مخرج "صابر جوجل" عن خلافاته مع سارة سلامة: "جابتلي الضغط والسكر"

أوضح مخرج فيلم "صابر جوجل" محمد حمدي، سر الخلاف بينه وبين الفنانة سارة سلامة، وتصريحاتها عن الفيلم، وذلك عبر حسابه الرسمي على موقع التواصل الاجتماعي "فيس بوك".

وكتب حمدي، بتدوينته: "أصدقائي الصحفيين المحترمين حضراتكم ياما كلمتوني وسألتوني عن الممثلة سارة سلامة، وأنا كنت متمسك بردودي المتحفظة والمحترمة واعتبرت نفسي أكبر من الرد علي تفاهات المدعوة سارة سلامة لكن الحقيقه هي مصممة علي الاستمرار في التفاهات والتصريحات المسيئة لشخصي وللفيلم".

وأضاف: "لذلك قررت أرد وأوضح بعض الأمور الخاصة بعمل الممثلة دي في الفيلم وأهمها أنها تدعي إن السيناريو اللي تعاقدت عليه مختلف عن الفيلم النهائي اللي انا عملته وبالمناسبة دي هقول أهم واقعة وأغرب واقعة ممكن يشوفها مخرج في حياته حيث إن الممثله بعد التعاقد واستلام نسخة السيناريو قبل معاد التصوير بثلاث أسابيع لم تقرأ جمله واحدة وده بإعترافها لما حضرت أول يوم تصوير ليها وبعد محاولاتي لعمل جلسات عمل معاها قبل التصوير".

وتابع: "دايما مسافرة أو مشغولة أو مبتردش علي التليفون خالص أو قافلة التليفون وهكذا لمدة ثلاث أسابيع، ولما حضرت أول يوم سألتها عن قرائتها للسيناريو وكان الرد الصادم الآتي ((بصراحه ملحقتش اقرا بس انا عارفه اني طالعه مرات رجب واني مبخلفش،، ثم ضحكة طويلة ههههههه))".

واستطرد: "طبعا أنا مضحكتش أنا اتخضيت واتصدمت وجالي ضغط وسكر وقلب وزغللة وكل امراض الدنيا في لحظه واحدة وقولت لنفسي روحنا في داهيه ياحمدي وربنا يسترها بقي، دي الحقيقه وأهم ما حدث والحدث ده يلخص ببساطه هذه الشخصية، أما بقي عن مواعيدها البايظة ومكياجها الأوفر الخ الخ الخ دي حاجات مش هتكلم فيها لان الكل عارفها كويس".