫الي انت متعرفوش ان عندك اختيار وانت مسافر انك تقعد في مكان بالايجار ! ممكن تأجر شقة من بابها، او تأجر اوضة فاضية في شقة احد الاشخاص عارضها اونلاين للمسافرين الي زيك. طيب ايه تكلفة الاوبشن دا ؟ عالية ولا رخيصة ولا ايه ؟

‫ميزة الاوبشن دا انه مساحته واسعة، يعني لو انت بتدور على حاجة رخيصة ممكن اوي تلاقي ان تأجير اوضة في شقة في المدينة الي انت مسافرها يكون تكلفته قليلة جدا خاصة لو كان اختيارك للاوضة في حتة مش وسط البلد اوي بتكون الاوض رخيصة، يعني ممكن تعتبر تأجير اوضة دا ابجريد شوية للCouch surfing

‫يعني انا في سفري لفلورنسا ، اخترت اني ااجر اوضة في شقة واحد طلياني في مدينة براتو القريبة من فلورنسا ب10 يورو في الليلة تقريبا !

الاوضة الي قعدنا فيها في فلورنسا

‫طبعا الاوضة دي كانت رخيصة جدا لانها مش فلورنسا نفسها ودا حل مناسب اوي للي حابب يستمتع بنوع من الخصوصية + انه في نفس الوقت قاعد مع حد Local من اهل المدينة يقدر يعرفك حاجات كتيرة. شقة اليكس العزيز في براتو هتفضل من الطف التجارب الي اتعرضت ليها ، خاصة كلبه اللعين ليونايدس الي جيمي صديقي اللدود كان بيستفزه عشان يجري ورايا عشان عارف اني بخاف من الكلاب ! (ودي نصيحة ليك ، اقرا كويس الي مكتوب في صفحة اعلان الايجار عشان متتفاجئش زيي انه عنده كلب وانت بتقلق منهم)

‫طبعا اختيار تأجير اوضة دبل كان الارخص والاكثر كحرتة عشان احنا كنا 2، لكن تعالى نتخيل انكم مسافرين عدد اكبر من كدا، 4 مثلا دا يديك اوبشن اعظم، انك تأجر شقة من بابها وممكن تقف عليك بتكلفة حلوة جدا وممكن يطلع حظك حلو وتلاقي شقة رخيصة وحلوة في منطقة كويسة اوي

‫ فمثلا وانا بساعد بنت لسه متجوزة تدور على مكان لطيف للاقامة في باريس، وقعت على الشقة الرائعة دي في التروكاديرو بتكلفة حوالي 80 يورو في الليلة للشقة (يعني 40 في الليلة للفرد)، وهي تطل على برج ايفل في قلب باريس !…

‫وممكن لو عدد اكبر من 4 مكان تلاقي حاجات احلى! لأن ميزة الايجار انه بيأجرلك بالشقة او بالاوضة مش بالنفر.

فقرة خاصة للبنات : طبعا الاختيار دا برده من الطف الاختيارات للبنات، تقدري بسهولة وبتكلفة معقولة جدا وانتي مسافرة مع صاحباتك تلاقوا شقة بسعر كويس، او حتى اوضة كويسة في شقة وتدققوا كويس في تفاصيل صحابها الي مستضيفينكم وتحطوا قيد على نفسكم مثلا ان صحاب الشقة يكونوا اسرة مثلا او تكون ست او جدة او اي حاجة، الموضوع مش صعب وملكوش حجج

‫طيب شرحنا الاوبشن وفكرته والمساحات الي بيفتحهالك، تعالى بقى نتكلم بشكل عملي عن ازاي تأجر وتلاقي فين وازاي تختار وتلاقي احسن اسعار.

‫فيه مواقع متعددة لتأجير الشقق والأوض على الانترنت لكن احسنهم على الاطلاق واشهرهم والي انا جربته اكتر من مرة هو موقع Airbnb.

ملحوظة : اللينك بتاع Airbnb دا هدية مني، لو سجلت باستخدام اللينك دا هيديلك 23 يورو كريدت هدية تستخدمهم في سفريتك الجاية

‫زي الهوستل، فيه معايير مهمة بتحطها في اعتبارك وانت بتختار تأجر تعالى نتعرض ليها الاول عشان نفهم الدنيا ماشية ازاي :

‫هنبدأ سوا نفتح Airbnb.com و نشوف الليلة دي ماشية ازاي..

‫اول ما تبدأ بحث هتلاقي قدامك صفحة النتايج 4 أجزاء، شمالك الخريطة وعليها الأماكن، يمينك بالترتيب من فوق التاريخ اللي مسافر فيه، وتحته نوع الغرفة و تحته متوسط السعر و تحتهم الأماكن وصورهم (وفيه More filters دي لفلترة المميزات)

‫الميزانية هنا هي المحدد الأكبر يا بوب، فهقف هنا دقيقة بقى وأقولك شوية معلومات ونصايح:

‫بص، ميزة إيجار الغرف أو الشقق ان «العدد في اللمون»، يعني انت بتدفع إيجار الأوضة أو الشقة وخلاص، مش فارقه انتوا كام (بس طبعا الأوضة أو الشقة الراجل محدد limit للعدد المسموح يبقوا فيها ومكتوب)، فعادة لو عدد،airbnb ممكن يبقى أرخصلك من الهوستل.

