في دايرة الرحلة (4): ازاي ترتب شنطتك صح لرحلة خالية من الضغوط…

اتكلمنا كتير في مقالات سابقة عن السفر، ازاي تلاقي رحلة كويسة، ازاي تسكن وانت مسافر ، ايه بعض الاماكن الي ممكن تسافرها بدون فيزا ، ومن اكتر النصايح الي قلناها دايما انك لازم تسافر خفيف ومتاخدش حاجات كتير لاسباب مختلفة ، اولا عشان تبقى حركتك خفيفة، ثانيا عشان اغلب شركات الطيران الرخيصة مش بتسمحلك تاخد غير شنطة واحدة بابعاد محددة.

وعشان كدا قررنا النهارده نكلمكم عن واحد من اهم فنون السفر والتحضير ليه.. فن تستيف الحاجة في الشنطة، او فن الباكنج Packing. موضوع اكثر اهمية مما تظن واهماله مش بس يساوي تعب وبهدلة، لكن كمان خساير مادية زي ما هتشوفوا كمان شوية !…

خليني احكيلك قصة صغيرة حصلت معايا عشان تعرف أهميته…

وانا رايح المانيا من مطار بولونيا في ايطاليا، كنت – لدواعي الكسل – رامي الهدوم في الشنطة من غير ما استفهم التستيفة التمام زي مانا متعود، المهم، كنا طالعين في ايزي جيت Easyjet، ولو فاكرين من المقالات الي فاتت، ايزي جيت بتسمحلك بشنطة واحده cabin bag  ليها ابعاد معينة، وبتدخل الشنطة في صندوق كدا، لو مدخلتش ميعديكش، وياخدها تتشحن وتدفع 60 يورو تكلفة شحن ودا رقم كبير جدا لاني اساسا كنت شاري التذكرة ب30 يورو ! يعني ضعف تمن التذكرة !.

حجم الشنطة الي ايزي جيت بتسمحلك بيها

المهم وصلت في دوري في الطابور وحاولت استعبط واعدي من غير اختبار البوكس دا لاني عارف اني هفشل فيه، الست طبعا شافت النسر الذهبي بيرفرف على الباسبور بلونه الاخضر الزرعي الجميل وحلفت راسها وألف سيف ما تعديني غير لما الشنطة تدخل في الصندوق رغم ان عصام صاحبي في الرحلة شنطته اصلا باي حال متخشش في الصندوق، لكن عشان طلعلها الاقامة الالماني عدى عادي!. المهم احاول معاها مفيش، قلتلها طيب انا هاجي على جنب وافك الشنطة واعمل repack و نشوف، قالتلي قدامك 5 دقايق بالضبط والطيارة هتطلع!

شنطة جيمي.. أبعادها ملهاش علاقة خالص بالمسموح

فتحت الشنطة وطلعت كل حاجه براها و بدأت repacking بتكنيك الclown car (هشرحه كمان شوية) ، بس طبعا عشان التأخير قعدت تزعقلي وتقولي “فاضل دقيقة”، فكان فيه بعض ملابسي –مش الخارجية- لسه ملقاة على أرض المطار، سبتهم وقفلت الشنطة بسرعة وبصيتلها باحتقار وقلتلها ابقي لميهم انتي، حطيت الشنطة في الصندوق ولانها متستفة صح دخلت عادي، ولحقت الطيارة في اللحظات الأخيرة قبل طلوعها وقبل انهيار جيمي الي كان على وشك يسيبني ..

 طيب ايه طرق الباكنج الأفضل والأشهر والي بيستعملها محترفو السفر والflying attendants ، ودول ناس بتسافر كتير ودايما معاها شنطة واحدة Carry-on Bag

هل تعلم عزيز القارئ ان ال15 يوم في أوروبا دي كل اللي كان معايا كان شنطة هاندباج صغيرة؟

التكنيك الأول : طريقة الRolling :

وأنصار الطريقة دي بيقولوا انها بتوفر مساحات، ولو اتعملت بطريقة سليمة كمان بتخلي الهدوم تطلع بدون تجعدات ولا كرمشة …

ودا لينك رائع فيه سلايد شو لشرح الفكره ودا فيديو ممتاز بيشرح ازاي عدد كبير من الملابس اتحط في شنطة صغيرة باستخدام الrolling

وبشكل عام الrolling تكنيك ممتاز لشنط الbackpack والشنط الي شبه الي في الفيديو دا ، دوروا على يوتيوب كمان على طرق الrolling لانواع ملابس مختلفة لأن كل نوع هدوم ليه طريقة افضل في الطي عشان ميتكرمش، برضه عظيم للموضوع دا.

التكنيك التاني  : الClown car :

هو التكنيك المفضل بالنسبة لي ولما تشوف الفيديو دا هتعرف ليه اسمه كدا

ودا من تجربتي أفضل طريقة تستف بيها الشنطة وتبقى مظبوطة ومقفولة كويس، بس طبعا خد بالك ان الهدوم مش هتكون مكوية وهيبقى فيه كرمشات وكدا، ودا فيديو ممتاز بيوريك ازاي :

ودي هي أفضل طرق أعرفها لترتيب الشنطة، بس خلي بالك، المشكلة الأكبر أصلا هي مبالغتك في تقدير انت محتاج ايه معاك وانت مسافر وأخدك حاجات كتير ملهاش اي لازمة ..

 اي سفرية مهياش اكتر من اسبوعين ، ممكن تحط كل الي انت محتاجة في Carry-on bag مش محتاج اكتر من كدا ..

ودي شوية دروس اتعلمتها من السفر بالنسبة للموضوع دا حابب أشارككم بيها:

1 – قبل ما ترتب الشنطة، حط قدامك كل الهدوم الي انت عاوز تاخدها، وبعدين شيل تلتها، ايوة زي ما سمعت، شيل تلتها

2 –  الحاجات الصغيرة والملابس الي حجمها قليل جرب تحطها في حاجات صغيرة زي الي تحت دي، هتاخد مساحة اقل وتبقى منظمة اكتر.

3 – أهم حاجه في الرحلة الراحة، خد معاك هدوم مريحة أهم من هدوم شيك

4 – اهم حاجه في السياحة الكوتشي ،وياه لو جزمة جري او مشي، هتمشي كتير وهتقدر راحة رجلك وقتها

5 – صدقني لو مسافر سياحة، كوتشي واحد مريح كافي جدا بالاضافة للي في رجلك وشكرا

6 – الشرابات اهم من التيشيرتات، صدقني …

7 – مش محتاج اكتر من جاكت واحد (يفضل يكون بكوبيشون ومضاد للمياه) وبنطلونين جينز بالكتير (لو قاعد حوالي اسبوعين)

8 – حاول تبقى هدومك versatile ، يعني نفس اللبس يكون ليه اكتر من استخدام (double face jacket) مثلا وحاجات تليق على حاجات كتير…

9 – شنطتك لازم يبقى فيها صورة من كل ورقك المهم (باسبورك –حجزك-طيرانك الخ..)

10 – حط أدواتك (مكنة الحلاقة – البارفان الخ..) دايما فوق خالص، في الجيب الي في الناحية التانية في الشنطة..

11 – اي سوائل معاك، معجون حلاقة، بارفان، سبراي ميزيدش عن عبوة 100  مل والا هياخدوها منك

12 – إعمل حساب التكنولوجيا، اتاكد من شكل فيش البلد الي هتسافرها وإن شواحنك مناسبة وإن معاك كونفرتر