السيسي للإعلاميين: "أنتم بتضروا مصر وهتتحاسبوا قدام ربنا"

قال الرئيس عبد الفتاح السيسي، في الندوة النقاشية حول تأثير الإعلام على الرأي العام التي عقدت اليوم الأربعاء على هامش المؤتمر الوطني للشباب بشرم الشيخ، إن الإعلام يضر مصر، وقال "تقارير إعلامية تسببت في ارتفاع سعر الصرف".

ووجه الرئيس حديثه للإعلاميين قائلًا "عمري ما تحدثت معاكم غير الصدق، ومواجهتش إشكالية في كده إني أكون صادق وأمين ومتجرد، حضرتك بتطل على الناس، بيشوفك الطفل الصغير، قول كلام بوزنك، هتتحاسب أمام الله على كل حاجة بتقولها".

وأضاف السيسي "مش بتكلم عن المهنية بس، لو واقف بتقول كلمة والكلمة بتسئ، هتتحاسب أمام الله، لو سمعها واحد تبقى كذبة، لو 100 ألف، تبقى 100 ألف كذبة، لازم نكون صادقين في تناولنا".

وأكد الرئيس أن البلد تعيش عدة تجارب منذ 2011، وتلك التجارب ستأخذ فترة وتنتهي، وقال "مستعد أجيبلكم الجرايد وتشوفوا إنتم بتكتبوا إيه كل يوم، أنا بتابع وبقرأ عشان أشوف إنتوا شايفين مصر إزاي وبتنقلوها إزاي، أنتم بتضروا مصر جدًا، وجهت رسايل كتير ليكم، قولتلكم إنتم مسؤولين عن مصر معانا، لكن في جرايد كانت أحد أسباب ارتفاع سعر الصرف، الناس خدتها على أنها مؤشر، واللي منشور كان غير حقيقي".