‫لو عايز تضرب إقامة رخيصة في حاجه زي دي ايجار وطبعا مستوى أريح من الهوستل، أبعد شوية، يعني بص كدا على الخريطة دي:

‫فلورنسا في القلب أهو، بص فوق على الشمال مدينة براتو، دي مدينة صغيرة على مسافة 40 دقيقة بالباص، وأنا مسافر أجرت أوضة هناك، وأوضة نضيفة جدا، بـ20 يورو في اليوم لفردين!، عشان مش مدينة مشهورة، وكنت بنزل أركب باص بـ 2 يورو رايح وزيهم جي يعني ضيفهم على الأوضة كأني قاعد بـ14 يورو في اليوم الواحد في الأوضة دي (الصورة اللي في أول المقال هي صورة الأوضة اللي كنا فيها)…

‫فميزانيتك هتفرق كتير في تحديد انت هتدور ازاي على مكان، لأن تعالى ناخد الناحية التانية، انت مسافر مع مراتك تتفسحوا، أو شهر عسل او بنات صحاب وميزانيتهم كويسة ، هتبص بشكل تاني، هتبقى عايز حاجه زي دي مثلا:

‫شقة بـ100 يورو في اليوم مثلا، أنا مفترض هنا انه 3 بنات صحاب مثلا مسافرين فينيسيا كل واحده هتدفع 30 يورو في اليوم وشقة في قلب فينيسيا (اللي هي أصلا غالية جدا) وبراحتهم..

‫فنصيحتي الأولى وانت بتدور، الخانة بتاع الفلوس دا حدده واعرف انت عامل حسابك هتدفع كام، ومتنساش لو انتوا أكتر من شخص انك تضرب ميزانية الواحد في اليوم في عددكم عشان تعرف انت كدا معاك حوالي أد ايه لليوم الواحد.

‫ملحوظة: دور على أقل شوية من ميزانيتك لان airbnb ليها fees، مش فاكر بتتحسب إزاي بس هتلاقيها مكتوبة.

‫بونص هدية: جرب تكلم الراجل أو تبعتله وتتفاوض معاه، ممكن يوافق وتنزل السعر عن اللي مكتوب أو حتى تخلص معاه برا بعيد عن الموقع فتوفر على الأقل تكاليف الموقع.

‫كدا انت ابتديتوا تفهموا اللعبة، بعد ما تكتب المدينة، اختار من خانة السعر المتوسط بتاعك وعدد المسافرين و في أنواع الأوض اختار اللي على مزاجك، أنا مثلا بدور في روما هنا، محدد متوسط سعر 60 في الليلة (فهختار 55) وأوض خاصة أو شقق أو حتى shared rooms مع ناس تانية مش فارقة معايا

‫بس لقيت قدامي 515 اختيار، فكويس كدا، فيه مساحة للتقليل، واللعب، هخش على more filters واختار الحاجات اللي تهمني أوي:

‫طبعا دي تختلف من شخص للتاني، بالنسبة لي اخترت أهم حاجات:

‫«انترنت وان المضيف يكون بيتكلم عربي أو انجليزي أو الماني».

‫اختار انت الملائم ليك بقى، ممكن تكون عايز نوع معين من الشقق، عايز تكييف، أو دفاية أو أي حاجه بقى..

‫المفروض في المرحلة دي تبدأ تطلع اختيارات بقى، يعني انا دلوقتي قدامي بتاع 13 اختار منهم، فانا بالنظر على الخريطة كنت بدوس على الاماكن القريبة من قلب المدينة واخترت ال5 الاقرب في تقديري ، دي اول طريقة فلترة

‫الطريقة التانية بصراحه كان اني بسكرول واتفرج على الاختيارات والحاجات الي شكلها عاجبني باختارهم.

‫بس تاخد بالك اوي وانت بتختار اي مكان بتقف عليه بيوريك فين، متروحش بعيد اوي (طبعا حسب حسبتك)

‫بس نصيحتي متروحش بعيد اوي في المدن الكبيرة، في المدن الصغيرة مش مشكلة..

‫طيب الفلترة الاولانية حسب المكان بقى انك تاخد لفة سريعة على ال5–6 الي اخترتهم وتقرا الـdescription:

‫عادة هتلاقي معلومات عن المواصلات القريبة للمكان وكدا، بس لو مفيش، افتح صديقك Google Maps وشوف المسافة بين العنوان اللي مكتوب و وسط البلد (محطة المترو الرئيسية):

‫انك تفتح بقى مكان من اللي اخترتهم وتقيمه بشكل عام عايز انك تاخد بالك من كام نقطة مهمة:

‫- بص كويس على الصور وقلب في المكان وشوفه مناسب وعاجبك ولا إيه النظام.

‫- تفاصيل الشرح اقراها كويس وافهمها.