بالتفاصيل.. معتقل الـ"تي شيرت" يعاني ليعود إلى دراسته

روى طارق حسين، شقيق محمود محمد، الشهير بمعتقل الـ"تي شيرت"، تفاصيل معاناة شقيقه للرجوع مرة أخرى إلى حياته الدراسية، واستكمال المراحل التعليمية التي توقفت بعد اعتقاله لمدة عامين محبوسًا خلالها احتياطيًا؛ بتهمة ارتداء "تي شيرت" "وطن بلا تعذيب"، مؤكدًا أن وزارة التربية والتعليم تتعنت في الإجراءات الخاصة بعودته مرة أخرى.

وقال طارق، عبر صفحته الشخصية بموقع التواصل الاجتماعي "فيس بوك": "إن محمود قبل فترة حبسه التي تخطت أكثر من سنتين حبسًا احتياطيًا في قضية التي شيرت، كان في الصف الثاني الثانوي صناعي، يعنى نجاح سنة أولي، بعد ما خرج محمود من السجن أتلهينا جدًا في موضوع العملية بتاعته اللّي للآسف لحد دلوقتي لسه بيتعالج وحالته مش مستقرة وبيمشى على عكاز".

وتابع "حسين"، "من شهرين أو أكثر بشوية روحت مدرسة محمود (السادات الثانوية صناعي بالخانكة) وقابلت مدير المدرسة وتحدثت معه عن موضوع تغيب محمود لسنتين وإننا عاوزين نرجع محمود المدرسة، وكان رده: معلش هستفسر عن الموضوع من الإدارة التعليمية، ووضع أخوك إيه وعدى كمان كم يوم، وطلب بيان نجاح مختوم من الإدارة التعليمية بأن محمود تخطي سنة أولى ثانوى".

وأضاف حسين، "بالفعل عملت كده وعدوا الكام يوم وروحت للمدير اللّي بدوره طلب شهادة ميلاد لمحمود وبيان النجاح اللّي كنُا عملنا بالفعل.. فعملت شهادة الميلاد وعديت علي المدير في المدرسة، وقالي معلش مش عارف مين من الموظفين مش موجود فعدي علينا كمان يومين تاني، وما تقلقش الموضوع خلص وهيرجع المدرسة من سنة تانية، فقولت خلاص الحمد لله، بعدها بيومين روحت للموظف اللّي كان غايب قالي لا مش هينفع يرجع من سنة تانية والكلام اتغير، رجعت للمدير قالي معلش مش هينفع يرجع من سنة تانية لازم يرجع أولي، فرديت عليه  قولتله إزاي واحد عدي سنة أولي ومعانا بيان نجاح بده يرجع سنة تانية المهم في اليوم ده قالي معلش طيب إحنا هنرجعه سنة تانية بس منازل بس هيقدم في بداية شهر 10، ووصلنا لبداية شهر 10 ومحمود راح يقدم في المدرسة اتقاله هترجع سنة أولي منازل ومفيش موضوع سنة تانية ده".

وأشار "حسين"، إلى أنه "أرسل لناس كتير علشان يساعدوه في موضوع محمود وغالبا جزء منهم حاول بس ما نفعش وكمان حد بعت لمحمود علشان نقدم شكوي في وزارة التربية والتعليم وعملنا كده ولم يأت الرد حتى الآن، وأرسلنا أيضًا لأعضاء في مجلس النواب".

واستكمل "حسين" حديثه، عن أنه لا يعلم ما السبب الذي يعطل أو يقف أخي من دراسته من السنة الدراسية:

التي كان بها"، مشيرا إلى أن المدرسة "لم تقل أي مبررات، والمدير بتاع المدرسة لعب دور غريب لأنه فضل يأجل في الموضوع وبكل سهولة يقولنا مفيش رجوع من السنة الدراسية الّلي كان محمود بيها،  يعنى ضاع من عمره سنتين وشهرين في السجن فى القضية، وضاع منه سنين دراسية وهو محبوس دا غير صحته التي جزء منها ضاع في السجن واللّي بنحاول نلاحقة دلوقتي ومش عارفين".

وتساءل حسين، "إيه مطلوب مننا علشان حتى يرجع يستكمل دراسته من الصف الثاني الثانوي، يعني يبقى سنُه 20 عامًا ويعيد الثانوي من جديد، ولا مطلوب منه يقعد من مدرسته ويبقي شخص مش متعلم علشان روتين فاشل، وكل هذا بسبب سجنه اللّي كل ما نحاول ننساه وننسى اللّي عدينا بيه نلاقي تفاصيله وحاجات بنخسرها بسبب السجن فنرجع نفتكر كل تفاصيلة فية.. الحقيقة مش عارف نروح لمين علشان يحل الموضوع اللّي أنا شايف أنه مش صعب يعني، اللّي افهمه أن الدولة تبقي بتشجع التعليم مش بتكره الناس في التعليم".